Didie ke Ekpeben̄e Idem Ọnọ Editi?

Ọtọn̄ọde ke isua emi, iyenyene ini ndiben̄e idem nnọ Editi n̄kpa Christ ikan nte ikesinyenede. Edieke Editi ọduọde usen ekededi ọtọn̄ọde ke Monday esịm Friday, owo idinịmke Mbono Esop Uwem ye Utom Nnyịn urua oro. Edieke ọduọde ke Saturday m̀mê Sunday, utịn̄ikọ ofụri owo ye Ukpepn̄kpọ Enyọn̄-Ukpeme ididụhe urua oro. Ndi ayada ini emi anam akpan n̄kpọ? Esiyom itịm itie ye mme n̄kpọ emi ẹdidade inịm Editi, kpa nte ẹkesinamde ke eyo mme apostle. (Lu 22:7-13; km 3/15 1) Edi enyene mme n̄kpọ en̄wen emi ikpanamde man inen̄ede idia ufọn Editi emi. Nso ye nso ke ikpanam?

• Tie kere ntak emi ọfọnde etiene odụk Editi.—1Co 11:23-26

• Bọn̄ akam nyụn̄ kere m̀mê emenen̄ede ekpere Jehovah.—1Co 11:27-29; 2Co 13:5

• Kot nyụn̄ tie kere se ẹwetde ẹban̄a mme itie N̄wed Abasi oro ẹtịn̄de n̄kpọ ẹban̄a n̄kpa Christ.—Joh 3:16; 15:13

Ndusụk mme asuanetop ẹsikot ẹnyụn̄ ẹtie ẹkere mme itie Bible oro ẹsidọhọde ẹkot ke ini Editi, emi odude ke Ẹdụn̄ọde N̄wed Abasi ke Usen ke Usen. Ndusụk mmọ ẹsikot mme itie Bible oro ẹdude ke idak emi. Mbon en̄wen ẹsifiak ẹkot mme Enyọn̄-Ukpeme oro ẹtịn̄de n̄kpọ ẹban̄a Editi ye mbon oro ẹwụtde nte Jehovah ye Jesus ẹmade nnyịn. Emekeme ndinam ekededi ke otu emi. Akam nnyịn edi yak se afo ekpepde anam fi enen̄ede ekpere Jehovah ye Eyen esie.