Mme N̄kpọ Emi Mûkpanamke ke Ini Ekpepde Owo N̄kpọ

Kûtịn̄ Ikọ Awawak Akaha: Kûkere ke ana afo etịn̄ kpukpru n̄kpọ ọnọ owo emi ekpepde Bible. Jesus ama esida mbụme an̄wam mme owo ẹkere n̄kpọ ẹnyụn̄ ẹdiọn̄ọ ndusụk n̄kpọ ke idemmọ. (Mt 17:24-27) Mbụme esinam ukpepn̄kpọ enem onyụn̄ anam ọdiọn̄ọ se eyen ukpepn̄kpọ fo ọdiọn̄ọde ye se enye enịmde ke akpanikọ. (be 253 ¶3-4) Ke ini obụpde owo mbụme, nyene ime bet enye ọbọrọ. Edieke ibọrọ esie mînenke, bụp enye mme mbụme efen man an̄wam enye ọdiọn̄ọ nnennen ibọrọ utu ke ndibọrọ mbụme oro nnọ enye. (be 238 ¶1-2) Tịn̄ ikọ sụn̄sụn̄ man eyen ukpepn̄kpọ fo ọdiọn̄ọ mbufa n̄kpọ emi ekpepde enye.—be 230 ¶4.

Kûnam Awak N̄kukọhọ: Kûtịn̄ kpukpru se ọdiọn̄ọde aban̄a n̄kpọ emi ẹkpepde. (Joh 16:12) Tịn̄ mme akpan n̄kpọ kpọt. (be 226 ¶4–227 ¶1) Edieke edide itịn̄ emi itịn̄ oko, ọkpọkọm se itịn̄de enen, owo emi ikpepde n̄kpọ idisọpke ikụt mme akpan n̄kpọ. (be 235 ¶3) Akpan n̄kpọ emi ikpepde ama an̄wan̄wan̄a eyen ukpepn̄kpọ, ọyọfọn ibe ika ikpehe efen.

Kûyak Ukpepn̄kpọ Oro Etie Enyọn̄ Enyọn̄: Nnyịn iyom se ikpepde odụk owo esịt, idịghe ndikot n̄wed mbọrọ mbụme kpọt. (Lu 24:32) Kot mme akpan itie Bible emi ẹdude ke ukpepn̄kpọ oro man anam eyen ukpepn̄kpọ fo ọfiọk nte Ikọ Abasi enyenede odudu. (2Co 10:4; Heb 4:12; be 144 ¶1-3) Nọ mme uwụtn̄kpọ oro an̄wan̄ade owo. (be 245 ¶2-4) Kere ban̄a nte n̄kpọ etiede ye eyen ukpepn̄kpọ fo ye se enye enịmde ke akpanikọ nyụn̄ nam enye okụt nte se enye ekpepde oro ebehede enye. Bụp utọ mbụme nte: “Nso ke afo ekere aban̄a se osụk ekpepde emi?” “Nso ke emi ekpep nnyịn aban̄a Jehovah?” “Didie ke se ekpepde emi ekeme ndin̄wam fi?”—be 238 ¶3-5; 259 ¶1.