Nte Akam Ekemede Ndin̄wam Fi

Pamela emi ọkọdọn̄ọde kansa ama aka ufọkibọk man ẹkesọbọ enye idem. Edi enye ama onyụn̄ ọbọn̄ akam eben̄e Abasi an̄wam imọ ikeme ndiyọ se ikọwọrọde imọ. Ndi akam ama an̄wam enye?

Pamela ọdọhọ ete: “Idem ama esinyek mi tutu ini ekededi emi n̄kade ndibọ usọbọ. Edi ke ini mbọn̄de akam nnọ Jehovah Abasi, esịt ama esina mi sụn̄, idem inyụn̄ inyekke mi aba. Nsụk n̄kokop ubiak, edi akam anam n̄kûtie nseme idem. Ke ini mme owo ẹbụpde m̀mê idem etie mi didie, nsidọhọ mmọ ke kpa ye oro idem mi mîsọn̄ke, ke esịt enem mi.”

Edi oro iwọrọke ke ana ibet tutu n̄kpọ emi ekemede ndida nnyịn ibuot etịbe mbemiso ibọn̄de akam. Kpukpru nnyịn imenyene mfịna, edide ekpri m̀mê akamba, imesinyụn̄ iyom owo an̄wam nnyịn man ikeme ndiyọ se iwọrọde nnyịn. Ndi akam ekeme ndin̄wam nnyịn?

Bible ọdọhọ ete: “Top mbiomo fo nọ Jehovah, ndien enye ọyọsọn̄ọ fi idem. Tutu amama enye idiyakke edinen owo esehede.” (Psalm 55:22) Itie N̄wed Abasi oro enen̄ede ọsọn̄ọ owo idem! Ntre, didie ke akam ekeme ndin̄wam fi? Edieke ọbọn̄de akam ọnọ Abasi ke nnennen usụn̄, enye ayanam ekeme ndiyọ se iwọrọde fi.—Se ekebe oro “Se Akam Ekemede Ndinam Nnọ Fi.”

Se Akam Ekemede Ndinam Nnọ Fi

Anam esịt ana fi sụn̄

“Ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere ke Christ Jesus.” (Philippi 4:6, 7) Edieke etịn̄de se ifịnade fi ọnọ Abasi, enye ayanam esịt ana fi sụn̄ onyụn̄ an̄wam fi ọfiọk se akpanamde.

Anam enyene ọniọn̄ emi Abasi ọnọde

“Edieke owo mbufo ekededi ananade ọniọn̄, yak enye aka iso eben̄e Abasi, koro enye ọnọde kpukpru owo ke ntatubọk inyụn̄ isueneke owo; ndien enye ọyọnọ enye.” (James 1:5) Nnyịn isibiereke n̄kpọ ọfọn ke ini esịt etịmerede nnyịn. Edieke ọbọn̄de akam eben̄e Abasi ọnọ fi ọniọn̄, enye ekeme ndinam fi eti mme item Bible emi ẹdin̄wamde fi.

Ọsọn̄ọ fi idem onyụn̄ ọdọn̄ fi esịt

“Mmenyene ukeme ndinam kpukpru n̄kpọ ebe ke enye emi ọnọde mi odudu.” (Philippi 4:13) Sia Jehovah edide Ata Ọkpọsọn̄ Abasi, enye ekeme ndinọ fi odudu ọyọ mfịna fo, mîdịghe an̄wam fi tutu mfịna oro ebe efep. (Isaiah 40:29) Bible okot Jehovah “Abasi kpukpru ndọn̄esịt.” Enye ekeme ndidọn̄ nnyịn esịt “ke kpukpru ukụt nnyịn.”—2 Corinth 1:3, 4.

NDI AYAKA ISO ỌBỌN̄ AKAM?

Jehovah isinyịkke-nyịk owo ọbọn̄ akam ọnọ imọ. Ima emi enye amade nnyịn anam enye ọdọhọ nnyịn isibọn̄ akam inọ imọ. (Jeremiah 29:11, 12) Edi nso ke akpanam edieke ekerede ke Abasi isibọrọke ndusụk akam fo? Kûyak oro anam etre ndibọn̄ akam. Idịghe kpukpru ini ke ete ye eka ẹsin̄wam eyen mmọ nte enye oyomde m̀mê ke ini emi enye ọdọhọde. Mmọ ẹsidiọn̄ọ ini emi ọfọnde akan ndin̄wam eyen mmọ. Se idiọn̄ọde edi ke ete ye eka oro ẹmade nditọ mmọ isitreke ndin̄wam mmọ.

Idụhe ete m̀mê eka emi amade nditọ esie nte Jehovah Abasi amade nnyịn; enye enen̄ede oyom ndin̄wam fi. Edieke adade ini okot se inemede ke magazine emi onyụn̄ odomode ukeme ndinam se okotde, Abasi ọyọbọrọ akam fo ke usụn̄ emi edinen̄erede ọfọn ye afo!—Psalm 34:15; Matthew 7:7-11.