Nte Akpadade Tract Ọtọn̄ọ Nneme

Ọtọn̄ọde ke January 2018, ẹsiwet se ikemede nditịn̄ ke an̄wautom ke edem N̄wed Mbono Esop Uwem ye Utom Nnyịn. Ẹdọhọ nnyịn isineme nneme ye mme owo utu ke ndinọ mmọ n̄wed ndaha. Imenyene mme vidio emi ẹwụtde nte ikpadade Bible kpọt ineme ikọ Abasi ye mme owo. Edi, ndi emi ọwọrọ ke nnyịn ikpọnọhọ owo n̄wed ke ini ikwọrọde ikọ ke ufọk ke ufọk? Iwọrọke ntre! Ke uwụtn̄kpọ, imekeme ndida tract ntọn̄ọ nneme ye mme owo. Imekeme ndinam se itienede emi ke ini iyomde ndinọ ekededi ke otu mme tract nnyịn:

1. Bụp mbụme emi odude ke edem tract oro.

2. Wụt enyeneufọk nte Bible ọbọrọde mbụme oro ke itie N̄wed Abasi emi odude ke enyọn̄ ọyọhọ page iba ke tract oro. Edieke ini odude, kot nyụn̄ neme n̄kpọ en̄wen ke esịt tract oro.

3. Kpọn̄ tract oro nọ enyeneufọk nyụn̄ dọhọ enye okot se isụhọde ke ini enye enyenede ini.

4. Mbemiso ọnyọn̄de, wụt enye mbụme oro odude ke “Kere Ise,” nyụn̄ dọhọ enye ke iyafiak idi man idida Bible ibọrọ mbụme oro.

Ke ini afiakde aka, bọrọ mbụme oro nyụn̄ bụp mbụme en̄wen oro edibọrọde ini en̄wen. Emekeme ndibụp kiet ke otu mbụme emi odude ke ikpehe Intanet nnyịn mîdịghe obụp mbụme emi odude ke n̄wed oro ẹsiakde ke edem tract oro. Edieke odotde, nọ owo oro ediye ekpri n̄wed oro Eti Mbụk Emi Otode Abasi! m̀mê n̄wed en̄wen emi esịnede ke otu Mme Akpan N̄kpọ Isidade Ikpep Owo Bible.