Kpep Ndikere N̄kpọ Nte Jehovah ye Jesus

1-2. Ndima Jehovah esịne nso ye nso? Didie ke Jesus okowụt ke imama Jehovah ntre?

“AFO enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ukeme fo ye ke ofụri ekikere fo.” (Luke 10:27) Jesus ama enyịme ke ikọ itie oro edi akakan ewụhọ ke Ibet Moses. N̄kọ ama okụt ke ana ima Jehovah ke esịt nnyịn. Oro esịne se idọn̄de nnyịn, nte etiede nnyịn ke idem, ye nte idade n̄kpọ. Ana ima Jehovah n̄ko ke ofụri ukpọn̄ nnyịn ye ukeme nnyịn. Oro esịne ndida odudu nnyịn nnam n̄kpọ. Edi ana ima Jehovah n̄ko ke ekikere nnyịn. Enye oro esịne nte isikerede n̄kpọ. Ekikere Jehovah ayan̄wan̄a nnyịn, edi imọdiọn̄ọ ke ọkpọkọm inam didie, idin̄wan̄ake nnyịn ofụri ofụri. Edi se idinamde ekikere Jehovah etetịm an̄wan̄a nnyịn edi nnyịn ndikpep mban̄a “ekikere Christ,” sia nte Jesus esikerede n̄kpọ edi ata ukem nte Ete esie esikerede.​—1 Cor. 2:16. Se n̄ko se ẹwetde ẹban̄a “we do have the mind of Christ” ke ufan̄ikọ oro ke nwtsty.

² Jesus ama ama Jehovah ke ofụri ekikere esie. Enye ama ọdiọn̄ọ se Abasi okoyomde enye anam, ama onyụn̄ ebiere ndinam kpa ye edide enye ọyọbọ ufen ke eti n̄kpọ emi enye edinamde. Sia enye ekesịnde ofụri ekikere esie ke se Ete esie okoyomde enye anam, enye ikayakke n̄kpọ en̄wen edi akpan n̄kpọ ọnọ enye akan oro.

3. Nso ke apostle Peter ekekpep oto Jesus? Nso ke Peter ọkọdọhọ mme Christian ẹnam? (1 Peter 4:1)

³ Peter ye mme apostle eken ẹkesidu ye Jesus kpukpru ini ẹnyụn̄ ẹkpep nte Jesus ekesikerede n̄kpọ. Idịghe ekpri n̄kpọ ekedi oro. Ini Peter ewetde akpa leta esie emi Abasi ọkọnọde enye spirit Esie ewet, enye ama ọdọhọ mme Christian ẹnyene ukem edu ukere n̄kpọ Christ.a (Kot 1 Peter 4:1.) Ke akpa usem emi ẹkedade ẹwet itie Bible oro, ikọ emi Peter akadade ewet “ẹnyene” ekedi ikọ mbonekọn̄ emi aban̄ade nte mbonekọn̄ ẹtan̄de n̄kpọ-ekọn̄ ẹyọhọ idem ẹnyụn̄ ẹben̄ede idem ẹnọ ekọn̄. Ntre, edieke mme Christian ẹyomde ndinyene ukem edu ukere n̄kpọ Jesus, m̀mê ẹyomde ndikpep ndikere n̄kpọ nte Jesus, ana mmọ ẹkama mme okopodudu n̄kpọ-ekọn̄ emi ẹdin̄wamde mmọ ẹn̄wana ẹkan ndiọi n̄kpọ emi ẹdọn̄de mmọ, ẹnyụn̄ ẹkan ererimbot emi Satan akarade mi.​—2 Cor. 10:3-5; Eph. 6:12.

4. Didie ke ibuotikọ emi ekeme ndin̄wam nnyịn inam item Peter?

⁴ Iyenen̄ede ineme iban̄a nte Jesus ekesikerede n̄kpọ ye nte ikemede ndikpep ndikere n̄kpọ nte enye. Iyokụt n̄ko (1) nte ikemede ndikere n̄kpọ nte Jehovah; oro ayan̄wam kpukpru nnyịn inyene ekikere kiet, (2) nte ikposụhọrede idem, ye (3) nte ikemede ndibọn̄ akam mberi edem ke Jehovah man inyene eti ibuot.

