Ndikekpebe Nti Uwụtn̄kpọ Anam Mbọ Ediwak Edidiọn̄

N̄kamana ke Quebec City ke Canada; ẹsisem French ke n̄kan̄ emi. Ete mi ekekere Louis, eka mi ekere Zélia; mmọ ẹma ẹma mi etieti ẹnyụn̄ ẹfọn ido ye ami. Ete mi ekedi owo o-bụt, ama esinyụn̄ ama ndikot n̄wed. Mma nsima ndiwet n̄kpọ, n̄konyụn̄ nyom ndidi ọkọmbụk n̄kpọntịbe mma n̄kpon owo.

Ini n̄kedide n̄kpọ nte isua 12, Rodolphe Soucy emi ekedide owo itieutom mme ete mi ama asan̄a ye ufan esie edi ufọk nnyịn. Mmọ ẹkedi Mme Ntiense Jehovah. N̄kenen̄ekede mfiọk n̄kpọ mban̄a Mme Ntiense Jehovah, n̄konyụn̄ nnen̄ekede ndọn̄ enyịn ke ido ukpono mmọ. Edi mma mma mbufiọk emi mmọ ẹkenyenede nte mmọ ẹdade Bible ẹbọrọ mme mbụme nnyịn. Ama enem ete ye eka mi n̄ko, ntre ima inyịme ẹdikpep nnyịn Bible.

Ufọkabasi Catholic ẹkenyene ufọkn̄wed sekọndri emi n̄kakade ini oro. Ke ini ke ini, mma nsimen se n̄kpepde ke Bible n̄keneme ye nditọ klas nnyịn. Nte ini akakade, mme titia nnyịn emi ẹkedide mme oku Catholic ẹma ẹkop se nsinamde oro. Utu ke mmọ ndida Bible n̄wụt ke se ntịn̄de inenke, owo mmọ kiet ama ọdọhọ ke iso ofụri klas ke ndi owo nsọn̄ibuot! Kpa ye emi mîkememke inọ mi, se iketịbede oro ama an̄wam mi sia ama anam n̄kụt ke ukpepn̄kpọ ido ukpono emi ẹsikpepde ke ufọkn̄wed nnyịn isịneke ke Bible. Mma n̄kụt ke idịghe se n̄kade n̄wed do aba. Mme ete mi ẹma ẹnyịme n̄wọrọ n̄ka ufọkn̄wed en̄wen.

NTE N̄KASAN̄ADE MMA UKWỌRỌIKỌ

Mma n̄ka iso n̄kpep Bible, edi n̄kenen̄ekede nsịn idem ke n̄kpọ Abasi sia n̄kesifefehe ndikwọrọ ikọ ke ufọk ke ufọk. Ufọkabasi Catholic ama ọsọn̄ odudu etieti ke n̄kan̄ nnyịn, mmọ ẹma ẹnyụn̄ ẹdomo nte ẹkekeme nditre utom ukwọrọikọ nnyịn. Maurice Duplessis, emi ekedide akwa owo ukara ke Quebec akadia ubọk udia kiet ye Ufọkabasi Catholic. Enye ama esiberi mbon ntịme edem yak ẹfịna Mme Ntiense Jehovah uwem, idem ẹkam ẹsịnde ntịme ye mmọ. Ndikwọrọ ikọ ini oro akakpa ata uko.

Brọda John Rae emi okodụkde ọyọhọ klas usụkkiet ke Ufọkn̄wed Gilead ama an̄wam mi ntre ndikop ndịk. John ama ọdiọn̄ọ n̄kpọ etieti, osụhọde idem, onyụn̄ edi se mme owo ẹkemede ndisan̄a n̄kpere. Enye ikesiwakke ndinen̄ede mi, edi mma n̄kpep ediwak n̄kpọ nto eti uwụtn̄kpọ esie. Ama esisọn̄ enye ndisem French, ntre mma nsiwak ndisan̄a ye enye ke ukwọrọikọ man n̄n̄wam enye. Ndikadian idem ye enye ama an̄wam mi nnyene uko mbiere ndidi Ntiense Jehovah. Mma nna baptism ke May 26, 1951, isua duop tọn̄ọ akpa ini emi n̄kosobode Mme Ntiense Jehovah.

Mme asiakusụn̄ ẹkewak ẹkan ke ekpri esop nnyịn ke Quebec City. Eti uwụtn̄kpọ mmọ ama anam ndụk utom usiakusụn̄. Ini oro, ikesikama Bible kpọt ikwọrọ ikọ ke ufọk ke ufọk. Sia nnyịn mîkesikamake n̄wed ini ikwọrọde ikọ, akana inen̄ede ifiọk ndida Bible n̄kwọrọ ikọ. Ntre mma nsịn idem n̄kpep mme itie Bible emi ndidade n̄kwọrọ ikọ. Edi ediwak owo ikakam inyịmeke ndikot Bible ekededi emi Ufọkabasi Catholic mîkenyịmeke ẹkama.

