Da Mme Prọfet Nte Uwụtn̄kpọ—Hosea
1. Ewe mbụme ke ekeme ndidi emesibụp idemfo?
1 ‘Nso ye nso ke n̄keme ndinyịme ẹtak mi man nnam n̄kpọ Jehovah?’ Ekeme ndidi emesibụp idemfo mbụme emi ke ini etiede ekere aban̄a uwak nti n̄kpọ oro Abasi anamde ọnọ fi ye nte enye atuade fi mbọm. (Ps. 103:2-4; 116:12) Hosea ama anam se Jehovah ọkọdọhọde enye anam kpa ye oro n̄kpọ akatakde enye ke ndikanam ntre. Didie ke nnyịn ikeme ndikpebe Hosea?
2. Didie ke ikpekpebe eti uwụtn̄kpọ emi Hosea ekenịmde ke ndikaka iso n̄kwọrọ ikọ?
2 Kwọrọ Ikọ ke Ini Afanikọn̄: Hosea eketịn̄ etop Abasi akpan akpan ọnọ obio ubọn̄ esien Israel duop emi ẹkeyomde nditre utuakibuot akpanikọ. Edidem Jeroboam II ama anam idiọkn̄kpọ ke iso Jehovah onyụn̄ esịn udọn̄ ọnọ utuakibuot nnọ eyen enan̄ oro Jeroboam I ọkọtọn̄ọde. (2 Ndi. 14:23, 24) Ndidem eken oro ẹkedade itie mmọ ẹma ẹka iso ndinam obio ubọn̄ esien duop ẹnam idiọkn̄kpọ tutu ẹsobo mmọ ke akpatre ke isua 740 M.E.N. Edi kpa ye oro ediwak owo ẹketuakde ibuot ẹnọ nsunsu abasi, Hosea ama aka iso anam utom nte prọfet ke isua 59 ke nsụhọde n̄kaha. Ndi nnyịn imebiere ndikwọrọ ikọ kpukpru ini, idem ke ini mme owo mîmaha ndikpan̄ utọn̄ n̄kop etop nnyịn m̀mê ke ini ẹbiọn̄ọde nnyịn?—2 Tim. 4:2.
3. Didie ke se iketịbede inọ Hosea owụt ke Jehovah enyene mbọm aban̄a owo?
3 Kere Ban̄a Mbọm Oro Jehovah Enyenede Aban̄a Mme Owo: Jehovah ọkọdọhọ Hosea ọdọ “n̄wan use.” (Hos. 1:2) Okposụkedi emi Gomer n̄wan esie akamande eyeneren ọnọ enye, n̄wan emi ama aman nditọ use iba nte ini akakade. Hosea ndikadahado nnọ n̄wan esie owụt akwa mbọm oro Jehovah ekenyenede ọnọ mme otụtutọn̄ nditọ Israel ke ini mmọ ẹkekabarede esịt. (Hos. 3:1; Rome 9:22-26) Ndi imenyịme ndiyak n̄kpọ oro nnyịn imade atak nnyịn man ikeme ndinam kpukpru orụk owo ẹfiọk mbọm oro Jehovah enyenede aban̄a owo?—1 Cor. 9:19-23.
4. Nso idi ndusụk n̄kpọ oro ikemede ndiyak ẹtak nnyịn man inam n̄kpọ Jehovah?
4 Ndusụk mme asan̄autom Jehovah ẹyak ubọkọkọ oro ẹkemede ndinọ mmọ ata ediwak okụk ẹtak mmọ man ẹkeme ndisịn ekese ini ke utom ukwọrọikọ. Mbon eken ẹnyịme nditre ndidọ ndọ m̀mê ndinyene nditọ man ẹsịn idem ẹnam n̄kpọ Obio Ubọn̄. Ke ini ikerede iban̄a Hosea, nnyịn imekeme ndikere ke nnyịn ikpekemeke ndinam se enye akanamde. Edi nte ikade iso iwụt esịtekọm iban̄a mfọnido Jehovah oro owo mîdotke, inyụn̄ inịm ke edisana spirit esie ọyọsọn̄ọ nnyịn idem, enye ekeme ndida nnyịn nnam n̄kpọ ekededi oro nnyịn mîkpekereke ke ikpekeme ndinam, kpa nte emi enye akadade Hosea anam.—Matt. 19:26; Phil. 2:13.