Russia Ẹtọn̄ọ Ekọn̄ ye Ukraine

Russia ẹma ẹtọn̄ọ ekọn̄ ye Ukraine usenubọk February 24, 2022, kpa ye ofụri se ikpọ owo ukara ke nsio nsio itie ke ererimbot ẹkenamde man ekọn̄ idisiaha. Didie ke ekọn̄ emi edifịna ofụri ererimbot? António Guterres, emi edide akwaowo United Nations, emi ẹdiọn̄ọde nte Esop Edidiana Mme Idụt, ọkọdọhọ usen ifan̄ emi ẹkebede ete: “Inua ikemede ndibụk ufen emi mme owo ẹdibọde ye nte ekọn̄ emi edibiatde n̄kpọ iketre. Kpukpru idụt ke Europe ye ke ofụri ererimbot idinyeneke aba ifụre.”

Nso ke Bible etịn̄ aban̄a ekọn̄ nte enye emi?

• Jesus Christ ọkọdọhọ ke ini ke edi emi “idụt [edidahade] an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen.” (Matthew 24:7) Mbọk kot ibuotikọ emi, “Nso Idi Idiọn̄ọ ‘Mme Akpatre Usen,’ M̀mê Idiọn̄ọ ‘Utịt Ererimbot Emi’?” man okụt nte Bible owụtde ke ekọn̄ emi mme owo ẹn̄wanade mfịn osu se Jesus eketịn̄de.

• Bible ọdọhọ ke andiwat “ididuot enan̄-mbakara” emi ẹtịn̄de ẹban̄a ke Ediyarade ada aban̄a ekọn̄. Ndien ekọn̄ iyakke emem odu ke isọn̄ emi. Mbọk kot ibuotikọ emi, “Mmanie Ẹdi Mme Awat Enan̄-Mbakara Inan̄?” man okụt nte ekọn̄ emi ẹn̄wanade mfịn osude prọfesi oro.

• N̄wed Daniel ọkọdọhọ ke “edidem edere” oyodomo idem ye “edidem usụk.” (Daniel 11:25-45) Mbọk se vidio emi, Prọfesi Oro Osude​—Daniel Ibuot 11 man okụt ntak ẹdọhọde ke Russia ye kpukpru idụt emi ẹdianade ye mmọ ẹdi edidem edere emi prọfesi Daniel etịn̄de aban̄a.a

• N̄wed Ediyarade etịn̄ n̄ko aban̄a “ekọn̄ akwa usen Abasi Ata Ọkpọsọn̄.” (Ediyarade 16:14, 16) Edi ekọn̄ enye emi idịghe ekọn̄ ubọk owo nte enye emi ẹsụk ẹn̄wanade mi. Mbọk kot ibuotikọ emi, “Nso Idi Ekọn̄ Armageddon?” man ọdiọn̄ọ n̄kpọ aban̄a ekọn̄ enye emi. Ekọn̄ enye emi editịbe ke ini iso.

Ntak emi ikpodoride enyịn ke n̄kpọ ọyọfọn ke ini iso?

• Bible ọdọhọ ke Abasi ayanam “ekọn̄ etre tutu esịm utịt isọn̄.” (Psalm 46:9) Mbọk kot ibuotikọ emi, “A Real Hope for a Better Tomorrow,” (Imenịm ke N̄kpọ Ọyọfọn) man okụt se Abasi ọn̄wọnọde ndinam nnọ nnyịn ke ini iso.

• Jesus ekekpep mbet esie ete ẹsibọn̄ akam ẹben̄e Abasi ẹte Obio Ubọn̄ Esie edi. (Matthew 6:9, 10) Obio Ubọn̄ oro edi ukara Abasi ke heaven emi edinamde se Abasi aduakde ke isọn̄ emi. N̄kpọ kiet emi Abasi aduakde edi ndinam emem odu ke ofụri ererimbot. Mbọk se vidio emi, Nso Idi Obio Ubọn̄ Abasi? man okụt se Obio Ubọn̄ Abasi edinamde inọ fi.

Mme Ntiense Jehovah emi ẹdude ke Ukraine ẹwak ẹbe owo 129,000. Mmọ ye Mme Ntiense Jehovah ke ofụri ererimbot ke ẹdomo ndidu uwem nte Jesus okodude. Mmọ isisịnde idem ke n̄kpọ pọlitik isinyụn̄ itieneke in̄wana ekọn̄. (John 18:36) Mme Ntiense Jehovah ke ofụri ererimbot ke ẹkwọrọ “eti mbụk obio ubọn̄” Abasi ẹnọ mme owo sia Obio Ubọn̄ Abasi kpọt editre ekọn̄ ye kpukpru afanikọn̄ ererimbot emi. (Matthew 24:14) Yom usụn̄ nyene nneme ye nnyịn man ineme n̄kpọ en̄wen iban̄a idotenyịn emi Bible ọnọde nnyịn.