Mbufa Owo Iba Emi Ẹkemekde Ẹsin ke Otu Emi Ẹsede Ẹban̄a Utom Mme Ntiense Jehovah

KE OCTOBER 5, 2024, ẹma ẹnọ akpan ntọt kiet ke mbono ofụri isua Watch Tower Bible and Tract Society of Pennsylvania. Ẹkedọhọ ke ẹmek Brọda Jody Jedele ye Brọda Jacob Rumph ẹsịn ke mbon Otu Emi Ẹsede Ẹban̄a Utom Mme Ntiense Jehovah. Brọda iba emi ẹsọn̄ọ ẹda ẹnam n̄kpọ Jehovah ke ediwak isua.

Brọda Jedele akamana ke Missouri ke U.S.A. Ete ye eka esie ẹkedi Mme Ntiense Jehovah. Ebiet emi ubon mmọ ẹkedụn̄de ama ekpere itie kiet emi Mme Ntiense Jehovah mîkawakke. Oro ama anam enye osobo ye ediwak mme brọda emi ẹtode nsio nsio itie, emi ẹkesidide do ẹdin̄wam yak ẹkwọrọ eti mbụk. Nte mmọ ẹkemade kiet eken ẹnyụn̄ ẹdianade kiet ama enen̄ede otụk enye. Enye akana baptism ke October 15, 1983 ini enye mîkọyọhọke isua 16 kan̄a. Ukwọrọ-ikọ ama esinem enye eti-eti. Ndien ke enye ama okokụre ufọkn̄wed sekọndri, enye ama ọtọn̄ọ utom usiakusụn̄ ofụri ini ke September 1989.

Ini Brọda Jedele ekedide uyen, ete ye eka esie ẹma ẹsiwak ndimen enye ye adiaha-eka esie n̄ka Bethel. Mmọ ndikesika n̄kese Bethel ntre ama anam Brọda Jedele ye adiaha-eka esie ẹbiere ke mmimọ idinam utom ke Bethel ima ikpon; mmọ ẹma ẹnyụn̄ ẹnam. Brọda Jedele ekedisịm Bethel Wallkill ke September 1990. Enye ekebem iso anam utom ke itie-utom emi ẹsinamde Bethel asana. Aka ko, enye ama anam utom ye itie-utom emi ẹsisede ẹban̄a nsọn̄idem mbonubon Bethel.

Kpa ke idaha ini oro, mme esop emi ẹsemde Spanish ke n̄kann̄kụk oro ẹma ẹtọt ẹnyụn̄ ẹnen̄ede ẹyom nditọ-ete irenowo ẹdin̄wam. Ntre Brọda Jedele ama ọwọrọ aka esop usem Spanish kiet onyụn̄ ọtọn̄ọ ndikpep usem oro. Ikebịghike enye ama osobo ye Sista Damaris emi ekedide asiakusụn̄ kpa ke circuit oro. Nte ini akakade mmọ ẹma ẹnam ndọ, enye onyụn̄ editiene enye odu ke Bethel.

Ke 2005, mmọ ẹma ẹkpọn̄ Bethel. Mmọ ẹkeka ndise mban̄a ete Brọda Jedele ye ete ye eka Sista Jedele emi ẹkesọn̄ọde ẹda ẹnam n̄kpọ ẹnọ Jehovah. Ini mmọ ẹsụk ẹsede mbonubon mmọ enyịn do, mmọ ẹkedi mme asiakusụn̄ ofụri ini. Brọda Jedele ama esin̄wam ekpep Ufọkn̄wed Mme Asiakusụn̄, enye ama onyụn̄ edi owo Kọmiti Unyene Nneme ye Mbon Ufọkibọk ye owo Kọmiti Ubọpufọk Eke Ikpehe ke Ikpehe.

Ke 2013, ẹma ẹkot Brọda Jedele ye n̄wan esie ẹfiak ẹdidu ke Bethel ẹn̄wam ke utom ubọpn̄kpọ emi akakade iso ke Warwick. Mmọ ẹsụk ẹdu ke Bethel tọn̄ọ oro. Mmọ ẹma ẹdu n̄ko ke Bethel ke Patterson ye ke Wallkill. Brọda Jedele ama anam utom ke Itie-Utom Emi Ẹsede Ẹban̄a Ubọpn̄kpọ ke Idụt Mmọ ye ke Itie-Utom Utịm Ntọt Ufọkibọk. Ke March 2023, ẹma ẹmek enye andin̄wam Kọmiti Utom Otu Emi Ẹsede Ẹban̄a Utom Nnyịn. Ini Brọda Jedele etide nsio nsio utom emi enye anamde ke esop Abasi, enye ọdọhọ ete: “Ama enyene mbufa utom, ndusụk ini ekeme nditie fi nte ke mme utom oro ẹkpon ẹkan fi. Edi ini oro ke ana afo eti ndiberi edem ke Jehovah sia enye edi enye emi ekemede ndin̄wam fi ekeme ndinam se ededi emi enye ọdọhọde fi anam.”

