Emekeme Ndin̄wam Owo Emi Ama Eketre Ndinam N̄kpọ Abasi

Kpukpru isua, ediwak mbon oro ẹma ẹketre ndinam n̄kpọ Jehovah ẹsitiene ẹdụk Editi. Mmọ ẹma ẹsitiene nnyịn ẹsan̄a ke usụn̄ emi adade esịm nsinsi uwem, edi ẹma ẹtre nte ini akakade. Ẹtịn̄ ẹban̄a nsio nsio n̄kpọ oro ẹsinamde mme owo ẹtre ndinam n̄kpọ Jehovah ke ediye ekpri n̄wed oro Fiak Tiene Jehovah. (Heb 12:⁠1) Edi Jehovah osụk amama mmọ sia enye akada ọsọn̄urua iyịp Eyen esie edep mmọ. (Ut 20:28; 1Pe 1:​18, 19) Didie ke ikeme ndin̄wam mmọ ẹfiak ẹtọn̄ọ ndinam n̄kpọ Jehovah?

Mbiowo ẹsisịn idem ẹyom mbon oro ẹma ẹketre ndinam n̄kpọ Jehovah kpa nte ekpemerọn̄ esisịnde idem oyom erọn̄ esie emi osopde. (Lu 15:​4-7) Emi owụt nte Jehovah amade mme erọn̄ esie. (Jer 23:​3, 4) Idịghe mbiowo kpọt ẹdin̄wam mbon oro ẹma ẹketre ndinam n̄kpọ Jehovah, kpukpru nnyịn imekeme nditiene n̄n̄wam mmọ. Edieke ikerede iban̄a mmọ inyụn̄ ifọnde ido ye mmọ, Jehovah oyokop inemesịt, ndien mmọ ẹkeme ndifiak ntọn̄ọ ndinam n̄kpọ Jehovah. (N̄ke 19:17; Ut 20:35) Ntre, kere ban̄a owo emi afo ekemede ndin̄wam nyụn̄ sọsọp tọn̄ọ ndin̄wam enye!

ẸSE VIDIO ORO ẸSỊN UDỌN̄ ẸNỌ MBON ORO MÎNAMKE UTOM ABA, EKEM ẸBỌRỌ MME MBỤME EMI:

• Nso ke Abbey akanam ke ini enye okụtde owo emi enye mîkọdiọn̄ọke ke edi Ntiense Jehovah?

• Ke ini ikụtde owo emi ama eketre ndinam n̄kpọ Jehovah, ntak emi ikpanamde mbiowo ẹdiọn̄ọ?

• Nso ke Abbey akanam ke ini enye okoyomde ndifiak n̄kese Laura?

• Didie ke Abbey ekenyene ime onyụn̄ owụt ke imama Laura ke ini enye okodomode ndin̄wam Laura?

• Nso ke ikeme ndikpep nto uwụtn̄kpọ oro Jesus ọkọnọde ke Luke 15:​8-10?

• Nso iketịbe ke ini kpukpru owo ẹkediande ubọk ẹn̄wam Laura?