Jehovah Ekeme Ndinam Ikop Ata Idatesịt

1-2. (a) Etie didie ediwak owo mfịn ke idem? (b) Idineme nso ke ibuotikọ emi?

MME owo ke ererimbot emi ẹnam ofụri se mmọ ẹkekeme man ẹkop inemesịt. Edi adan̄a nte mmọ ẹbịnede idatesịt ẹka, ntre ke ọbọhọ mmọ ayan̄. Ata ediwak owo mfịn ẹsifụhọ esinyụn̄ etie mmọ ukpọk ukpọk ke idem. Ikọt Jehovah ẹsitiene ẹfụhọ, esinyụn̄ etie mmọ ukpọk ukpọk ke idem. Sia idude uwem ke “mme akpatre usen,” imọdiọn̄ọ ke iyosobo mme mfịna emi ‘ẹdisọn̄de ndiyọ,’ mfụhọ ye editịmede esịt emi ‘ẹdisọn̄de ndiyọ’ ẹyesịm nnyịn n̄ko.​—2 Tim. 3:1.

² Ke ibuotikọ emi, iyeneme mme n̄kpọ emi ẹkemede ndibọ nnyịn idatesịt ye nte ikemede ndifiak n̄kop idatesịt edieke n̄kpọ ọbọde nnyịn idatesịt. Edi yak ibem iso idiọn̄ọ Owo emi ekemede ndinam inyene ata inemesịt ye idatesịt.

OWO EMI EKEMEDE NDINAM INYENE ATA INEMESỊT YE IDATESỊT

3. Mme n̄kpọ emi Jehovah okobotde ẹkpep nnyịn nso aban̄a enye? (Se mme ndise n̄ko.)

³ Inyeneke ini emi Jehovah mîkopke inemesịt. Enye onyụn̄ oyom ikop inemesịt, itie idara idara. Ntre ikpaha nnyịn idem ndikụt utọ Abasi idatesịt emi enye edide ke mme n̄kpọ emi enye okobotde; itịn̄ iban̄a ediye ekondo nnyịn emi, ediwak kọlọ emi ikụtde, emi idinyụn̄ ikade-ka iso ikụt, ndinem udia emi ẹdide barasuene, ye mbre ye idọkọ emi mme unam ẹsisiode. Ke akpanikọ, Abasi ama nnyịn onyụn̄ oyom uwem enenem nnyịn!

Eyen enen: Image © Romi Gamit/Shutterstock; nditọ inuen inyan̄ibom emi ẹkotde ọkọnọ-ekpe: Vladimir Seliverstov/500px via Getty Images; nditọ ebot: Rita Kochmarjova/stock.adobe.com; iyak emi ẹkotde okụn̄abak: georgeclerk/E+ via Getty Images

4. (a) Didie ke Jehovah ekeme ndika iso n̄kop idatesịt kpa ye utọ ufen emi enye okụtde ke ererimbot? (b) Nso enọ ke Jehovah ọnọ nnyịn? (Psalm 16:11)

⁴ Kpa ye edide Jehovah edi “Abasi inemesịt,” kpukpru se inọde owo ubiakesịt ye ufen ke ererimbot emi, enye okụt. (1 Tim. 1:11) Edi enye iyakke oro anam enye okûnen̄ede ukop idatesịt aba. Enye ọdiọn̄ọ ke kpukpru ufen oro ẹdi n̄kpọ ekpri ini, enye ke idemesie enịm usen emi ufen oro editrede ke nsinsi. N̄kpọ en̄wen edi ke enye ke enyene ime ọyọ yak esịm usen emi enye editrede kpukpru ntuan̄a ye ufen ke nsinsi. Edi kan̄a ke emi, se iwọrọde nnyịn an̄wan̄a Jehovah, enye onyụn̄ oyom ndin̄wam nnyịn iyọ. Didie ke enye esin̄wam nnyịn? Usụn̄ kiet edi enye ndinam ikop idatesịt. Idatesịt oro edi enọ emi enye ọnọde nnyịn. (Kot Psalm 16:11.) Ẹyak ise nte enye ọkọnọde Jesus Eyen esie enọ oro.

