Obufa Mbono Esop Uwem ye Utom Nnyịn Mme Christian

KE MBONO ofụri isua Watch Tower Bible and Tract Society of Pennsylvania eke October 3, 2015, Anthony Morris emi edide owo Otu Emi Ẹsede Ẹban̄a Utom Mme Ntiense Jehovah ama ọdọhọ ke mbono esop Uwem ye Utom Nnyịn Mme Christian ayada itie Ufọkn̄wed Utom Ukara Abasi, Esoputom, ye Ukpepn̄kpọ Bible Esop. Enye ama ọdọhọ n̄ko ke Utom Obio Ubọn̄ Nnyịn ididụhe aba, ke ediye obufa n̄wed emi edide page itiaita, emi ẹkotde N̄wed Mbono Esop Uwem ye Utom Nnyịn Mme Christian edidu. Ẹyewet se ẹdinamde ke mbono esop urua kiet kiet ke n̄wed oro, ẹnyụn̄ ẹdọn̄ ndiye ndise emi ẹdinamde se owo okotde ke Bible enen̄ede an̄wan̄a enye.

Ẹbahade mbono esop emi ẹsịn ke ikpehe ita:

1. Mme Akpan N̄kpọ ke Ikọ Abasi. Akpa ikpehe mbono esop emi edi utịn̄ikọ a-minit duop emi aban̄ade itie N̄wed Abasi eke urua oro ye ndise emi aban̄ade itien̄wed oro ke n̄wed mbono esop oro. Ọyọhọ ikpehe iba emi ekerede “Yom N̄kpọuto ke Ikọ Abasi” esidi minit itiaita, onyụn̄ edi mbụme ye ibọrọ emi aban̄ade itie Bible urua oro. Akpatre n̄kpọ ke ikpehe emi edi edikot Bible a-minit inan̄.

2. Kpep Ndikwọrọ Ikọ Ọfọn. Se ẹsiwakde ndinam ke ikpehe emi edi nditọ ufọkn̄wed ita ndinam n̄wụt nte ikpọkwọrọde ikọ inọ owo ke akpa ini, nte ikpanamde mfiakn̄ka, ye nte ikpekpepde owo Bible.

3. Nte Christian Okpodude Uwem. Ikpehe emi aban̄a nte ikpadade se ikpepde ke Ikọ Abasi idu uwem kpukpru usen. Akpan n̄kpọ ke ikpehe emi edi Ukpepn̄kpọ Bible Esop, emi edide mbụme ye ibọrọ.

Mme asuanetop ke ofụri ererimbot ẹtịn̄ nte imade nti n̄kpọ emi obufa mbono esop emi ekpepde mmimọ. Eyenete kiet ke Australia ekewet ete: “Mbono Esop Uwem ye Utom Nnyịn ọfọn etieti! Se ẹsinemede enen̄ede ebehe nnyịn idahaemi, ndien se ikemede nditịn̄ ke ini ikwọrọde ikọ m̀mê ke ini inọde owo n̄wed inyụn̄ isọn̄ke. Idahaemi n̄kpọ ẹdi mbio mbio, an̄wan̄a owo, ẹbre vidio, nditọwọn̄ ẹnyụn̄ ẹtiene ẹsịn uyo. Esinem tutu edidi etibọp enyịn itat mbono esop asuana.”

Mbiowo esop kiet ke Italy ẹkewet ẹte: “Imokụt ke obufa mbono esop emi anam kpukpru nnyịn isinen̄ede itịm idem inọ mbono esop; emi onyụn̄ anam inen̄ede idiọn̄ọ ndikpep n̄kpọ. Mbono esop emi edi obufa usụn̄ emi Jehovah adade ekpep ikọt esie n̄kpọ. Asuanetop kiet emi edide isua 15 ọkọdọhọ ete: ‘Akpa akpa, ekesisọsọn̄ mi ndikpan̄ utọn̄ ke mbono esop. Edi nte obufa mbono esop emi etiede anam nsinen̄ede n̄kpan̄ utọn̄ idahaemi nnyụn̄ ntịm idem ke ufọk.’ ”

Ubon kiet ke Austria ẹkewet ẹte: “Ama esisọn̄ eyen nnyịn emi edide isua duop ndidiọn̄ọ se ekpetịn̄de ke ini ikotde itie Bible eke urua ke urua ye enye. Edi ikpehe emi ẹkotde, ‘Mme Akpan N̄kpọ ke Ikọ Abasi’ anam kpukpru nnyịn inyene ediwak n̄kpọ nditịn̄. Idahaemi, edinenem nnyịn mbita ndikot itie Bible eke urua ke urua nnyụn̄ nneme se ikpepde. Se inemde nnyịn ikan edi ndikụt nte eyen nnyịn amade n̄kpọ Abasi.”

Ines emi otode Germany ọdọhọ ete: “Esidọn̄ mi idahaemi nditịm idem nnọ mbono esop, nnyụn̄ nnen̄ede ntie n̄kere se n̄kpepde. N̄kesinamke ndụn̄ọde ntem akpa, mmonyụn̄ nnen̄ede n̄kpere Jehovah idahaemi. Ererimbot Satan esinam idem emem mi, uwem onyụn̄ akak mi. Edi mbono esop esisọn̄ọ mi idem onyụn̄ anam n̄ka iso nnyene idotenyịn.”

Mbono esop ufọturua enen̄ede enem mme esop ke Solomon Islands idahaemi, mmọ ke ẹnyụn̄ ẹnam se ẹkekeme man ẹnen̄ede ẹbọ ufọn ẹto mbono esop emi. Ediwak esop ẹdu ke ata esịt esịt, ikan̄ idụhe, Intanet idụhe, nditọete do ẹnyụn̄ ẹtatan̄ade n̄kpọ ẹda ẹdu uwem. Mmọ ẹnam didie ndien ẹnyene n̄kpọ ndida mbre vidio ke mbono esop emi? Mme asuanetop ke esop kiet ke isuo emi ekerede Malaita ẹma ẹbiere ndisan̄a kiet ntan̄ nsat isịp mbakara nnyam. Mmọ ẹma ẹda okụk isịp oro ẹnọ esop ẹda ẹdep ekpri n̄kpọ ubre vidio emi ẹsidade eyo ẹ-charge. Kpukpru ọfiọn̄, ndusụk nditọete irenowo ẹsika itie emi Intanet odude ke mbọhọ obio mmọ ẹkesion̄o n̄kpọ ke jw.org, ẹditiene ẹnọ nditọete eken ke esop.

Eyenete kiet ke United States ekewet ete: “N̄kpọ esinen̄ede an̄wan̄a mi mma n̄kụt ke ndise ye vidio. Ikememke inọ mi isua 40 emi osụk ebede. Mbemiso n̄kpọ emi ewetde an̄wan̄a mi yak n̄keme ndinam enye an̄wan̄a owo en̄wen, akana nsikot mfiak n̄kot. Enye anam nyom ndikọm Otu Emi Ẹsede Ẹban̄a Utom Nnyịn ke nsio nsio ndise ye vidio emi mmọ ẹsinọde nnyịn. Mme vidio oro ẹsiban̄ade mme n̄wed Bible kiet kiet ẹfọn etieti, mme ndise emi ẹsidude ke n̄wed mbono esop nnyịn ẹsinyụn̄ ẹnam n̄kpọ enen̄ede an̄wan̄a mi. Se mbufo ẹnamde emi owụt ke Jehovah ọdiọn̄ ukeme emi mbufo ẹsịnde ndin̄wam mme owo. Ẹsọsọn̄ọ ata etieti.”