Mme Mbụme Oro Mme Andikot Ẹbụpde
“Ndimek angel” emi ẹtịn̄de ẹban̄a ke 1 Timothy 5:21 ẹdi mmanie?
Apostle Paul ekewet ọnọ Timothy emi ekedide ebiowo nte enye ete: “Mmọsọn̄ọ n̄wụk fi ke iso Abasi ye ke iso Christ Jesus ye ndimek angel nte enịm mme n̄kpọ emi ye unana edibem iso mbiom owo ikpe, kûnyụn̄ unam baba n̄kpọ kiet ke uma.”—1 Tim. 5:21.
Akpa, ẹyak ineme iban̄a mbon emi nnyịn mîkemeke ndidọhọ ke mmọ ẹdi mme angel oro. Imenen̄ede ikụt ke idịghe owo 144,000 ẹdi mme angel oro. Ini Paul ekewetde leta oro ọnọ Timothy, owo ikọtọn̄ọke ndinam mme Christian emi ẹyetde aran emi ẹma ẹkekpan̄a ẹset ẹkedu ke heaven. Mme apostle ye mbon eken emi ẹkeyetde aran ikakabakede spirit kan̄a. Ntre, “ndimek angel” ikekemeke ndida mban̄a mmọ.—1 Cor. 15:50-54; 1 Thess. 4:13-17; 1 John 3:2.
“Ndimek angel” ikemeke n̄ko ndida mban̄a mme angel emi ẹkesọn̄de ibuot ke ini Ukwọ. Mme angel enye oro ẹkeda ye Satan ẹnyụn̄ ẹkabade ẹdi mme demon; Jesus akasasua mmọ. (Gen. 6:2; Luke 8:30, 31; 2 Pet. 2:4) Ke ini iso, ẹyetomo mmọ ẹdọn̄ ke editụn̄ọ ukpe ke isua 1,000. Ke oro ebede, ẹyedian mmọ ye Devil ẹsobo.—Jude 6; Edi. 20:1-3, 10.
Ntre, ana-edi “ndimek angel” emi Paul eketịn̄de aban̄a ẹdi mme angel ke heaven, emi ẹkesọn̄ọde ẹda ye “Abasi ye . . . Christ Jesus,” emi ẹsiakde kpa ke ufan̄ikọ oro.
Mme angel emi ẹsọn̄ọde ẹda ye Abasi ẹdi ke tọsịn ke tọsịn. (Heb. 12:22, 23) Inaha ikere ke kpukpru mmọ ẹnam ukem utom ke ukem ini. (Edi. 14:17, 18) Ti ke enyene ini kiet ntem emi ẹkedọn̄de angel kiet kpọt okowot mbonekọn̄ Assyria 185,000 emi ẹkekamade n̄kpọ-ekọn̄. (2 Ndi. 19:35) Etie nte mme angel emi ẹdọn̄de “[ẹtan̄] kpukpru n̄kpọ eke ẹsịnde owo ọduọ ye mmọ emi ẹbiatde ibet ẹfep ke obio ubọn̄ [Jesus]” ẹwak. (Matt. 13:39-41) ‘Ẹyetan̄ ndimek ikọt Abasi’ ẹka heaven. Ana-edi mme angel en̄wen ke ẹnọ utom enye oro. (Matt. 24:31) Abasi onyụn̄ owụk mme angel en̄wen ẹte ‘ẹkpeme nnyịn ke kpukpru usụn̄ nnyịn.’—Ps. 91:11; Matt. 18:10; men Matthew 4:11; Luke 22:43 domo.
Ana-edi “ndimek angel” emi ẹketịn̄de ẹban̄a ke 1 Timothy 5:21 ẹkedi mme angel emi ẹkenọde san̄asan̄a utom ẹte ẹse ẹban̄a se ikade iso ke mme esop ikọt Abasi. Mbemiso ufan̄ikọ 21, Paul ama ọnọ eti item aban̄a nte mbiowo ẹkpenamde utom mmọ, onyụn̄ owụt ke edi se mme owo ke esop ẹkponode mbiowo. Ke eke mbiowo oro, enye ama ọdọhọ yak mmọ ẹnam utom mmọ ye “unana edibem iso mbiom owo ikpe, [ẹkûnyụn̄] unam baba n̄kpọ kiet ke uma,” ẹkûnyụn̄ ẹdi ẹma ẹyom ndibiere se ẹdinamde m̀mê se owo mîdinamke ke esop, mîdịghe ẹyom ndibiere ikpe, mmọ ẹnyụn̄ ẹbiere ntre, owo itịmke ikere kan̄a. Ata akpan ntak emi akpanamde mmọ ẹnam item emi Abasi ọkọnọde Paul spirit Esie ewet do edi ke se ededi emi mmọ ẹnamde, mmọ ẹnam “ke iso Abasi ye ke iso Christ Jesus ye ndimek angel.” Imenen̄ede ikụt ndien ke utom emi ẹnọde ndusụk angel enyene n̄kpọ ndinam ye esop, utọ nte ndikpeme ikọt Abasi, ndida usụn̄ ke utom ukwọrọ-ikọ, ndinyụn̄ mmen se mmọ ẹkụtde n̄ketịn̄ nnọ Jehovah.—Matt. 18:10; Edi. 14:6.