5-6. Ntak emi Jesus esikopde idatesịt?

⁵ Ke otu kpukpru se Jehovah okobotde, Jesus okop inemesịt akan. Se ntak iba mi: (1) “Enye edi mbiet Abasi oro enyịn mîkwe,” enye onyụn̄ ebiet Ete esie ke kpukpru usụn̄. (Col. 1:15; se se ẹwetde ẹban̄a “happy” ke 1 Timothy 6:15 ke nwtsty.) (2) Ata inemesịt oto Jehovah emi edide Ete esie, inyụn̄ idụhe owo ndomokiet emi ama okodu ebịghi ye Jehovah nte Jesus.

⁶ Toto ke editọn̄ọ, Jesus esidadat esịt ndinam se ededi emi Ete esie ọdọhọde enye anam. (N̄ke 8:30, 31; John 8:29) Ke ntak emi enye ọsọn̄ọde ada anam se inemde Jehovah esịt, Jehovah enen̄ede ama enye onyụn̄ enem esịt ye enye.​—Matt. 3:17.

7. Nso ikeme ndinam ikop ata idatesịt?

⁷ Nnyịn n̄ko imekeme ndikop ata idatesịt edieke ikperede Jehovah emi esinọde owo ata inemesịt. Nte inen̄erede isio ini ida ikpep n̄kpọ iban̄a Jehovah inyụn̄ ikpebede enye, ntre ke idinen̄ede ikop inemesịt. N̄kpọ en̄wen emi edinamde ikop idatesịt edi nnyịn ndinam se Jehovah oyomde inam inyụn̄ idiọn̄ọ ke enye enem esịt ye nnyịn.a (Ps. 33:12) Edi ekpedi ke ini ke ini nnyịn ikopke idatesịt, mîdịghe edi ke nnyịn isikopke-kop, ikpanam didie? Ndi oro ọwọrọ ke Jehovah inemke esịt ye nnyịn? Ihih-o! Nnyịn ifọnke ima, ndien ndusụk ini n̄kpọ esibiak nnyịn, nnyịn ifụhọ, inyụn̄ inyene ọkpọsọn̄ editịmede esịt. Kpukpru oro an̄wan̄a Jehovah. (Ps. 103:14) Ẹyak ineme mme n̄kpọ emi ẹkemede ndibọ nnyịn idatesịt ye nte ikemede ndifiak n̄kop idatesịt.

KÛYAK N̄KPỌ NDOMOKIET ỌBỌ FI IDATESỊT FO

8. Mme mfịna uwem emi ẹkeme ndinam nnyịn nso?

⁸ Akpa n̄kpọ emi esibọde nnyịn idatesịt edi mfịna uwem emi. Ndi ke ẹkọbọ fi? Ndi ikan̄, mmọn̄, m̀mê oyobio abiat n̄kpọ fo? Ndi ebebuene, ọdọdọn̄ọ, mîdịghe usọn̄ edise fi? Mme n̄kpọ oro ẹkeme ndisọsọp mbọ nnyịn idatesịt akpan akpan ekpedi inyeneke se ikemede ndinam mban̄a mmọ. Bible ọdọhọ ke “mfụhọ esịt anam spirit obụn̄ọ,” nsu inyụn̄ isịneke ke ikọ oro. (N̄ke 15:13) Kop se Brọda Babis emi edide ebiowo, emi akpaneka esie ye ete ye eka ẹkekpade ẹkpọn̄ enye ke ufan̄ isua inan̄ etịn̄de. Enye ọdọhọ ete: “Eketie mi ukpọk ukpọk afiak etie mi nte nnyeneke eke an̄wamde mi. Ndusụk ini, se ikesinen̄erede ibiak mi ekedi ke mbemiso ete ye eka mi ye akpaneka mi ẹkekpade, mme mfịna emi n̄kenyenede ẹma ẹkponi tutu n̄kenen̄ekede nnyene ini nsidu ye mmọ.” Se, mme mfịna uwem emi ẹkeme ndibọ nnyịn odudu ẹnyụn̄ ẹnam ẹtie nte ke eke nnyịn okụre.

