Mbufa Ikwọ Ndida Ntoro Abasi!
1 Ke mbono ofụri isua Watch Tower Bible and Tract Society of Pennsylvania, oro ẹkenịmde ke October 4, 2014, ẹma ẹdọhọ ke ẹyekpụhọ mme n̄kpọ ke n̄wedikwọ nnyịn. Mme owo ẹma ẹnen̄ede ẹnem esịt. Ẹma ẹti kpukpru owo ẹte ẹda ikwọ Obio Ubọn̄ ke akpan n̄kpọ ke ini ikponode Abasi.—Ps. 96:2.
2 Afo emekeme ndibụp ete: ‘Ntak emi ẹyomde ndifiak n̄kpụhọ n̄kpọ ke n̄wedikwọ nnyịn?’ Yak itịn̄ ntak ifan̄. Akpa, ke ẹka iso ẹnam N̄wed Abasi enen̄ede an̄wan̄a nnyịn, ndien emi anam iyom ndikpụhọ ndusụk ikọ ke n̄wedikwọ nnyịn. (N̄ke 4:18) Ọyọhọ iba, ke ediwak usem, ẹkeda mme ikọ ke akani Edikabade Eke Obufa Ererimbot ẹwet ikwọ n̄wedikwọ emi ikamade idahaemi. Ntem, ana ẹkpụhọ mme ikọ emi man asan̄a ukem ye mme ikọ emi ẹdude ke Edikabade Eke Obufa Ererimbot emi ikamade idahaemi. Sia ediyomde ẹnam akamba utom ke n̄wedikwọ man ẹkeme ndinam se itịn̄de emi, ẹma ẹdọhọ yak ẹda ifet oro ẹdian mbufa ikwọ ifan̄.
3 Ndi ana ibet tutu ẹmịn̄ obufa n̄wedikwọ mbemiso itọn̄ọde ndikwọ mbufa ikwọ emi? Baba. Enem nnyịn ndinam mbufo ẹfiọk ke ẹmọn̄ ẹdọn̄ mbufa ikwọ emi ke jw.org ke ọfiọn̄ ifan̄ oro ẹditienede. Ke ini ẹsiode obufa ikwọ, ẹyesịn enye nte akpatre ikwọ ke Esoputom, ẹyenyụn̄ ẹwet n̄kpọ ndiwụt ke edi obufa ikwọ.
4 Nte Ikpekpepde Mbufa Ikwọ Emi: Isimemke utom ndikpep obufa ikwọ. Edi ukem nte andiwet psalm, yak isimenede uyo ikwọ ikwọ ke mbono esop utu ke ‘ndidop uyo.’ (Ps. 30:12) Edieke oyomde ndikpep obufa ikwọ emi, nam se itienede mi.
Ẹyesịn ikwọ oro ke jw.org; kpan̄ utọn̄ ediwak ini kop nte ẹkwọde. Edieke okopde nte ẹkwọde ikwọ emi ediwak ini, eyemehe fi.
Kpep ndimụm ikwọ emi ndọn̄ ke ibuot.
Bre nyụn̄ kwọ ikwọ emi ediwak ini tutu enye ẹmehe fi.
Ẹkwọ enye ediwak ini ke ini utuakibuot ubon tutu ikwọ emi emehe kpukpru owo.
5 Ke ini ẹsịnde obufa ikwọ nte akpatre ikwọ ke Esoputom, ẹyebre enye ini kiet kan̄a man esop ẹkop nte ẹkwọde. Ekem, ẹyefiak ẹbre man kpukpru owo ẹtiene ẹkwọ, kpa nte isinamde ye mme ikwọ eken.
6 Ikwọ esinam kpukpru nnyịn ikeme ndidian uyo ntoro Jehovah ke mbono esop. Ke ntre, ifọnke nnyin ndiwọrọ ini ekededi oro ẹyomde ndikwọ ikwọ ke mbono esop.
7 Enyene usụn̄ en̄wen emi ikemede ndiwụt ke imenen̄ede ima ikwọ emi ikwọde inọ Abasi. Ke n̄kpri ye ikpọ mbono nnyịn, ẹsibre ikwọ mbemiso ẹtọn̄ọde mbono usenubọk ye eke uwemeyo. Nditọete nnyịn irenowo ye iban ẹsito nsio nsio itie ke ofụri ererimbot ẹka Patterson ke New York ikaba ke isua man ẹkebre ẹnyụn̄ ẹkwọ ikwọ emi isikwọde itoro Jehovah. Ntre ke ini etieibuot okpokoro ikpehe edinam ọdọhọde nnyịn isụhọde itie inyụn̄ ikpan̄ utọn̄ ikop mme ikwọ oro, nnyịn ikpenyene ndinam ntre. Emi ayanam itịm esịt nnyịn man ikop se ẹdinemede.—Ezra 7:10.
8 Akpatre ikwọ emi idikwọde ke mbono esop mfịn edidi obufa ikwọ emi, “Obio Ubọn̄ Abasi ke Edi—Yak Edi!” Ikwọ emi ke ẹkekwọ ke mbono ofuri isua emi osụk ebede, ndien ẹkewet enye man ẹda ẹti ke isua 100 edi emi tọn̄ọ Obio Ubọn̄ Abasi ọkọtọn̄ọ ndikara ke heaven.
9 Mbufa ikwọ emi ẹsịne ke otu “nti n̄kpọ” emi Jehovah ọnọde nnyịn. (Matt. 12:35a) Ẹyak nnyịn isịn ofụri ukeme ikpep mbufa ikwọ emi inyụn̄ ikwọ mmọ ke ofụri esịt, sia emi ayanam inọ Jehovah Abasi nnyịn itoro ye ukpono emi enyenede enye.—Ps. 147:1.