KPEP NDIKERE N̄KPỌ NTE JEHOVAH

5. Didie ke se Peter akanamde isan̄ kiet okowụt ke enye ikereke n̄kpọ nte Jehovah ekerede?

⁵ Kere ban̄a ini kiet emi se Peter akanamde okowụtde ke enye ikereke n̄kpọ nte Jehovah ekerede. Jesus ama ọdọhọ mme apostle esie ke eyedi se imọ ikade Jerusalem, ke ima isịm do, ẹyeyak imọ ẹnọ ikpọ owo ido ukpono do, ke mmọ ẹyetụhọde imọ, ekem ẹwot imọ. (Matt. 16:21) Etie nte ama ọsọn̄ Peter ndinyịme ke Jehovah ọmọn̄ ayak ẹwot Jesus emi ekedide idotenyịn Israel ye Messiah emi ẹken̄wọn̄ọde. (Matt. 16:16) Ntre, Peter ama emen Jesus ọwọn̄ọde ada onyụn̄ ọdọhọ enye ete: “Tua idemfo mbọm, Ọbọn̄; n̄kpọ emi idiwọrọke fi tutu amama.” (Matt. 16:22) Se Peter ye Jesus ẹkekerede ẹkedi isio sia eke Peter ikodụkke ye se Jehovah ekekerede.

6. Didie ke Jesus okowụt ke imọ ikere n̄kpọ nte Jehovah?

⁶ Jesus ekekere n̄kpọ ata ukem ukem nte Ete esie emi odude ke heaven. Oro akanam enye ọdọhọ Peter ete: “Da mi ke edem, Satan! Afo edi n̄kpọ iduọ ọnọ mi, koro afo ukereke ekikere Abasi, edi ekere eke owo.” (Matt. 16:23) Peter iketịn̄de ikọ oro ke idiọk-o, edi Jesus ama esịn item Peter oro. Enyene se n̄kpọ oro ekpepde nnyịn. Se ekpepde nnyịn edi ke emi Jehovah okosiode Jesus ọdọn̄ edi isọn̄ edinam se Enye oyomde, ke enye ikoyomke yak edi n̄kpọ ọkpọfọn ye Jesus enye anam, mîfọnke ye enye, enye ọkpọn̄. Peter ama ekpep n̄kpọ usen oro, oro edi ke ana enye esikere n̄kpọ nte Abasi.

7. Nte ini akakade, didie ke Peter okowụt ke imọ iyom nte imọ ikerede n̄kpọ edi nte Jehovah ekerede? (Se ndise.)

⁷ Nte ini akakade, Peter ama anam n̄kpọ emi okowụtde ke enye oyom ndikpep ndikere n̄kpọ nte Jehovah. Ini emi Abasi okoyomde ndinam mme Gentile emi mîkanaha mbobi ẹdisịne ke otu ikọt esie ama edisịm. Ẹma ẹdọhọ Peter ọkọkwọrọ ikọ ọnọ Cornelius emi ekedide owo Gentile, emi edisịnede ke otu akpa mme Gentile emi ẹdikabarede idi ikọt Abasi. Ọkọsọsọn̄ ndikụt owo Jew asan̄ade n̄kpọ ye owo Gentile. Ntre ikpaha owo idem nte akanade Peter ekpekpep nditre ndida mmọ nte mbon edem mmọ ẹsidade man enye ekeme ndikwọrọ ikọ nnọ mmọ. Ke ama ekedin̄wan̄a Peter se Abasi aduakde aban̄a mme Gentile, enye ama ọsọsọp okpụhọde nte enye ekesidade mmọ. Ke ntak oro ini Cornelius ọdọn̄de ẹdikot enye, Peter ama adaha aka, ‘ifan̄ake.’ (Utom 10:28, 29) Enye ama ọkọkwọrọ ikọ ọnọ Cornelius ye mbonufọk esie, mmọ ẹma ẹnyụn̄ ẹna baptism.​—Utom 10:21-23, 34, 35, 44-48.