9. Nso ikeme ndin̄wam nnyịn ifiak ikop idatesịt? (Jeremiah 29:4-7, 10)

⁹ Nso ikeme ndin̄wam nnyịn ifiak ikop idatesịt? Imekeme ndifiak n̄kop idatesịt edieke idade uwem nte ikụtde inyụn̄ inemde esịt ke se inyenede. Eke mbon ererimbot emi edi ke ana kpukpru n̄kpọ ọfọn ama ke uwem nnyịn mbemiso nnyịn ikeme ndikop inemesịt. Edi nsu edi oro. Se uwụtn̄kpọ mi. Se Jehovah ọkọdọhọde ẹkedọhọ mme Jew emi ẹketan̄de ẹka Babylon ekedi ke sia mmọ ẹdude ke idụt en̄wen idaha-oro, yak mmọ ẹda uwem ntre ẹnyụn̄ ẹdomo nte ẹkekeme ndikop inemesịt kpa ye mîdimemke. (Kot Jeremiah 29:4-7, 10.) Ikpep nso ito oro? Nte uwem fo ekpetetie idaha-emi, domo nte ekekeme ndida enye nte okụtde nyụn̄ nem esịt ke nti n̄kpọ emi ẹtịbede ke uwem fo ye ke nti n̄kpọ emi afo enyenede. Ti ke Jehovah idikpọn̄ke fi, ke enye ayan̄wam fi. (Ps. 63:7; 146:5) Kop se Sista Effie emi ekenyenede aksiden emi akanamde enye okûkeme ndisan̄a aba ọdọhọde: “Jehovah ye mbonubon mi ye nditọ-ete ẹma ẹn̄wam mi eti-eti ẹnyụn̄ ẹberi mi edem. Ntre n̄kekere ke edieke nyakde uwem odorode mi, ke oro ọwọrọ ke nnemke esịt ke se mmọ ẹnamde ẹnọ mi. Nyom ndiwụt Jehovah ye mme ufan mi ke mmenen̄ede mma nte mmọ ẹn̄wamde mi.”

10. Ntak emi ikemede ndika iso n̄kop idatesịt idem ke ini inyenede mfịna?

¹⁰ Ekpededi uwem nnyịn itiehe nte akpanade etie, mîdịghe edi ke enyene-ndịk n̄kpọ etịbe ọnọ nnyịn m̀mê mbonubon nnyịn, imekeme ndisụk n̄ka iso n̄kop idatesịt.b (Ps. 126:5) Nso inam idọhọ ntre? Idọhọ ntre sia se isinamde ikop idatesịt ada ke idem, isan̄ake n̄kpọ ye nte n̄kpọ etiede ye nnyịn. Maria emi edide asiakusụn̄ ọdọhọ ete: “Ekpedi ke aka iso okop idatesịt ini enyenede mfịna, oro iwọrọke ke emefịk se isụk ibiakde fi oro enịm; akam ọwọrọ ke ufreke mme n̄kpọ emi Jehovah ọkọn̄wọn̄ọde. Ete nnyịn ayan̄wam nnyịn. Enye idiyakke se ededi emi etịbede ọnọ nnyịn ọbọ nnyịn idatesịt nnyịn.” Ti n̄ko ke ekpededi mme mfịna emi ẹsịmde nnyịn idaha-emi ẹsọn̄ nte nso, ke mmọ ẹdi n̄kpọ ibio ini ẹnyụn̄ ẹtie nte nde-ikpat ke esụk. Mmọn̄ emi ọtọde edi esụk esiyet nde-ikpat oro efep owo ikwe ukpọk mbukpọn̄ ntem. Ekpri ini, kpukpru mfịna nnyịn ẹyebe ẹfep, owo ikwe ukpọk mbukpọn̄ ntem.

