Da Mme Prọfet Nte Uwụtn̄kpọ—Zephaniah
1. N̄kpọ eketie didie ke ini Zephaniah ekedide prọfet, ndien didie ke enye ekenịm eti uwụtn̄kpọ ọnọ nnyịn?
1 Ke n̄kpọ nte isua 2,650 emi ẹkebede, mme owo ẹma ẹsituak ibuot ẹnọ Baal ke eferife ke Judah. Ibịghike ẹkewot idiọk Edidem Amon, ndien idahaemi ekpri Edidem Josiah edida ubọn̄. (2 Chron. 33:21–34:1) Ini oro ke Jehovah ekemek Zephaniah ete atan̄a etop ubiomikpe Imọ. Okposụkedi emi etiede nte Zephaniah okoto ufọk ubọn̄ Judah, enye ikedehedei isiak mmọn̄ ke etop ubiomikpe oro Jehovah ọkọnọde enye ete akatan̄a ọnọ mbọn̄ Judah. (Zeph. 1:1; 3:1-4) Kpasụk ntre, imesidomo ndikpebe uko Zephaniah inyụn̄ iyakke iman nnyịn ẹbiere nte ikpatuakde ibuot inọ Jehovah. (Matt. 10:34-37) Nso etop ke Zephaniah akatan̄a, ndien nso ikedi utịp?
2. Nso ke inyene ndinam man ẹnyan̄a nnyịn ke usen iyatesịt Jehovah?
2 Ẹyom Jehovah: Jehovah kpọt ekeme ndinyan̄a owo ke usen iyatesịt esie. Oro akanam Zephaniah akpak mbon Judah ete ẹyom Jehovah, ẹyom edinen ido, ẹnyụn̄ ẹyom sụn̄sụn̄ ido ke adan̄aemi ini okosụk odude. (Zeph. 2:2, 3) Oyom nnyịn n̄ko inam kpa ntre mfịn. Ukem nte Zephaniah, nnyịn imesịn udọn̄ inọ mme owo ite ẹyom Jehovah. Edi oyom nnyịn n̄ko iyom Jehovah, inyụn̄ ibiere ke tutu amama nnyịn ‘idifiakke edem itre nditiene enye.’ (Zeph. 1:6) Utu ke oro, nnyịn iwụt ke imoyom Jehovah ke nditịn̄ enyịn n̄kpep Ikọ Abasi nnyụn̄ mbọn̄ akam mben̄e ndausụn̄ esie. Nnyịn ndiyom edinen ido ọwọrọ ndidu edisana uwem. Nnyịn iyom sụn̄sụn̄ ido ke ndisụhọde idem nnyụn̄ nsọsọp ntiene ndausụn̄ oro esop Jehovah ọnọde nnyịn.
3. Ntak emi ikpakade iso inam utom ukwọrọikọ ye idatesịt?
3 Nti Utịp: Etop ubiereikpe oro Zephaniah akatan̄ade ama anam ndusụk mbon Judah ẹkpụhọde usụn̄uwem mmọ, edi etie nte etop oro ama enen̄ede an̄wam Josiah emi ọkọtọn̄ọde ndiyom Jehovah toto ke uyen. Nte ini akakade, Josiah ama anam ẹtre ukpono ndem ke Judah. (2 Chron. 34:2-5) Mfịn, okposụkedi emi ndusụk n̄kpasịp Obio Ubọn̄ ẹsiduọn̄ọde ke mbenusụn̄, isọn̄ itiat m̀mê ke otu n̄kukịm, ndusụk n̄ko ẹsiduọn̄ọ ke eti isọn̄ ẹnyụn̄ ẹn̄wụm ekese mfri. (Matt. 13:18-23) Imọfiọk ke Jehovah ayaka iso ọdiọn̄ utom nnyịn nte isịnde idem isuan n̄kpasịp Obio Ubọn̄.—Ps. 126:6.
4. Ntak emi ikpakade iso ‘ibet Jehovah’?
4 Ndusụk mbon Judah ẹkekere ke Jehovah idinamke mmimọ n̄kpọ. Edi, Jehovah ama owụt ke akwa usen imọ emekpere. (Zeph. 1:12, 14) Mbon oro ẹdade Jehovah nte ebiet ubọhọ kpọt ke ẹdinyan̄a. (Zeph. 3:12, 17) Nte ikade iso ‘ndibet Jehovah,’ nnyịn ikpakam ikop idatesịt ke ndidiana kiet ye ekemmọ nditọete nnyịn nnam n̄kpọ nnọ akwa Abasi nnyịn!—Zeph. 3:8, 9.