Brọda Rumph akamana ke California ke U.S.A. Ini enye edide ekpri, eka esie ama etre ndidụk mbono esop onyụn̄ etre ndika ukwọrọ-ikọ, edi enye ama odomo ndikpep Brọda Rumph akpanikọ emi odude ke Bible. N̄kpọ en̄wen edi ke kpukpru isua, brọda oro ama esika ekese eka-ete esie emi okosụk ọsọn̄ọde ada anam n̄kpọ ọnọ Jehovah. Enye ama anam ọdọn̄ Brọda Rumph ndidiọn̄ọ akpanikọ. Ntre ini brọda oro edide isua 13, enye ama ọdọhọ ke ikpama ndikpep Bible. Enye ama ana baptism ke September 27, 1992, ini enye mîkọyọhọke isua 20 kan̄a. Se inamde mbụk emi enen̄ede enem edi ke eka esie ama afiak ọtọn̄ọ ndika ukwọrọ-ikọ nnyụn̄ ndụk mbono esop. Ete esie ye kpukpru nditọ-eka esie ẹma ẹkpep akpanikọ ẹnyụn̄ ẹna baptism.

Ini Brọda Rumph edide uyen, enye ama okụt ke esịt esinenem mme asiakusụn̄. Ntre ke enye ama okokụre ufọkn̄wed sekọndri, enye ama ọtọn̄ọ utom usiakusụn̄ ke September 1995. Ke 2000, enye ama ọwọrọ okodu ke itie kiet ke Ecuador emi ẹkeyomde-yom mme ọkwọrọ-ikọ. Do ke enye okosobo Sista Inga emi otode Canada onyụn̄ edide asiakusụn̄. Nte ini akade mmọ ẹma ẹnam ndọ. Ke mmọ ẹma ẹkenam ndọ, mmọ ẹma ẹdu ke obio kiet ke Ecuador ye otu emi ẹnyenede ibat ibat mme asuanetop ẹnam n̄kpọ Abasi. Mfịn emi, esop emi ọsọn̄de idem odu ke obio oro.

Nte ini akakade, ẹma ẹmek Brọda Rumph ye n̄wan esie mme akpan asiakusụn̄, aka ko, mmọ ẹtọn̄ọ utom circuit. Ke 2011, ẹma ẹkot mmọ Ufọkn̄wed Gilead, ọyọhọ klas 132. Ke mmọ ẹma ẹkekụre Ufọkn̄wed Gilead, mmọ ẹma ẹnam n̄kpọ Abasi ke nsio nsio idụt ẹnyụn̄ ẹnam nsio nsio utom ẹnọ Abasi, utọ nte utom Bethel, utom isụn̄utom, ye utom circuit. Brọda Rumph ama etiene ekpep Ufọkn̄wed Mme Ọkwọrọ Obio Ubọn̄.

Ke ntak udọn̄ọ COVID-19, Brọda Rumph ye n̄wan esie ẹma ẹfiak ẹnyọn̄ United States. Ẹkekot mmọ ẹdidu ke Bethel ke Wallkill. Do ke ẹkenọ Brọda Rumph ukpep ke Itie-Utom Utịmutom. Aka ko, ẹma ẹdọhọ mmọ ẹfiak ẹkedu ke n̄kọk itie-utom Ecuador. Brọda Rumph akanam utom nte owo Kọmiti N̄kọk Itie-Utom ke idụt oro. Ke 2023, mmọ ẹma ẹnyọn̄ ẹdidu ke Warwick. Ke January 2024, ẹma ẹmek Brọda Rumph andin̄wam Kọmiti Utom Otu Emi Ẹsede Ẹban̄a Utom Nnyịn. Nte Brọda Rumph etiede ekere mme itie emi enye odude anam n̄kpọ ọnọ Abasi, enye ọdọhọ ete: “Se inamde utom emi afo anamde ọnọ Abasi edi san̄asan̄a utom edi mme owo emi afo adianade kiet anam utom oro, idịghe ebiet emi afo odude anam utom oro.”

Imama ọkpọsọn̄ utom emi brọda iba emi ẹnamde, iyonyụn̄ ‘ika iso ikpono mme utọ owo emi.’​—Phil. 2:29.