8. Didie ke ikeme ndiwụt ke ikere n̄kpọ nte Jehovah? (1 Peter 3:8)

⁸ Ke ediwak isua ama ekebe, Peter ama ọdọhọ mme Christian “ẹnyene ekikere kiet.” (Kot 1 Peter 3:8.) Usụn̄ emi nnyịn emi idide ikọt Jehovah ikemede ndinyene ekikere kiet edi nnyịn ndikere n̄kpọ nte Jehovah ekerede, nte inyụn̄ ikụtde ke Bible emi edide Ikọ esie. Ke uwụtn̄kpọ, Jesus ama ọdọhọ mme mbet esie ẹnịm Obio Ubọn̄ akpa ke uwem mmọ. (Matt. 6:33) Ke ntak oro, asuanetop ke esop mbufo ekeme ndibiere ke imọn̄ inam utom usiakusụn̄ mîdịghe ke imọn̄ inam utom ofụri ini inọ Abasi ke usụn̄ en̄wen. Utu ke nnyịn ndidọhọ enye, ‘Etetem akai do, ke ekere idem?’ mîdịghe, ‘Ukûnyeneke etap se emende, afo enyene se afiaride ke ito ikwa,’ ẹyak ikam itịn̄ nti n̄kpọ iban̄a se enye aduakde ndinam oro inyụn̄ in̄wam enye ke usụn̄ ekededi emi ikemede.

SỤHỌDE IDEM

9-10. Didie ke Jesus okowụt ke imenen̄ede isụhọde idem?

⁹ Okoneyo oro mbemiso ẹwotde Jesus, enye ama ekpep Peter ye mme apostle eken akpan n̄kpọ kiet aban̄a nsụhọde-idem. Mbemiso ukpepn̄kpọ oro, Jesus ama ọdọn̄ Peter ye John yak ẹkụt ẹte ke ẹtịm n̄kpọ ẹben̄e akpatre udia emi imọ ididiade ye mmọ mbemiso imọ ikpade. Ana-edi ntịmidem oro ama esịne ndikụt ete ke besịn ye mme ọfọn̄ ukwọhọde-idem ẹdu man mbon emi ẹditienede idu ke itie-udia oro ẹkeme ndiyet ukot mmọ mbemiso ẹdiade udia. Edi ini uyet owo ukot oro ama ekem, anie edisụhọde idem iyet?

¹⁰ Jesus ama adaha ke idemesie akanam n̄kpọ emi owụtde ke imọ imosụhọde idem eti-eti. Ama enen̄ede akpa mme apostle esie idem ndikụt nte enye anamde utom emi ofụn akpanamde. Jesus ama osio ewụra esie enịm, emen ọfọn̄ ukwọhọde-idem ọbọbọ ke isịn, esịn mmọn̄ ke besịn oro, ọtọn̄ọ ndiyet mmọ ukot. (John 13:4, 5) Ana-edi ama ada ini ndiyet kpukpru apostle 12 oro ukot; enye ama akam eyet Judas emi okoyomde ndida enye nnọ. Kpa ye oro, Jesus ama osụhọde idem anam kpukpru oro. Ekem enye ama etehede idem obụp mmọ ete: “Nte mbufo ẹmefiọk se n̄kanamde ye mbufo? Mbufo ẹkot mi, ‘Andikpep’ ye ‘Ọbọn̄,’ ndien mbufo ẹmenen, koro se ndide edi oro. Ntre, edieke ami, emi ndide Ọbọn̄ ye Andikpep, n̄keyetde mbufo ukot, mbufo n̄ko ẹkpenyene ndiyet kiet eken ukot.”​—John 13:12-14.

