NTE CHRISTIAN OKPODUDE UWEM
Du Uwem Nte Jehovah Etemede
Jehovah eteme nnyịn nte ikpodude uwem. Ke uwụtn̄kpọ, enye ọdọhọ ke ana ebe ye n̄wan ẹdiana kiet ke nsinsi. (Mt 19:4-6, 9) Jehovah asasua oburobụt idan̄. (1Co 6:9, 10) Enye etịn̄ nte ikpesịnede ọfọn̄ inyụn̄ ikamade idem ke usun̄ emi edinamde nnyịn ikûbiet mbon ererimbot.—De 22:5; 1Ti 2:9, 10.
Ata ediwak owo ke ererimbot emi imaha ndidu uwem nte Jehovah etemede. (Ro 1:18-32) Mmọ ẹsima nditiene nnam se ededi emi ọwọrọde edi, edide ke usịnen̄kpọ, ukamaidem, nte ẹnamde n̄kpọ, ye nte ẹtịn̄de ikọ. Mmọ isidịpke-dịp oburobụt edinam mmọ, ẹsinyụn̄ ẹsua mbon emi mîdụhe uwem nte mmọ.—1Pe 4:3, 4.
Sia nnyịn idide Mme Ntiense Jehovah, ikpanaha iyak bụt m̀mê ndịk anam nnyịn ida ibet Jehovah inam mbubru. (Ro 12:9) Nso ndien ke ikpanam? Ana ida mbụfiọk inam mme owo ẹfiọk se Jehovah amade. Edi ana nnyịn n̄ko idu uwem nte Jehovah etemede. Ke uwụtn̄kpọ, ke ini iyomde ndikịm m̀mê ndidep ọfọn̄, m̀mê ke ini ikerede iban̄a nte ikpakamade idem, ọyọfọn ibụp idem nnyịn ite: ‘Ndi Jehovah ama se ami mmade emi m̀mê ererimbot ẹkam ẹma? Ndi se nsịnede ye nte n̄kamade idem ekeme ndinam owo ọsọsọp ọdiọn̄ọ ke ndi Ntiense Jehovah?’ Mîdịghe ke ini iyomde ndise fim m̀mê mme edinam TV eken, imekeme ndibụp idem nnyịn ite: ‘Ndi Jehovah ama se nyomde ndise emi? Ndi emi edikpep mi ndidu uwem nte Abasi amade m̀mê nte ererimbot ẹmade? Ndi se mmekde ndida nnem idem esịt ayanam n̄kûda aba idiọkn̄kpọ nte n̄kesidade? (Ps 101:3) Ndi emi ayanam mbon en̄wen ẹtuak ukot ẹduọ?’—1Co 10:31-33.
Ntak emi ọfọnde idu uwem nte Jehovah etemede? Ibịghike, Christ Jesus oyosobo ndiọi owo, ndien oburobụt ido ididụhe aba. (Eze 9:4-7) Mbon emi ẹnamde uduak Abasi kpọt ẹdisụhọ. (1Jo 2:15-17) Ntem, yak idomo ofụri ukeme nnyịn ndidu uwem nte Jehovah etemede man mbon en̄wen ẹkpekụt nti edu nnyịn ẹnyụn̄ ẹnọ Abasi ubọn̄.—1Pe 2:11, 12.
Nte nsisịnede ọfọn̄ ye nte nsikamade idem ẹsinam mme owo ẹkere nso ẹban̄a mi?
ẸSE VIDIO EMI, DI UFAN JEHOVAH—N̄WAN KIET, EBE KIET, EKEM ẸBỌRỌ MME MBỤME EMI:
Ntak emi ọfọnde idu uwem nte Jehovah etemede?
Ntak emi akpanade mme ete ye eka ẹtọn̄ọ ke nsek ẹkpep nditọ mmọ nte Jehovah oyomde nnyịn idu uwem?
Didie ke kpukpru nnyịn ikeme ndin̄wam mbon en̄wen man mmọ ẹkpetiene ẹdụk Obio Ubọn̄ Abasi?