Ke 1952, mma ndọ Simone Patry emi okodude ke esop nnyịn. Simone ama ọsọn̄ idem ke esop etieti. Ima iwọrọ ika Montreal, ndien ke ufan̄ isua kiet tọn̄ọ ikanam ndọ, Lise adiaha nnyịn ama amana. Mma ntre usiakusụn̄ esisịt ini mbemiso ndọ n̄wan, edi sia ami ye n̄wan mi ikoyomde ndinyene ini nnen̄ede nsịn idem ke esop, ima idomo nte ikekeme man nnyịn ikûyom ikpọ n̄kpọ.

Isua duop ama ebe mbemiso n̄kere ndifiak ntọn̄ọ utom usiakusụn̄. Ke 1962, mma n̄ka Ufọkn̄wed Utom Obio Ubọn̄ emi ẹkenịmde ọfiọn̄ kiet ke Bethel Canada. Ẹkesịn mi ubet kiet ye Brọda Camille Ouellette. Mma mma ifịk emi Camille ekenyenede ke ukwọrọikọ etieti, akpan akpan sia edide enye ama ọdọ n̄wan onyụn̄ enyene nditọ. Ini oro, ata ibat ibat owo kpọt emi ẹkenyenede ubon ẹkesinam utom usiakusụn̄ ke Quebec; edi se Camille akaduakde ndinam edi oro. Ini ikodude kiet, enye ama ọdọhọ mi mfiak n̄kere nte n̄kpọ etiede ye ami. Ke ọfiọn̄ ifan̄ ebede, mma n̄kụt ke mmekeme ndifiak ntọn̄ọ usiakusụn̄. Ndusụk owo ẹma ẹdọhọ mi ke mmimọ ikereke ke se nnamde oro esịne ifiọk, edi n̄kọbọrọke mmọ, sia mma nnen̄ede mfiọk ke Jehovah ayan̄wam mi nsịn idem n̄kwọrọ ikọ.

IMA IFIAK INYỌN̄ QUEBEC CITY IKEDI MME AKPAN ASIAKUSỤN̄

Ke 1964, ẹma ẹmek mi ye Simone an̄wan mi mme akpan asiakusụn̄ ẹnyụn̄ ẹnọ nnyịn ika Quebec City obio emana nnyịn. Ima idu do isịm isua ifan̄. Ini oro, owo ikenen̄ekede ikọbọ nnyịn aba, edi ndusụk owo ẹkesụk ẹkọkọbọ.

Mme bodisi ẹma ẹmụm mi uwemeyo Saturday kiet ke ekpri obio kiet emi ẹkotde Sainte-Marie, emi ekperede Quebec City. Owo bodisi kiet ama emen mi aka itieutom mmọ onyụn̄ ekesịn mi ke ufọk-n̄kpọkọbi ete ke n̄kasan̄a n̄kwọrọ ikọ ke ini ukara mînọhọ mi unen. Ekem ẹma ẹmen mi ẹbịne ebiereikpe emi ekekerede Baillargeon; ete oro ama enyene uten̄e etieti. Enye ama obụp mi m̀mê anie edidi ekpeibet mi ke esop. Ini n̄kọdọhọde enye ke edidi Glen How,a uyo ama ọbọhọ enye ete: “Ete nso? Yak okûdi enye!” Mme owo ẹma ẹnen̄ede ẹdiọn̄ọ ke Glen How ọdiọn̄ọ ukpeikpe etieti, ke enye esinyụn̄ an̄wam Mme Ntiense Jehovah ke esop. Ikebịghike, esop ẹma ẹdọhọ mi ke ẹbiat se ẹkedoride mi oro ẹfep.

Nte ẹkekọbọde nnyịn ke Quebec ama anam ọsọn̄ n̄ko ndikụt eti itie mbọ nnịm mbono esop. N̄kukụre itie emi ekpri esop nnyịn ẹkekụtde ekedi akani itie unịm moto emi n̄kpọ unam ufọk ofiop mîkodụhe. Ntre ke ata ini etuep, nditọete ẹma ẹsida n̄kpọ unam ufọk ofiop emi ẹsịnde aran ẹnam ufọk oro ofiop. Ima isiwak nditie n̄kanade n̄kpọ oro ke ufan̄ hour ifan̄ ibụk inem inem ifiọkutom mbemiso mbono esop ọtọn̄ọ.

