Nịm Ukpepn̄kpọ Bible Emi Enyenede Ufọn
1. Nso ke ana asuanetop kiet kiet emi ekpepde owo Bible anam?
1 Owo ndomokiet ikemeke ndinam n̄kpọ Jehovah ibọhọke Jehovah “odụri enye.” (John 6:44) Edi kpa ye oro, ana asuanetop kiet kiet anam se enye ekekeme man an̄wam mme owo ẹkpere Ete nnyịn eke heaven. (Jas. 4:8) Emi oyom ntịmidem. Idịghe ndikot ikpehe ekikere nnyụn̄ mbụp mbụme kpọt edinamde eyen ukpepn̄kpọ nnyịn ọfiọk se ikpepde enye onyụn̄ akabade edi asan̄autom Jehovah.
2. Man ukpepn̄kpọ Bible enyene ufọn, nso ke ana asuanetop anam?
2 Man asuanetop enịm ukpepn̄kpọ Bible emi enyene ufọn, ana enye an̄wam eyen ukpepn̄kpọ esie (1) ọfiọk se Bible ekpepde, (2) enyịme se Bible ekpepde, (3) anam se Bible ekpepde. (John 3:16; 17:3; Jas. 2:26) Ekeme ndida ediwak ọfiọn̄ ndin̄wam owo anam n̄kpọ ita emi ẹsiakde mi. Edi fiọk ete ke n̄kpọ ita emi edinam enye enen̄ede ekpere Jehovah onyụn̄ ayak idem ọnọ enye.
3. Ntak emi mbon emi ẹsikpepde owo n̄kpọ ọfọn ẹsibụpde mbụme oro edinamde owo etịn̄ se isịnede enye ke esịt?
3 Nso ke Eyen Ukpepn̄kpo Ekere?: Edieke oyomde ndifiọk m̀mê se ekpepde eyen ukpepn̄kpọ an̄wan̄a enye, m̀mê enye onyụn̄ enyịme se enye ekpepde, kûsuda kpukpru ikọ utịn̄, edi sinam enye etịn̄ ikọ. (Jas. 1:19) Ndi enye ọfiọk se Bible etịn̄de aban̄a se ẹnemede? Ndi enye ekeme nditịn̄ se ẹnemede ke ikọ idemesie? Enye ese didie se enye ekpepde? Ndi enye enyịme ke se Bible ekpepde esịne ifiọk? (1 Thess. 2:13) Ndi enye ọfiọk ke ana imọ inam se ikpepde? (Col. 3:10) Man ikeme ndifiọk ibọrọ mbụme emi, oyom ida mbufiọk ibụp enye mbụme emi edinamde enye etịn̄ se isịnede enye ke esịt. Ndien oyom ikpan̄ utọn̄ ke ini enye etịn̄de ikọ.—Matt. 16:13-16.
4. Edieke ọsọn̄de owo emi ikpepde n̄kpọ ndifiọk m̀mê ndinam se enye ekpepde, nso ke ikpanam?
4 Edu ye se owo ekerede ẹkeme ndinen̄ede ndọn̄ n̄kan ke idem owo, ndien esida ini nditre mmọ. (2 Cor. 10:5) Edieke owo emi ikpepde n̄kpọ mînyịmeke se ikpepde m̀mê mînamke se enye ekpepde, nso ke ikpanam? Oyom inyene ime man Ikọ Abasi ye edisana spirit anam utom ke esịt esie. (1 Cor. 3:6, 7; Heb. 4:12) Edieke ọsọn̄de enye ndifiọk m̀mê ndinam se Bible etịn̄de, ifọnke ndinyenyịk enye. Edi ka iso kpep enye n̄kpọ. Enye ekeme ndikpụhọde edieke inyenede ime inyụn̄ iwụtde ke imama enye.