Abasi Ọyọdiọn̄ Mbon Emi Ẹnamde Se Enye Ọdọhọde

Prọfet Moses ọkọdọhọ ke edieke inamde se Abasi ọdọhọde, ke Abasi ọyọdiọn̄ nnyịn. (Deuteronomy 10:13; 11:27) Ima oro imade Abasi esinam ikop uyo esie, idịghe man enye idinọ nnyịn ufen. Nti edu esie anam ima enye, nnyịn inyụn̄ iyomke ndiyat enye esịt. Bible ọdọhọ ete: “Ndima Abasi ọwọrọ ete nnyịn inịm mme ewụhọ esie.”—1 John 5:3.

Edi didie ke Abasi esidiọn̄ nnyịn ke ini ikopde uyo esie? Yak ineme usụn̄ iba emi enye esinamde oro.

1. NDIKOP UYO ABASI AYANAM INYENE IFIỌK

“Ami Jehovah, ndi Abasi fo, Enye emi ekpepde fi man afo ọbọ ufọn, Enye emi anamde fi asan̄a ke usụn̄ emi afo akpasan̄ade.”—ISAIAH 48:17.

Jehovah Abasi emi okobotde nnyịn enen̄ede ọdiọn̄ọ nnyịn, esinyụn̄ ọnọ nnyịn nti item emi ẹkemede ndin̄wam nnyịn. Edieke iyomde enye an̄wam nnyịn ifiọk ndisibiere n̄kpọ ọfọn, ana isikpep Bible inyụn̄ inanam se ikpepde.

2. NDIKOP UYO ABASI AYANAM ESỊT ENEM NNYỊN

“Mbon oro ẹkopde ikọ Abasi ẹnyụn̄ ẹnamde enye ẹkop inemesịt!” —LUKE 11:28.

Ata ediwak owo mfịn ẹkop inemesịt ke ntak emi mmọ ẹkopde uyo Abasi. Ke uwụtn̄kpọ, ete kiet ke Spain ama esisọp iyatesịt etieti, esinyụn̄ etịn̄ ikọ uyat uyat ye mme owo, esịnede n̄wan esie. Usen kiet enye ama okot se prọfet Moses ekewetde aban̄a Joseph eyen Jacob. Ẹma ẹnyam Joseph nte ofụn ẹnyụn̄ ẹsịn enye ke ufọk-n̄kpọkọbi ke ini enye mîkeduehe n̄kpọ ndomokiet, edi Joseph ama omụm idem akama, anam n̄kpọ emem emem, onyụn̄ efen ọnọ nditọete esie. (Genesis, ibuot 37-45) Ete oro ọdọhọ ete: “Uwụtn̄kpọ Joseph ama anam ntọn̄ọ ndisinam n̄kpọ emem emem, mfọn ido ye mme owo, nsinyụn̄ mmụm idem n̄kama ke ini n̄kpọ etịbede. Emi anam nnen̄ede n̄kop inemesịt.”

Bible etịn̄ nte ikpanamde n̄kpọ ye mme owo. Iyeneme emi ke ibuotikọ oro etienede.