N̄kpọutom Nnyịn
1. Ntak emi ikemede ndidọhọ ke mbon emi ẹkwọrọde eti mbụk ẹnyụn̄ ẹtie nte mme kapenta?
1 Mme kapenta ẹnyene n̄kpọutom ke utọ ke utọ. Odu ndusụk n̄kpọutom emi enyenede-nyene ini emi ẹsidade mmọ ẹnam utom, onyụn̄ odu mbon emi mmọ ẹsikamade kpukpru usen. Mme kapenta emi ẹnen̄erede ẹdiọn̄ọ utom ẹsinyene n̄kpọutom emi mmọ ẹsikamade kpukpru usen, ndien mmọ ẹsinen̄ede ẹdiọn̄ọ ndida mme n̄kpọutom emi nnam utom asian asian. Bible ọdọhọ nnyịn owo kiet kiet isịn idem ikwọrọ ikọ inyụn̄ idi mme “anamutom emi mînyeneke ntak ndikop bụt.” (2 Tim. 2:15) Nso idi ata akpan n̄kpọutom nnyịn? Bible edi ata akpan n̄kpọutom emi isikamade ‘inam mme owo ẹkabade ẹdi mbet.’ (Matt. 28:19, 20) Ntre, ọfọn isin idem ikpep Ikọ Abasi man inen̄ede idiọn̄ọ ndida enye n̄kpep mme owo n̄kpọ. Imenyene mme n̄kpọutom en̄wen emi isiwakde ndida n̄kpep mme owo n̄kpọ n̄ko, ndien ana kpukpru nnyịn inen̄ede idiọn̄ọ ndida mmọ n̄kpep mme owo akpanikọ.—N̄ke 22:29.
2. Siak nsio nsio n̄kpọutom emi isiwakde ndida n̄kpep mme owo n̄kpọ.
2 N̄kpọutom Emi Isiwakde Ndida N̄kpep Mme Owo N̄kpọ: Ke ẹsiode Bible ẹfep, mme n̄kpọutom ewe ke ikpesida ikpep mme owo n̄kpọ? Akpan n̄kpọutom emi isidade ikpep mme owo n̄kpọ edi Nso ke Bible Enen̄ede Ekpep? Ke ima ikekpep eyen ukpepn̄kpọ nnyịn n̄wed emi ikụre, imesida “Ẹnịm Idem Mbufo ke Ima Abasi” ikpep enye ndisinam se enye ekpepde ke Bible. Ntre ọfọn inen̄ede idiọn̄ọ ndida n̄wed mbiba emi n̄kpep mme owo n̄kpọ. Enyene ndiye n̄kpri n̄wed oro ikpesịnde ke otu n̄kpọutom nnyịn n̄ko. Kiet ke otu ndiye n̄kpri n̄wed emi isidade itọn̄ọ ndikpep mme owo Bible edi, Eti Mbụk Emi Otode Abasi! Imekeme n̄ko ndida Kpan̄ Utọn̄ Nọ Abasi, mîdịghe Kpan̄ Utọn̄ Nọ Abasi Nyụn̄ Du Uwem ke Nsinsi n̄kpep n̄kpọ ye mbon emi mîkemeke ndikot n̄wed ọfọn. Imonyụn̄ ikeme ndida mmọ n̄kpep n̄kpọ ye mbon emi n̄wed nnyịn mîwakke m̀mê mîdụhe-du ke usem mmọ. N̄kpọutom emi isidade inam nditọ ukpepn̄kpọ nnyịn ẹmehe ye esop Abasi edi Mmanie Ẹnam Uduak Jehovah Mfịn? N̄kpọutom en̄wen emi oyomde inen̄ede ikpep nte ikpadade mmọ inam mme owo ẹdi mbet edi mme vidio, utọ nte Ntak Emi Ekpekpepde Bible?, Nso ke Ẹsinam ke Ufọkmbono Obio Ubọn̄?, ye Abasi Ekere Didie?
3. Nso ke Utom Obio Ubọn̄ Nnyịn edisin̄wam nnyịn inam?
3 Utom Obio Ubọn̄ Nnyịn eyesin̄wam nnyịn inen̄ede idiọn̄ọ ndida nsio nsio n̄kpọutom nnyịn n̄kpep mme owo n̄kpọ. Edieke isịnde idem ida nsio nsio n̄kpọutom nnyịn inam utom ọfọn, emi oyowụt ke imanam ikọ Abasi emi: “Kpeme idemfo kpukpru ini nyụn̄ kpeme se afo ekpepde owo. Sọn̄ọ yịre ke mme n̄kpọ emi, koro ke ndinam emi afo ayanyan̄a idemfo ye mmọ emi ẹkopde uyo fo.”—1 Tim. 4:16.