Mme Mbụme Oro Mme Andikot Ẹbụpde
Nso inam ete oro Boaz okokotde “Da” ọkọdọhọ ke ikpọdọ Ruth, ke ‘iyabiat’ udeme imọ? (Ruth 4:1, 6)
Ke eyo Bible, erenowo ọkpọdọ n̄wan ekem akpa inyeneke eyen, ẹkesinam didie isọn̄ emi enye ekenyenede? Ndi enyịn̄ esie oyosop ntre taktak? Ibet Moses ama ọbọrọ mme mbụme ntre.
Edieke akpan̄kpa ekenyenede isọn̄, eyeneka, eyenete, m̀mê n̄kpet n̄kpet iman esie ama ekeme ndimen isọn̄ esie oro. Owo akpakabade ubuene onyụn̄ anyam isọn̄ esie, eyeneka, eyenete, m̀mê n̄kpet n̄kpet iman esie ama ekeme ndifak isọn̄ oro, mîdịghe afiak ọbọ edep. Oro idiyakke isọn̄ oro ọwọrọ ubon mmọ ke ubọk.—Lev. 25:23-28; Num. 27:8-11.
Nso mîkesiyakke enyịn̄ akpan̄kpa oro osop? Eyeneka, eyenete, m̀mê n̄kpet n̄kpet iman akpan̄kpa oro ama esimen n̄wan emi ẹkpade ẹkpọn̄ do ọdọ onyụn̄ obon eyen erenowo emi edikerede enyịn̄ idian akpan̄kpa oro, inyụn̄ idi adiakpa esie. Ndọ Ruth ye Boaz ekedi utọ ndọ oro. Utọ ndọ oro ama enyene ufọn ọnọ ebekpa oro n̄ko.—Deut. 25:5-7; Matt. 22:23-28.
Kop uwụtn̄kpọ Naomi mi. Ebe esie ekekere Elimelech. Ini ebe esie ye nditọ esie irenowo iba ẹkekpade, erenowo ndomokiet ikodụhe aba ke ufọk mmọ ndise mban̄a enye. (Ruth 1:1-5) Ke Naomi ama akasan̄a ye Ruth n̄wan eyen esie afiak ọnyọn̄ Judah, enye ama ọdọn̄ Ruth ọkọdọhọ Boaz emi ekedide n̄kpet n̄kpet iman Elimelech afak isọn̄ mmimọ. (Ruth 2:1, 19, 20; 3:1-4) Edi Boaz ama ọdiọn̄ọ ke iman en̄wen emi ekperede Elimelech akan imọ mmọdo. Iman oro ke ẹkot “Da” ke Bible. Enye ekpekebem iso ebiere m̀mê iyedi andifak.—Ruth 3:9, 12, 13.
Akpa akpa, “Da” ama enyịme ndin̄wam. (Ruth 4:1-4) Enye ama ọdiọn̄ọ ke imọ iyabiat okụk ifiak idep isọn̄ Elimelech oro. Enye ama ọdiọn̄ọ n̄ko ke Naomi ọsọn̄ ebe ndiman eyen emi ekemede ndinyene isọn̄ Elimelech oro, ke iyada isọn̄ oro idian ye eke imọ, ndien okụk emi idibiatde iditakke imọ.
Edi ke ini “Da” ekedidiọn̄ọde ke ana imọ idọ Ruth, enye ama okpụhọ uyo, edikabade ọdọhọ: “Ndikemeke ndifak mbak ndibiat udeme mi.” (Ruth 4:5, 6) Nso ikanam enye anam ntre?
Edieke “Da” m̀mê owo en̄wen ọdọde Ruth ndien enye ediman eyen erenowo, eyen oro edinyene isọn̄ Elimelech. Edi nso ikanam “Da” ọdọhọ ke oro ‘ayabiat udeme’ imọ? Bible itịn̄ke, edi se ndusụk se ikerede mi.
Akpa, okụk emi enye edibiatde editatak enye sia utịt utịt eyen erenowo emi Ruth edimande edinyene isọn̄ Elimelech oro.
Ọyọhọ iba, enye edinọ Naomi ye Ruth udia onyụn̄ ese aban̄a mmọ.
Ọyọhọ ita, ekpedi “Da” ama enyenyene nditọ, ekem Ruth ediman nditọ en̄wen ọnọ enye, akpa nditọ esie oro ye nditọ emi Ruth amande ọnọ enye ẹdibabuana se enye enyenede.
Ọyọhọ inan̄, ekpedi “Da” ikenyeneke eyen, eyen erenowo emi Ruth edimande edinyene isọn̄ Elimelech afiak enyene eke “Da.” Ọwọrọ eyen oro ekerede enyịn̄ adian Elimelech do, ikereke idian enye, edinyene isọn̄ esie. Ete oro ikenyịmeke ndin̄wam Naomi ke ntak udeme esie. Enye edi akpa owo emi ekenyenede unen ndifak isọn̄ oro, edi enye ama ayak itie ọnọ Boaz emi ekedide udiana. Boaz ama enyịme ndifak koro enye okoyom “enyịn̄ akpan̄kpa osụk odu ke udeme esie.”—Ruth 4:10.
Etie nte se ikebehede “Da” edi ke enye ikoyomke enyịn̄ esie osop, ikonyụn̄ iyomke isọn̄ esie atak enye. Enye ekedi ibụk. Edi enyịn̄ esie oro mfịn-e? Idụhe eke ọdiọn̄ọde. San̄asan̄a ifet emi Boaz ekedinyenede ndisịne ke otu mme ete ete ete Jesus Christ emi edide Messiah ama atak enye n̄ko. Se ikọwọrọde “Da” ke ntak emi ibụk mîkayakke enye an̄wam owo emi okoyomde un̄wam ama ọdiọk tutu!—Matt. 1:5; Luke 3:23, 32.