Isua Ikie Emi Ẹbede—1913

ẸMA ẹmịn̄ ikọ Herbert Kaufman, ọwọrọetop ọkọmbụk n̄kpọntịbe owo America, ke Enyọn̄-Ukpeme January 1, 1913. Ọbọn̄ oro ọkọdọhọ ete: “Ikọ oro ‘owo ikemeke ndinam’ edidi ikọ eset idahaemi . . . Ke ẹnam ata ediwak n̄kpọ oro ẹkesikerede ke owo ikpekemeke ndinam.” Ke ntọn̄ọ ntọn̄ọ 1913, mme owo ke ererimbot ẹkekere ke n̄kpọ ọyọfọn.

Mbufa ifiọk ubotn̄kpọ edi ntak kiet oro akanamde mme owo ẹkere ntre. Ke uwụtn̄kpọ, ke United States, Ufọkutom Ford Motor ẹma ẹsiak obufa itie unam moto ke Highland Park, ke Michigan. Ke ediyịp enyịn, ekọmurua moto ama enen̄ede osụhọde edi se ediwak miliọn owo ẹkemede ndidep. Didie ke ẹkenam ekọmurua moto osụhọde? Obufa itie unam moto emi ama enyene n̄kpọutom emi akanamde ẹkeme ndisọsọp mbọp moto. Ufọkutom Ford ẹma ẹkeme ndida enye mbọp ọwọrọetop moto oro ẹkekotde Model T Ford ke ata ekpri ini ẹkan nte ẹkesịnamde, ndien oro ama anam ekọmurua moto osụhọde.

Ikọt Jehovah ẹma ẹkere n̄ko ke n̄kpọ ọyọfọn, edi n̄kpọ en̄wen akanam mmọ ẹkere ntre. Ke ata anyan ini, Nditọ Ukpepn̄kpọ Bible ẹma ẹsitịn̄ ke 1914 edidi ata akpan isua ke mbụk ubonowo, ndien mmọ ẹma ẹdori enyịn ẹban̄a nsio nsio n̄kpọ n̄ko. Nte isua oro ekekperede, mmọ ẹma ẹsịn ifịk ẹnam utom, ikonyụn̄ iyakke idem emem mmọ.

Ke June 1913, ẹma ẹnịm mbono district usen kiet ke Kansas City, Missouri, U.S.A., ekem ẹnịm ke mme ebiet en̄wen. Ke urua inan̄ oro ẹketienede, tren oro ẹkedade ke ukpeokụk ama emen nditọete iren ye iban 200 oro ẹketiede idara idara aka nsio nsio itie ke edem usoputịn United States ye Canada. Ke mbono kiet kiet, ẹma ẹnọ mme andidụk ifet ndibụp sededi oro mmọ ẹyomde ndifiọk. Ediwak tọsịn owo ẹma ẹbụp mbụme, ndien nte ini akakade, Nditọ Ukpepn̄kpo Bible ẹma ẹfiak ẹkese mbon oro ẹkenyenede udọn̄.

Ke 1913, nditọete ke ibuot itieutom ke Brooklyn ẹma ẹsịn idem ẹtịm fim oro ẹkekotde “Photo-Drama of Creation.” Enye ekedi fim oro ọniọn̄de ke hour itiaita emi esịnede utịn̄ikọ Bible, ikwọ, ye ndiye ndise. Nditọ Ukpepn̄kpọ Bible ẹkenịm ke ẹyeda “Photo-Drama” ẹkwọrọ ikọ ẹnọ ediwak miliọn mbon oro ẹnyenede udọn̄, kpa ye oro asuanetop 5,100 kpọt ẹkedude ini oro. Mmọ ẹkeyom “ẹsịn ofụri ukeme ẹsio enye ẹwụt mme owo ke ofụri ererimbot.”

Nso iditịbe ke 1914? Ndi mme owo ẹyema ndise “Photo-Drama”? Nso iditịbe ke utịt Ini Mme Gentile? Nditọ Ukpepn̄kpọ Bible ẹma ẹnen̄ede ẹyom ndifiọk ibọrọ mbụme emi, ẹnyụn̄ ẹnịm ke Jehovah idikpọn̄ke mmimọ.

Akwa Ekọn̄ emi ekekperede ndisiaha, emi ẹkedidiọn̄ọde nte Akpa Ekọn̄ Ererimbot, ayanam mme owo ke ererimbot ẹtre ndikere ke n̄kpọ eyenen̄ede ọfọn. Mbufa ifiọk ubotn̄kpọ iditreke mfịna oro mme owo ẹsobode. Akwa ukpụhọde ayada itie ke 1914, emi editụkde nditọ Ukpepn̄kpọ Bible, ọkọrọ ye ofụri ererimbot.