Dia Ufọn To Mme Itien̄wed Ufọt Page Bible

Mme itien̄wed ufọt page Bible ke Edisana N̄wed Abasi​—Edikabade Eke Obufa Ererimbot ẹsinam ẹkụt ke se ẹtịn̄de ke itie Bible kiet ekem ye se ẹtịn̄de ke itie Bible en̄wen. Nte asan̄ade edi ntre edi mmọ ndinam fi okụt mme itie Bible en̄wen emi ẹnemede ukem n̄kpọ emi okotde, emi ẹnyụn̄ ẹtịn̄de mme n̄kpọ efen efen emi mîdụhe ke ebiet emi okotde. Okpoyom ndikụt mme itien̄wed ufọt page Bible emi ẹsan̄ade n̄kpọ ye se okotde, yom n̄kpri abisi emi ẹwetde ẹdian mme ikọ ke ebiet emi okotde. Ke Bible emi ẹmịn̄de-mịn̄, edikụt ukem abisi oro ke ufọt Bible oro, mîdịghe ke isọn̄ isọn̄, oyonyụn̄ okụt mme ufan̄ikọ Bible en̄wen emi ẹwetde ẹdian enye, emi ẹsan̄ade n̄kpọ ye se okotde. Ekpedi okot Bible ke jw.org m̀mê ke JW Library®, tụk ekpri abisi emi odude ke itie emi okotde man okụt mme itie Bible emi ẹsan̄ade n̄kpọ ye se osụk okotde oro.

Mme itien̄wed ufọt page Bible ẹkeme ndimen fi n̄ka kiet ke otu mme n̄kpọ emi iyomde ndisiak mi m̀mê akande oro:

Ukem mbụk oro: Itien̄wed ufọt page Bible ayanam fi okụt ebiet en̄wen emi ukem mbụk oro odude. Ke uwụtn̄kpọ, se 2 Samuel 24:1 ye 1 Chronicle 21:1.

Itie emi ẹdade ikọ oro ẹto: Itien̄wed ufọt page Bible oyowụt fi akpa itie emi ẹketịn̄de m̀mê ẹkewetde ikọ oro m̀mê udịmikọ oro. Ke uwụtn̄kpọ, se Matthew 4:4 ye Deuteronomy 8:3.

Prọfesi emi okosude: Itien̄wed ufọt page Bible ayanam okụt nte prọfesi emi ẹketịn̄de okosude. Ke uwụtn̄kpọ, se Matthew 21:5 ye Zechariah 9:9.