11. Didie ke uwụtn̄kpọ apostle Paul ọsọn̄ọ fi idem?

¹¹ Edieke itọn̄ọde ndikere m̀mê kpukpru mfịna nnyịn ẹwụt ke Jehovah inemke esịt ye nnyịn aba, idinam didie? Se ikemede ndin̄wam edi ndikere mban̄a uwụtn̄kpọ nti ikọt Jehovah eken emi ẹkenyenede ata ikpọ mfịna. Kere ban̄a apostle Paul. Jesus ke idemesie ekemek enye ete emen eti mbụk ọsọk “mme idụt ye ndidem ye nditọ Israel.” (Utom 9:15) Idịghe ekpri utom ekedi oro! Edi mfịna ekesiyịre Paul ke ekpụkọfọn̄. (2 Cor. 11:23-27) Ndi mfịna Paul ndiketie nte edi ẹma ẹkịbi n̄kpọ-ikọt ebu eyịre ọkọwọrọ ke Jehovah ikenemke esịt ye enye aba? Nsa-o! Utu ke oro, nte Paul ekekemede ndiyọ kpukpru mfịna oro okowụt ke Jehovah do ye enye, ke Jehovah ke an̄wam enye. (Rome 5:3-5) Kere idaha-emi ban̄a se iwọrọde fi. Kpa ye kpukpru mfịna emi afo enyenede, afo ke ọsọn̄ọ ada ọyọ. Afo n̄ko nịm ke Jehovah enem esịt ye afo.

12. Nnyịn mîkemeke ndinam mme n̄kpọ emi ikebierede ndinam, didie ke oro ekeme ndibọ nnyịn idatesịt nnyịn?

¹² Ọyọhọ n̄kpọ iba emi esibọde nnyịn idatesịt edi nnyịn mîkemeke ndinam se ikebierede ndinam nnọ Abasi. (N̄ke 13:12) Ima emi imade Jehovah ye kpukpru se enye anamde ọnọ nnyịn ẹsinam ibiere ke iyanam emi mîdịghe inam oko inọ enye. Edi ekpedi se ibierede edi n̄kpọ emi ubọk nnyịn mîsịmke ke ntak nte n̄kpọ etiede ye nnyịn, idem ekeme ndimem nnyịn. (N̄ke 18:14) Asiakusụn̄ kiet emi ekerede Holly ọdọhọ ete: “N̄koyom ndika Ufọkn̄wed Mme Ọkwọrọ Obio Ubọn̄, ndika n̄kodu ke idụt en̄wen nnam n̄kpọ Abasi, m̀mê ndiketiene mbọp n̄kpọ nnọ esop Abasi ke Ramapo. Edi n̄kpọ ikeditiehe aba nte ekesitiede, n̄konyụn̄ n̄kemeke ndinam ndomokiet ke otu mme n̄kpọ oro. Ama abiak mi-o. Esibiak owo eti-eti owo ama enyene mme n̄kpọ emi enye oyomde ndinam, edi ikemeke ndinam ndomokiet.” Esitie ediwak nnyịn nte eketiede sista oro.