Enem etieti ndikụt utịp utom ukwọrọikọ nnyịn ke ofụri isua emi. Mbemiso 1970, n̄kpata n̄kpri esop ifan̄ kpọt ẹkedu ke ofụri Quebec City, Côte-Nord, ye Gaspé Peninsula. Edi mfịn, circuit ebe iba ke mme ikpehe emi, nditọete ẹnyụn̄ ẹsop idem ke ndiye Ufọkmbono Obio Ubọn̄.

ẸMEK MI ESENYỊN EMI ASAN̄ADE-SAN̄A

Ẹma ẹmek mi esenyịn circuit ke 1970, ekem ke 1973, ẹmek mi esenyịn district. Ke mme isua oro, mma n̄kpep ediwak n̄kpọ nto utọ nditọete nte Laurier Saumurb ye David Splane,c emi ẹkedide mme esenyịn emi ẹsan̄ade-san̄a n̄ko. Ke ini isuanade mbono circuit kiet kiet, David ọyọdọhọ mi se n̄kpanamde man utịn̄ikọ mi ọfọn akan oro, ami nnyụn̄ ndọhọ enye se enye akpanamde. Mmeti ini kiet emi David ọdọhọde mi ete: “Léonce, mma mma akpatre utịn̄ikọ fo. Ama enem, edi n̄kpada utịn̄ikọ fo oro nsio utịn̄ikọ ita!” Mma nsidọn̄ n̄kpọ awak akaha ke utịn̄ikọ mi. Akana n̄kpep ndidọn̄ n̄kpọ idaha idaha.

Ẹma ẹsinọ mme esenyịn district ẹka ẹkesọn̄ọ mme esenyịn circuit idem. Edi ediwak nditọete ke Quebec ẹma ẹnen̄ede ẹdiọn̄ọ mi. Ediwak ini, mmọ ẹma ẹsiyom ndisan̄a ye ami n̄kwọrọ ikọ ini n̄kade circuit mmọ. Ama esinem mi ndisan̄a ye mmọ, ntre n̄kesinen̄ekede nnyene ini nsan̄a ye esenyịn circuit. Isan̄ kiet, esenyịn circuit kiet ama ọdọhọ mi sụn̄sụn̄ ete: “Ọfọn abiat ini ye nditọete, edi kûfre ke ami nnyene urua emi-o. Ami n̄ko mmetiene nyom ẹsọn̄ọ mi idem!” Mma n̄kpep n̄kpọ etieti nto utọ eti item oro.

Ke 1976, n̄kpọ emi akanamde mi mfụhọ ama etịbe ke unana idotenyịn. Simone edima an̄wan mi ama ọdọn̄ọ idiọk idiọk onyụn̄ akpa. Enye ama ama Jehovah etieti, esinyụn̄ ekere aban̄a mme owo, oro ama anam mma enye etieti. Se ikọdọn̄de mi esịt ke n̄kpa esie ekedi ndisịn idem n̄kwọrọ ikọ. Mmenen̄ede n̄kọm Jehovah nte enye akan̄wamde mi ini n̄wan mi akakpade. Nte ini akakade mma ndidọ Carolyn Elliott emi ekedide Quebec ndin̄wam ke ebiet emi ẹkeyomde-yom mme ọkwọrọikọ. Enye ekesisem Ikọmbakara, okonyụn̄ edi asiakusụn̄ emi ekesisịnde ifịk etieti ke n̄kpọ Abasi. Carolyn enyene ido etieti onyụn̄ ama mme owo, akpan akpan mbon o-bụt m̀mê mbon emi ẹkopde ndobo. Enye ama an̄wam mi etieti ini ikesisan̄ade ntre ikese mme circuit.

ISUA EMI MMENDIFREKE

Ke January 1978, ẹma ẹdọhọ n̄kenịm akpa Ufọkn̄wed Mme Asiakusụn̄ ke Quebec. Idem ama enyek mi etieti sia akanam n̄kaha ufọkn̄wed oro akpa, n̄konyụn̄ n̄kwe n̄wed ufọkn̄wed oro akanam; kpukpru n̄kpọ ẹketie mi obufa obufa ukem nte ẹketiede nditọ ufọkn̄wed oro. Edi ama enem mi sia mme asiakusụn̄ emi ẹnyenede mbufiọk ẹma ẹdu ke akpa klas oro. Mma n̄kpep ediwak n̄kpọ nto nditọ ufọkn̄wed oro, kpa ye oro n̄kedide andikpep!

