SE AKPANAMDE MAN ETRE NDISUA OWO

4 | Yak Abasi An̄wam Fi Etre Ndisua owo

Se Bible Ọdọhọde:

“Mbun̄wụm spirit edi ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem.”—GALATIA 5:22, 23.

Se Itien̄wed Emi Ọwọrọde:

Abasi ekeme ndin̄wam owo etre ndisua owo. Edisana spirit esie ekeme ndin̄wam nnyịn inyene nti edu emi nnyịn mîkemeke ndinyene ke idem nnyịn. Ntre, ọfọn iben̄e Abasi an̄wam nnyịn itre ndisua owo, utu ke ndidomo nditre usua ke idem nnyịn. Edieke inamde emi, iyokụt nte Abasi an̄wamde nnyịn ukem nte enye akan̄wamde apostle Paul. Enye ekewet ete: “Mmenyene ukeme ndinam kpukpru n̄kpọ ebe ke enye emi ọnọde mi odudu.” (Philippi 4:13) Nnyịn n̄ko iyekeme nditịn̄ se andiwet Psalm ekewetde ete: “Un̄wam mi oto Jehovah.”—Psalm 121:2.

Se Akpanamde:

“Jehovah anam ntre uwem afai nnyụn̄ ntọn̄ọ nditie emem emem.” —WALDO

Bọn̄ akam ben̄e Jehovah ọnọ fi edisana spirit esie. (Luke 11:13) Dọhọ enye an̄wam fi enyene nti edu kpukpru usen. Kpep se Bible etịn̄de aban̄a mme edu emi esinamde owo etre ndisua owo, utọ nte ima, emem, ime, ye mfara-ke-idem. Domo ndinyene mme edu emi. Nam ufan ye mbon emi ẹnyụn̄ ẹnyenede mme edu emi. Mmọ ẹyen̄wam fi ama mme owo onyụn̄ anam nti n̄kpọ.—Mme Hebrew 10:24.

Se Iketịbede—WALDO

Ama Etre Afai

Uwem ikememke ye Waldo ini enye ekedide eyenọwọn̄ ndien oro ama anam enye etie afai afai. Enye ọdọhọ ete: “N̄kesin̄wana ye mme anyam n̄kpọsọn̄ ibọk kpukpru ini . . . Isan̄ kiet, ẹma ẹdọn̄ mme owo ẹte ẹdiwot mi. Edi mma mbọhọ mfehe ke mmọ ẹma ẹkekịm mi ke ikwa.”

Esịt ikenemke Waldo ini n̄wan esie ọkọtọn̄ọde ndikpep Bible ye Mme Ntiense Jehovah. Enye ọdọhọ ete: “Mma nsua mmọ tutu, ndusụk ini mma nsisụn̄i mmọ. N̄kekere ke mmọ ẹyesụn̄i mi usiene, edi mmọ ikesibọrọke mi ikọ.”

Nte ini akakade, Waldo n̄ko ama ọtọn̄ọ ndikpep Bible. Enye ọdọhọ ete: “Ikememke inọ mi ndinam se n̄kekpepde. N̄kekere ke tutu amama ndikemeke nditre afai.” Edi enyene se enye ekekpepde ke Bible emi akanamde enye ebiere ndikpụhọde.

Waldo ọdọhọ ete: “Usen kiet, Alejandro emi ekesikpepde mi Bible ama ọdọhọ n̄kot Galatia 5:22, 23. . . . Alejandro ọkọdọhọ mi ke idụhe owo ndomokiet emi ekemede nditie ke idemesie nnyene mme edu emi, edi ke edisana spirit Abasi kpọt ekeme ndinam owo enyene. Ndikop emi ama enen̄ede an̄wam mi.”

Waldo ama ayak Abasi an̄wam enye etre ndisua owo. Kop se enye etịn̄de mi: “Mme iman mi ye n̄kani ufan mi ikpenịmke ke ami ndi emi.” Enye ọdọhọ n̄ko ete: “Jehovah anam ntre uwem afai nnyụn̄ ntọn̄ọ nditie emem emem.”