11. Didie ke Peter okowụt ke ima ikpep ndisụhọde idem? (1 Peter 5:5) (Se ndise n̄ko.)

¹¹ Peter ama ekpep nsụhọde-idem oto Jesus. Ke Jesus ama ọkọnyọn̄ heaven, Peter ama anam utịben̄kpọ ọkọk ete kiet emi akamanade mbụn̄ọ. (Utom 1:8, 9; 3:2, 6-8) Idịghe se ẹkpetetịn̄, utịben̄kpọ oro ama anam mme owo ẹdiyọhọ enye idem. (Utom 3:11) Peter okoto itie emi owo mîdaha uwọrọ-iso ibre mbre. Edi ndi oro ama anam ibuot okpon enye ini mme owo ẹkediyọhọde enye idem? Ihih-o, enye ama osụhọde idem ọdọhọ yak ẹkam ẹtoro Jehovah ye Jesus. Enye ọkọdọhọ ete: “Mmọdo [ebede ke] enyịn̄ [Jesus], sia nnyịn ibuọtde idem ke enyịn̄ esie, anam owo emi mbufo ẹkụtde ẹnyụn̄ ẹdiọn̄ọde okop nsọn̄idem.” (Utom 3:12-16) Aka ko, ini Peter ekewetde leta ọnọ mme Christian aban̄a nsụhọde-idem, ke ata ata usem emi enye akadade ewet itie oro, mme ikọ emi enye akadade ewet “ẹnam n̄kpọ ke nsụhọdeidem” akaban̄a owo ndisịne nsụhọde-idem nte ọfọn̄. Mme ikọ oro ẹnyụn̄ ẹnam iti ini emi Jesus ekemende ọfọn̄ ukwọhọde-idem ọbọp ke isịn eyet mme apostle esie ukot.​—Kot 1 Peter 5:5.

12. Didie ke ikeme ndika iso nsụhọde idem nte Peter?

¹² Imekeme ndikpep ndika iso nsụhọde idem ukem nte Peter. Ti ke ata nsụhọde-idem ikụreke ke nnyịn nditịn̄ mme ikọ emi ẹwụtde ke imosụhọde idem. Ikọ emi Peter ekewetde emi ẹkabarede nte nsụhọde-idem esịne se ikerede iban̄a idem nnyịn ye se ikerede iban̄a mbon en̄wen. Ima emi imade Jehovah ye mme owo esinam inam n̄kpọ inọ mbon en̄wen, idịghe ke ntak emi imade yak ẹtoro nnyịn. Edieke inemde-nem esịt inam n̄kpọ inọ Jehovah ye nditọ-ete nnyịn ke usụn̄ ekededi emi ikemede, edide mme owo ẹkụt se inamde m̀mê ikwe, ida oro iwụt ke imenen̄ede isụhọde idem.​—Matt. 6:1-4.

NYENE “ETI IBUOT”

13. Ndinyene “eti ibuot” esịne nso ye nso?

¹³ Ndinyene “eti ibuot” esịne nso ye nso? (1 Pet. 4:7) Christian emi enyenede eti ibuot esidomo ofụri ukeme esie ndibiere n̄kpọ ke usụn̄ emi owụtde ke enye ekere n̄kpọ nte Jehovah ekerede. Utọ Christian oro ọdiọn̄ọ ke inyeneke se idide akpan n̄kpọ ke uwem emi ikan nte imọ idide ufan ye Jehovah. Enye idaha idemesie ke n̄kpọ ikan nte akpadade, onyụn̄ ọdiọn̄ọ ke enyene mme n̄kpọ emi imọ mîdiọn̄ọke. Enye n̄ko esiwak ndisụhọde idem mbọn̄ akam nnọ Abasi, ndien oro owụt ke enye eberi edem ke Jehovah.b

14. Tịn̄ se iketịbede isan̄ kiet emi Peter mîkeberike edem ke Jehovah.

¹⁴ Okoneyo oro mbemiso ẹwotde Jesus, kop se enye eketịn̄de odụri mme mbet esie utọn̄ mi: “Kpukpru mbufo ẹyetuak ukot ẹduọn̄ọ ke ntak mi ke okoneyo emi.” Peter emi ekekerede ke inyeneke se ikemede ndiberi imọ nduọk ama ọdọhọ ete: “Kpukpru mmọ eken ẹkpetatuak ukot ẹduọn̄ọ ke ntak fo, ami ndituakke ukot nduọ tutu amama!” Kpa okoneyo oro, Jesus ama ọdọhọ ndusụk mbet esie ete: “Ẹdu ke ukpeme ẹnyụn̄ ẹka iso ndibọn̄ akam.” (Matt. 26:31, 33, 41) Ekpedi Peter ama anam item oro ini Jesus eketịn̄de, ana-edi enye ekpekenyene uko ọdọhọ ke imọdiọn̄ọ Jesus. Edi utu ke oro, Peter ama akan̄ Ete-ufọk esie; enye ama atua n̄kpọfiọk n̄kpọ oro eti-eti.​—Matt. 26:69-75.