Kpa ke 1978 oro, ẹma ẹnịm akamba mbono ofụri ererimbot emi ẹkekotde “Mbuọtidem oro Akande” ke an̄wambre Olympic ke Montreal. Mbon emi ẹkedụkde mbono oro ẹma ẹbe owo 80,000; akpa ini ikenịmde mbono emi mme owo ẹwakde ntre ke Quebec ekedi oro. Ẹkedọhọ nnam utom ke Itieutom Emi Ẹsede Ẹban̄a Usuanetop ke mbono oro. Mma nnyene nneme ye ediwak mme ọkọmbụk n̄kpọntịbe, ama onyụn̄ enem mi ndikụt mmọ ẹwetde nti n̄kpọ ẹban̄a nnyịn. Ẹma ẹneme nneme ye nnyịn nsio nsio ini ke TV ye ke radio ẹbe hour 20, ẹma ẹnyụn̄ ẹwet ediwak ibuotikọ ẹban̄a nnyịn. Oro ama anam mme owo ẹnen̄ede ẹkop n̄kpọ ẹban̄a Jehovah ye ikọt esie!

ẸNỌ MI N̄KA EFAKUTOM EN̄WEN

Utom mi ama enen̄ede okpụhọde ke 1996. Tọn̄ọ n̄kana baptism, n̄kodu ke n̄kan̄ Quebec emi ẹsisemde French, edi ẹma ẹdinọ mi n̄kanam utom district ke mme circuit Ikọmbakara ke n̄kan̄ Toronto. N̄kekere ke ndikemeke, ndịk ama onyụn̄ anam mi nte ndisinọde utịn̄ikọ sia n̄kenen̄ekede ndiọn̄ọ Ikọmbakara. Mma nsibọn̄ akam etieti nnyụn̄ nnen̄ede mberi edem ke Jehovah.

Kpa ye idem ekenen̄erede enyek mi akpa ini n̄kade n̄kan̄ Toronto oro, isua iba emi n̄kodude do ama enem mi etieti. Carolyn ama enyene ime an̄wam mi ntịn̄ Ikọmbakara ọfọn, nditọete n̄ko ẹma ẹsin̄wam mi etieti ẹnyụn̄ ẹsọn̄ọ mi idem. Ikadaha nnyịn ini ndinyene mbufa ufan.

Ini inyenede mbono circuit, kpa ye oro n̄kesinyenede ediwak n̄kpọ en̄wen ndinam nnyụn̄ ntịm idem nnọ mbono utịturua oro, mma nsiwak ndida n̄kpọ nte hour kiet mbubreyo Friday n̄ka ukwọrọikọ ke ufọk ke ufọk. Ndusụk owo ẹkpekedọhọ idemmọ ẹte, ‘Nso ikpanam n̄ka ukwọrọikọ ye kpukpru se nnyenede ndinam ke mbono utịturua emi?’ Edi mma n̄kụt ke ndikwọrọ ikọ Abasi nnọ mme owo esisọn̄ọ mi idem. Idem tutu emi, mmesinen̄ede n̄kop inemesịt mma n̄ka ukwọrọikọ.

Ke 1998, ẹma ẹmek nnyịn mme akpan asiakusụn̄ ẹnyụn̄ ẹnọ nnyịn ika Montreal. Utom emi n̄kakanamde do ke ediwak isua ama esịne ndidiomi san̄asan̄a ukwọrọikọ ke ebiet emi mme owo ẹsiwakde, ndinyụn̄ nnyene nneme ye mme ọkọmbụk n̄kpọntịbe man nnen̄ede ukwan̄n̄kpọ emi mme owo ẹnịmde ẹban̄a Mme Ntiense Jehovah. Esinem mi ye Carolyn an̄wan mi ndikwọrọ ikọ nnọ mbon emi ẹtode idụt en̄wen ẹdi Canada ndondo emi, emi ẹnen̄erede ẹyom nditịm mfiọk Bible.

Esidi mma ntie n̄kere se nnamde ke utom Jehovah tọn̄ọ n̄kana baptism isua 68 emi ebede, mmesikụt ke Jehovah enen̄ede ọdiọn̄ mi. Ami ndikpep ndima ukwọrọikọ nnyụn̄ n̄n̄wam ediwak owo ẹdikpono Jehovah enen̄ede anam n̄kop inemesịt. Lise adiaha nnyịn ye ebe esie ẹma ẹtọn̄ọ utom usiakusụn̄ ke nditọ mmọ ẹma ẹkekponi ẹwọrọ owo. Ndikụt nte enye akade iso ndisịn idem ke ukwọrọikọ esinem mi etieti. Mmenen̄ede n̄kọm nditọete emi ẹkenịmde eti uwụtn̄kpọ ẹnọ mi ẹnyụn̄ ẹnọde mi nti item man ẹn̄wam mi nnen̄ede n̄kpere Jehovah nnyụn̄ nnam nsio nsio utom ke esop esie. Mmokụt ke n̄kukụre se ikemede ndinam owo aka iso anam se esop Jehovah ẹnọde enye edi ndiberi edem ke okopodudu edisana spirit Jehovah. (Ps. 51:11) Nsitreke ndikọm Jehovah nte enye ayakde mi ntoro enyịn̄ esie!​—Ps. 54:⁠6.