Se Ifọnde ye Se Idiọkde: Se Ediwak Owo Ẹsidade Ẹbiere

Ata ediwak owo ẹdiọn̄ọ ke ndusụk mme n̄kpọ oro mme owo ẹsinamde ọfọn, ndusụk onyụn̄ ọdiọk. Ke uwụtn̄kpọ, kpukpru owo ẹdiọn̄ọ ke ndiwot owo, ndidan̄ owo ke n̄kanubọk m̀mê ndisabade eyenọwọn̄ ọdiọk ebe nde. Edi esinen̄ede ẹtoro mbon emi ẹsidade kpukpru owo ukem ukem, ẹfọnde ido ẹsinyụn̄ ẹtuade owo mbọm. Edi nso kaban̄a ndibiere utọ n̄kpọ nte; owo emi owo akpadan̄de, ndinam akpanikọ m̀mê nte ikpọbọkde nditọ. Ediwak owo ẹda ke se owo ẹbierede ndinam ke mme n̄kpọ emi edi mbubehe idem esie. Mmọ ẹdọhọ ke ekededi oro owo ebierede idiọkke. Mme owo ẹsima ndida nte etiede mmọ ke idem ye nte mme owo ke edem mmọ ẹdade n̄kpọ oro mbiere n̄kpọ. Ndi nnennen se ikpanamde edi oro?

NTE ETIEDE NNYỊN KE IDEM

Ediwak ini isida nte etiede nnyịn ke idem m̀mê se esịt nnyịn ọdọhọde ke ọfọn m̀mê ọdiọk ibiere n̄kpọ. (Rome 2:14, 15) Idem n̄kpri nditọ ẹsidiọn̄ọ se mîfọnke, esịt esinyụn̄ afịna mmọ ke ini mmọ ẹnamde se mîfọnke. Nte ikponde, imesikpep ndinam se ifọnde ye se idiọkde ito mbonubon nnyịn, mme ufan nnyịn, mme andikpep nnyịn, mbon obio nnyịn, ufọkabasi ye nte ẹsinamde n̄kpọ ke edem nnyịn. Ke ini ibierede n̄kpọ, esịt nnyịn esidọhọ nnyịn m̀mê se ibierede oro ọfọn m̀mê ọdiọk.

Ndidiọn̄ọ se ifọnde ye se idiọkde ekeme ndinam itua owo mbọm, ima se owo anamde ọnọ nnyịn, ida ofụri owo ukem ukem, inyụn̄ isifọn ido ye mme owo. Ndidiọn̄ọ emi n̄ko esinam imụm idem ikama ke ini ọdọn̄de nnyịn ndinam n̄kpọ emi edibiakde mbon nnyịn, mîdịghe n̄kpọ emi edisuenede mmo, n̄kpọ emi edinamde bụt anam mmọ, m̀mê edinamde esịt afịna mmọ.

Ndi akpana isida nte etiede nnyịn ke idem ibiere n̄kpọ kpukpru ini? Ini Garrick ekedide akparawa, enye ọdọhọ ete: “Nte n̄kebierede ndidu uwem ekedi ndinam se ededi oro ọdọn̄de mi.” Edi enye ama edikụt ke imọ ndinam se imọ ikekerede ke ọfọn ikamanke eti n̄kpọ. Enye ama ada inua esie etịn̄ ke se imọ ikebierede ndinam oro ama anam imọ “idu obụrobụt uwem, isida n̄kpọsọn̄ ibọk, isikpa mmịn inyụn̄ isitie afai afai.”

SE MBON EN̄WEN ẸKEREDE

Ke adianade ye nte etiede nnyịn ke idem, imesiwak ndikere nte mbon en̄wen ẹdidade se ibierede. Emi esinam ibụp mmọ se mmọ ẹkerede, ndien se mmọ ẹkerede ye ifiọk oro mmọ ẹnyenede ẹban̄a n̄kpọ oro esin̄wam nnyịn. Mbonubon nnyịn, mme ufan nnyịn ye mbon obio nnyịn ẹyema nnyịn edieke inamde se mmọ ẹkerede ke ọfọn.

Ndi se mbon en̄wen ẹkerede ayan̄wam nnyịn isibiere se ifọnde kpukpru ini? Ini Priscila ekedide n̄kaiferi, enye ama esitiene anam se ubọkn̄ka esie ẹkenamde onyụn̄ odụk enyịne ke unam idan̄. Enye ama edikụt ke imọ ndinam se mbon en̄wen ẹkekerede ke ọfọn ikanamke imọ ikop inemesịt. Enye ọdọhọ ete: “Ndinam se kpukpru owo ẹkekerede ke ọfọn ikanamke ufọn ndomokiet inọ mi, utu ke oro, akakam anam nsibiere se mîfọnke nnyụn̄ nsịn uwem mi ke fehesan̄.”

NDI ENYENE SE IKEMEDE NDIN̄WAM NNYỊN IBIERE SE IFỌNDE?

Ke ini iyomde ndibiere se ifọnde ye se idiọkde, ndikere mban̄a nte etiede nnyịn ye mbon en̄wen ke idem edi ata akpan n̄kpọ. Edi enye oro kpọt isin̄wamke nnyịn ibiere se ifọnde. Ndusụk ini, se ibierede ekeme ndida mfịna nsọk nnyịn m̀mê mbon en̄wen sia nnyịn ikekereke-kere m̀mê se nnyịn ikebierede oro ediman nso. (Mme N̄ke 14:12) Ekpededi ikere ke se nnyịn m̀mê mbon en̄wen ẹkebierede ọfọn, se ibierede oro ekeme ndida mfịna ndi, ndien imonyụn̄ ikeme ndikpụhọde se ikebierede oro. Idem n̄kpo, ndusụk ido oro ẹkesidade ke ọdiọk edidi se ẹmade-ma idahaemi, ndien mme ido oro ẹkesidade ke ọfọn editie ndusụk owo nte n̄kpọeset.

Ndi enyene se ikemede ndin̄wam nnyịn ibiere se ifọnde ye se idiọkde? Ndi odu se ikemede ndin̄wam nnyịn ibiere n̄kpọ emi mîdidaha mfịna isọk nnyịn ke ini iso?

Se ifọnde edi ke odu eti n̄kpọ emi ekemede ndin̄wam kpukpru owo ẹdiọn̄ọ se ẹkpebierede emi edifọnde ye mmọ. Ibuotikọ en̄wen eyeneme ebiet emi ikemede ndikụt nti item oro ẹdin̄wamde nnyịn ibiere se ifọnde ye se idiọkde.