Iyenen̄ede Isịn Idem Itọn̄ọ Ndikpep Mme Owo Bible ke September

Ke September, iyenen̄ede isịn idem ida ediye ekpri n̄wed oro Du Ata Uwem ke Nsinsi! idomo nditọn̄ọ ukpepn̄kpọ Bible ye kpukpru owo. Mme asuanetop oro ẹnamde usiakusụn̄ unọ un̄wam ke ọfiọn̄ oro ẹkeme ndinọ hour 30. Idinam didie san̄asan̄a ukwọrọikọ emi?

• Ke Akpa Ini: Da se idude ke edem ediye ekpri n̄wed emi tọn̄ọ nneme ye mme owo nyụn̄ wụt mmọ nte isidade enye ikpep mme owo ikọ Abasi. Kûfre mbon emi ẹkemade ukwọrọikọ nnyịn, esịnede mbon emi ọkọdọhọde ke iyafiak idineme ikọ Abasi ye mmọ. Ọkpọkọm mmọ ikamaha ndikpep n̄kpọ akpa, obufa n̄wed emi ye nte ikpepde mme owo n̄kpọ idahaemi ẹkeme ndinam mmọ ẹma. Edi mbọk kûnịm n̄wed emi ke ufọk owo edieke enyene-ufọk mîdụhe, kûnyụn̄ usịn ke leta unọ ẹsọk owo emi mîdọhọke ke imoyom ndikpep Bible. Kọmiti Utom Esop ẹkeme ndimek mme usen en̄wen emi ẹdisinịmde mbono an̄wautom ke ọfiọn̄ oro.

• Ke Mme Ini En̄wen: Edieke esop mbufo ẹsidade ukpatn̄kpọ ẹkwọrọ ikọ, sịn ediye ekpri n̄wed oro Du Ata Uwem ke Nsinsi! Dọhọ mbon emi ẹyomde ndibọ n̄wed emi ke isida enye ikpep owo Bible. Da do wụt mmọ nte isikpepde owo Bible mîdịghe nịm ini emi edikade ikowụt mmọ. Esenyịn utom ekeme ndimek mme asuanetop emi ẹdotde ete ẹka mme itie mbubehe ke efakutom mmọ ẹkedomo nditọn̄ọ ukpepn̄kpọ Bible ye mme owo. Emekeme n̄ko ndidomo nditọn̄ọ ukpepn̄kpọ ye owo itieutom mbufo m̀mê owo emi ọkwọrọde ikọ ọnọ ini ẹnemede nneme.

Jesus ọkọdọhọ ika ikanam mme owo ẹdi mbet imọ inyụn̄ ikpep mmọ n̄kpọ. (Mt 28:​19, 20) Yak san̄asan̄a ukwọrọikọ emi an̄wam nnyịn ida n̄wed Du Ata Uwem ke Nsinsi! inam ewụhọ Jesus emi.