15. Okoneyo oro mbemiso ẹwotde Jesus, didie ke enye okowụt ke imenyene eti ibuot?

¹⁵ Jesus ekeberi edem ke Jehovah kpukpru ini. Kpa ye emi enye ọkọfọnde ama, enye ama ọbọn̄ akam ediwak ini okoneyo oro mbemiso ẹwotde enye. Oro akanam enye enyene uko anam se Jehovah okoyomde enye anam. (Matt. 26:39, 42, 44; John 18:4, 5) Imenịm ke Peter ndikokụt nte Jesus ọkọbọn̄de akam ediwak ini ntre ama otụk enye tutu enye ifreke n̄kpọ oro ke ofụri eyo-uwem esie.

16. Didie ke Peter ekediwụt ke imọ ima ikpep ndinyene eti ibuot? (1 Peter 4:7)

¹⁶ Nte ini akakade, Peter ama ekpep ndisibọn̄ akam man enye enen̄ede eberi edem ke Jehovah. Jesus emi ẹkenamde eset ama ọdọhọ Peter ye mme apostle eken ke mmọ ẹyebọ edisana spirit man mmọ ẹkeme ndinam utom ukwọrọ-ikọ emi imọ ikọdọn̄de mmọ. Edi enye ama ọdọhọ mmọ ẹbet kan̄a ke Jerusalem tutu imọ inọ edisana spirit oro. (Luke 24:49; Utom 1:4, 5) Nso ke Peter akanam ini mmọ ẹsụk ẹbetde do? Peter ye mme Christian eken ẹma “ẹkọbọ ke akam.” (Utom 1:13, 14) Aka ko ini Peter ewetde akpa leta esie, enye ama ọdọhọ mme Christian ẹnyene eti ibuot ẹnyụn̄ ẹsibọn̄ akam ẹberi edem ke Jehovah. (Kot 1 Peter 4:7.) Peter ama ekpep ndiberi edem ke Jehovah onyụn̄ akabade edi adaha ke esop.​—Gal. 2:9.

17. Nso ke ana ika iso inam inamke n̄kpọ m̀mê nso utọ enọ ke inyene? (Se ndise n̄ko.)

¹⁷ Edieke iyomde ndinyene eti ibuot, ana isibọn̄ akam inọ Jehovah kpukpru ini. Imọdiọn̄ọ ke inamke n̄kpọ m̀mê nso utọ enọ ke inyene, ke ana ika iso ibọn̄ akam inọ Jehovah. Ke ntak oro, ana isibọn̄ akam idọhọ Jehovah ada nnyịn usụn̄ inyụn̄ inịm ke enye ọdiọn̄ọ se ifọnde ikan ye nnyịn akpan akpan ke ini inyenede mme akpan n̄kpọ emi anade ibiere.

18. Nso idin̄wam nnyịn isinen̄ede ikere n̄kpọ nte Jehovah?

¹⁸ Enen̄ede enem nnyịn nte Jehovah okobotde nnyịn ke usụn̄ emi ikemede ndikpebe mme edu esie. (Gen. 1:26) Imọdiọn̄ọ ke inyeneke nte idikpebede Jehovah ndudue idụhe. (Isa. 55:9) Edi kpa nte ekedide ye Peter, imekeme ndidi eyo esiere, nnyịn inen̄ede ikere n̄kpọ nte Jehovah. Ẹyak inam ntre ke nnyịn ndika iso n̄kpebe nte Abasi esikerede n̄kpọ, ndisụhọde idem, ndinyụn̄ nnyene eti ibuot.