13. Nte n̄kpọ etiede ye nnyịn mîyakke inam n̄kpọ Abasi adan̄a nte ikpamade ndinam, nso ke ikeme ndibiere ndinam?

¹³ Nso ikeme ndin̄wam nnyịn ifiak ikop idatesịt? Ti ke Jehovah idịghe Abasi emi oyomde iwowot idem inọ enye. Enye idọhọke inam se ikponde ikan nnyịn; enye isinyụn̄ idaha se ikemede ndinam nnọ enye ibiere m̀mê imọsọn̄ urua ke enyịn esie m̀mê isọn̄ke. Jehovah oyom isọn̄ọ ida ye imọ inyụn̄ idiọn̄ọ ebiet emi odudu nnyịn etrede. (Mic. 6:8; 1 Cor. 4:2) Se itịmde ibehe enye edi utọ owo emi idide, idịghe se ikemede ndinam m̀mê se nnyịn mîkemeke ndinam. Ndi ọkpọfọn yak edi Jehovah idọhọke inam se ikponde ikan nnyịn, nnyịn mme enyene-idem idọhọ ke akpana inam?c Ihih-o, ifọnke nan̄a! Edieke nte n̄kpọ etiede ye afo idaha-emi iyakke ekeme ndinam kpukpru se akpamade ndinam nnọ Jehovah, sịn ekikere ke se ekemede ndinam idaha-emi. Ndi emekeme ndikpep mme uyen se mmọ ẹkpenamde mîdịghe ọsọn̄ọ mbon emi ẹma ẹkekpon owo idem? Ndi emekeme ndibiere ndisikot owo ke esop mbufo ke fon mîdịghe ọnọ enye etop ọsọn̄ọ enye idem? Jehovah ayanam okop idatesịt nte osụk esịnde idem anam utọ nti n̄kpọ emi ubọk fo ekemede ndisịm do! Ti n̄ko ete ke ibịghike, ke obufa ererimbot emi Jehovah edimende idi ke iyenen̄ede inyene ifet ndinam nsio nsio n̄kpọ nnọ enye ke usụn̄ emi nnyịn mîkekereke-kere! Holly emi ima iketetịn̄ iban̄a ọdọhọ ete: “Mmesisụhọde ntie ndọhọ idemmi nte, ‘Nyodu uwem ke nsinsi.’ Ke obufa ererimbot, Jehovah ayan̄wam mi nnam ndusụk se n̄kebierede ndinam nnọ enye.”

14. Nso efen ikeme ndibọ nnyịn idatesịt?

¹⁴ Ọyọhọ n̄kpọ ita emi esibọde nnyịn idatesịt edi ndida udia-uwem nte akakan n̄kpọ ke uwem. Ndusụk owo ẹsidọn̄ se mmọ ẹdọn̄de ke Intanet ndiwụt ke nnyịn ndinam se inemde nnyịn esinam owo okop inemesịt inyụn̄ inyeneke mfịna ke uwem. Se mmọ ẹn̄wanade ndidọhọ mme owo edi ke ndinam mme n̄kpọ emi ẹnọde nnyịn inemesịt, ndidep se ikpamama, ye ndika n̄kese nsio nsio itie ẹkpedi akpan n̄kpọ ke uwem nnyịn. Ndinam mme n̄kpọ oro idịghe idiọkn̄kpọ. Jehovah okobot nnyịn ke usụn̄ emi ikemede ndima nti n̄kpọ ye mme n̄kpọ emi ẹyede. Edi ediwak owo ẹkụt ẹte ke mme n̄kpọ emi mmimọ ikekerede ke ayanam esịt adat mmimọ akam ọbọbọ mmimọ idatesịt. Sista Eva emi edide asiakusụn̄ ọdọhọ ete: “Ekpedi n̄kukụre se ibehede nnyịn inyụn̄ idide akpan n̄kpọ inọ nnyịn edi ndinem idem esịt, inyeneke se idinamde inem idem esịt yak oyụhọ nnyịn.” Udia-uwem ekpedi akakan n̄kpọ ke uwem nnyịn, idiyụhọke nnyịn. Utịt utịt iyofụhọ, oyonyụn̄ etie nnyịn ukpọk ukpọk ke idem.

