Ndi Akpama Ndika Ufọkn̄wed Mme Ọkwọrọ Obio Ubọn̄?

Ndi ọmọyọhọ isua 23 unyụn̄ ubehe isua 65? Ndi ke anam utom uyọhọ ini? Ndi idem ọsọn̄ fi? Ndi emekeme ndika n̄kanam utom ke ebiet emi esop Abasi ẹyomde-yom owo? Edieke edide ntre, ndi akpama ndisịn n̄wed n̄ka Ufọkn̄wed Mme Ọkwọrọ Obio Ubọn̄? Tọn̄ọ ẹketọn̄ọ ufọkn̄wed emi, ata ediwak mme ọdọ ndọ, irenowo emi mîdọhọ ndọ, ye iban emi mîdọhọ ndọ ẹka ufọkn̄wed emi. Edi irenowo oro mîdọhọ ndọ ke inen̄ede iyom. Ben̄e Jehovah anam enen̄ede ọdọn̄ fi ndisịn idem nnam utom esie nnyụn̄ n̄kpebe Eyen esie. (Ps 40:8; Mt 20:28; Heb 10:7) Ekem, kere m̀mê odu mme n̄kpọ emi ẹkemede ndikpan fi ndika ufọkn̄wed emi, utọ nte mbiomo ubon, utom emi anamde, m̀mê isọn emi akamade. Edieke edide ntre, ndi odu se akpanamde aban̄a mme n̄kpọ oro man odot ndika ufọkn̄wed emi?

Nso utọ utom ke mbon oro ẹkụrede ufọkn̄wed emi ẹsinam ẹnọ Abasi? Ẹsinọ ndusụk mbon oro ẹkụrede ufọkn̄wed emi ẹka ẹkenam utom Abasi ke mme ebiet emi ẹsemde usem en̄wen, mîdịghe ẹnọ mmọ ẹtiene ẹkekwọrọ ikọ ke ebiet emi mme owo ẹwakde ke ikpọ obio. Nte ini akade, ẹsinọ ndusụk mmọ ẹkese esop ke ini esenyịn circuit mîdụhe, ẹsimek ndusụk mmọ mme esenyịn circuit, ẹnyụn̄ ẹmek ndusụk isụn̄utom. Nte osụk ekerede aban̄a se ekemede ndinam nnọ Jehovah, ọfọn enyene edu prọfet Isaiah emi ọkọdọhọde ete: “Se mi mi! Dọn̄ mi utom.”—Isa 6:8.

ẸSE VIDIO ORO MME ISỤN̄UTOM ẸNEN̄EDE ẸSỊN IDEM ẸKWỌRỌ IKỌ, EKEM ẸBỌRỌ MME MBỤME EMI:

• 

  Didie ke ẹsimek mme isụn̄utom?

• 

  Nso nti utom ke mme isụn̄utom ẹnam?

• 

  Mme edidiọn̄ ewe ke mme isụn̄utom ẹnyene?