Nọ Mme Owo N̄kani Magazine
Nnyịn ikpenyene ndida n̄kani magazine n̄wọrọ an̄wautom koro mmọ inyeneke ufọn edieke ẹbonde mmọ ke itie ubonn̄wed m̀mê nditomo mmọ nduọn̄ọ. Akani magazine kiet ekeme ndinam owo oyom ndidiọn̄ọ akpanikọ nnyụn̄ ntọn̄ọ ndikot enyịn̄ Jehovah. (Rome 10:13, 14) Se ndusụk ebiet ye ini oro ẹkemede ndinọ n̄kani magazine mi.
Ke ini anamde utom ke efakutom oro owo mîsiwakke ndikwọrọ ikọ, emekeme ndinịm magazine kiet ke ufọk oro owo mîdụhe, ke ebiet emi mbon oro ẹsan̄ade ẹbe mîdikemeke ndikụt.
Ke ini ọnọde ikọ ntiense an̄wan̄wa, utọ nte ke itie udụk moto m̀mê tren, bụp mme owo m̀mê mmọ ẹkpema ndikot n̄wed, wụt mmọ nsio nsio n̄kani magazine, nyụn̄ yak mmọ ẹmek enye oro mmọ ẹdimade ndikot.
Ke ini akade itie uyetọfọn̄, itie emi ẹsede ẹban̄a n̄kani owo ye mbon n̄kpọnnam, ufọkibọk, m̀mê mme utọ itie ntre ke efakutom mbufo, nịm n̄kani magazine ifan̄ ke ebiet oro mme owo ẹsitiede. Edieke owo oro esede aban̄a itie oro odude, ọfọn ndibem iso ndọhọ enye ke iyenim mme magazine do. Edi edieke akade okokụt mme magazine nnyịn do, kûnịm mme magazine en̄wen.
Ke ini etịmde idem man aka mfiakn̄ka, kere ban̄a se owo oro oyomde ndika n̄kese edimade. Ndi enye enyene ubon? Ndi enye edi owo emi amade ndika isan̄? Ndi enye esima nditọ n̄kpọ ke mben ufọk esie? Fiak se n̄kani magazine m̀mê oyokụt ibuotikọ emi owo oro edimade ndikot, nyụn̄ nọ enye ke ini afiakde aka.
Edieke esifiakde aka ebịne owo oro ekenyenede udọn̄ ediwak ini edi ukwe enye, wụt enye ndusụk n̄kani magazine oro enye mîkọbọhọ ini ekededi oro okụtde enye.