15. Nso ke ikeme ndikpep nto Edidem Solomon?

¹⁵ Omokụt udia-uwem mme owo ẹsụk ẹdade nte akpan n̄kpọ ẹkan ke uwem mi, utịt esie esinyene nte etiede. Imekeme ndikpep oro nto uwụtn̄kpọ Edidem Solomon. Enye ama anam nsio nsio n̄kpọ emi ẹkenemde enye man enye odomo ndikop inemesịt. Enye ama adia nti udia, okop nti ikwọ; kpukpru nti n̄kpọ emi ẹkekemede ndida okụk ndep ke eyo esie, enye ama edep. Edi enye inemesịt oro, Solomon ikekwe. Enye ọkọdọhọ ete: “Ndise iyụhọke enyịn, edikop inyụn̄ iyụhọke utọn̄.” (Eccl. 1:8; 2:1-11) Se ererimbot emi ẹdọhọde ke enye anam owo okop ata idatesịt etie nte okụk emi mîdịghe ata ata okụk. Ke enyịn, ekeme ndibiet ata ata okụk, edi inyeneke ufọn ndomokiet. Mme n̄kpọ oro ẹkeme nditie nte se inamde owo okop ata ata idatesịt, edi tutu amama ikemeke ndinam owo okop ata idatesịt.

16. Didie ke nnyịn ndinam n̄kpọ nnọ mbon en̄wen ekeme ndinam ifiak ikop idatesịt? (Se mme ndise n̄ko.)

¹⁶ Nso ikeme ndin̄wam nnyịn ifiak ikop idatesịt? Jesus ekekpep nnyịn ete ke “inemesịt odu ke ndinọnọ akan ke ndibọbọ.” (Utom 20:35) Ebiowo kiet emi ekerede Alekos ọdọhọ ete: “Mmesinen̄ede ndomo ndinam n̄kpri n̄kpri n̄kpọ nnọ mbon en̄wen. Adan̄a nte nnen̄erede n̄n̄wam mbon en̄wen, ntre ke nsikeme ndisio ekikere n̄kpọn̄ mfịna mi nnyụn̄ n̄kop idatesịt.” Nso ke afo ekeme ndinam nnọ mbon en̄wen? Okpokụt nte owo ofụhọde, domo ndidọn̄ enye esịt. Ekeme ndinam udûkemeke ndikọk mfịna esie, edi emekeme ndikpan̄ utọn̄ nnọ enye, okop enye mbọm, onyụn̄ eti enye nditop mbiomo esie nnọ Jehovah. Nte ekemede ndidọn̄ enye esịt edi oro. (Ps. 55:22; 68:19) N̄kpọ en̄wen emi ekemede ndinam edi ndin̄wam enye okụt ke Jehovah iyetke ubọk ikpọn̄ enye. (Ps. 37:28; Isa. 59:1) Emekeme ndinanam n̄kpọ n̄n̄wam enye, utọ nte nditem udia nnọ enye mîdịghe ọdọhọ enye asan̄a ye afo ọbọ ofụm. Dọhọ enye edi yak mbufo ẹsan̄a ntre ẹka ukwọrọ-ikọ; ukwọrọ-ikọ ayanam esịt enem enye. Yak Jehovah ada fi ọsọn̄ọ mbon en̄wen idem. Nnyịn ndinen̄ede n̄kere mban̄a mbon en̄wen utu ke idem nnyịn ayanam ikop ata idatesịt!​—N̄ke 11:25.

17. Jehovah asan̄a nso ye idatesịt nnyịn? (Psalm 43:4)

¹⁷ Edieke ikade iso ikpere Ete nnyịn emi odude ke heaven, iyokop ata inemesịt. Bible ọn̄wọn̄ọ ọnọ nnyịn ke Jehovah edi “akwa idatesịt” nnyịn. (Kot Psalm 43:4.) Ntre inamke n̄kpọ m̀mê nso ke isobo ke uwem emi, ufọn idụhe nditịmede esịt m̀mê ndifụhọ. Ẹyak ika iso inen̄ede idori enyịn ke Jehovah, kpa Enye emi ekemede ndinam ikop ata idatesịt ke nsinsi nsinsi!​—Ps. 144:15.