Anton Petrus/Moment via Getty Images
ẸKÛTIE KE NDUE-IDEM!
Ndi Ekọn̄ Ofụri Ererimbot Ayafiak An̄wana?—Se Bible Etịn̄de
Ke ufan isua 30 oro ebede, ediwak owo ẹkekere ke mme idụt ke ofụri ererimbot ẹfiak ẹtọn̄ọ ndidiana kiet. Edi, mme n̄kpọ oro ẹtịbede usen ifan̄ emi ẹwụt ke oro idịghe akpanikọ.
Mbụk nkpọntịbe Reuters, eke January 6, 2024, ọkọdọhọ ete: “Mme owo ẹkere ke ekọn̄ Gaza eyebe odụk idụt en̄wen, sia Israel ye Hezbollah ẹtọn̄ọ ndin̄wana ke adana Lebanon.”
N̄wedmbụk n̄kpọtịbe The New York Times eke January 7, 2024, ọkọdọhọ ete: “Mme otu oro ẹsịnede ke idak Iran ẹtọn̄ọ ntịme ke nsio nsio itie, Iran ẹnyụn̄ ẹfiak ẹtọn̄ọ ndibot mme ikpọ n̄kpọekọn̄. N̄kpọ en̄wen edi ke Russia ye China ẹdida ye Iran idahaemi, ndien emi anam idem enyek mme idụt oro ẹdude ke Europe.”
Mbụk n̄kpọtịbe UN eke January 11, 2024, ọkọdọhọ, “Ekọn̄ Russia ke akaka iso ndibiat n̄kpọ ke Ukraine.”
N̄wedmbụk n̄kpọtịbe The Japan Times eke January 9, 2024 ọkọdọhọ ete: “Nte mbon China ẹkade iso ndiforo, mbon ekọn̄ mmọ ẹnyụn̄ ẹkade iso ndikop odudu; nte mbon Taiwan ẹkade iso ndikere ke idụt mmimọ ọfọn akan ye nte n̄kpọ mînyụn̄ isan̄ake ọfọn ke ufọt China ye U.S. ekeme ndinam mmọ ẹn̄wana ye idemmọ.”
Ndi enyene se Bible etịn̄de aban̄a nte nsio nsio idụt ke ofụri ererimbot ẹkade iso ndinyene mfịna ye kiet eken? Ndi emi ayanam ekọn̄ ofụri ererimbot afiak an̄wana?
Bible ama etetịn̄ aban̄a mme n̄kpọ oro ẹsụk ẹtịbede mfịn
Bible ikasiakke ndomokiet ke otu ekọn̄ oro ikụtde nte ẹn̄wanade mfịn. Edi, Bible ama etịn̄ ke nsio nsio ekọn̄ oro ẹdin̄wanade ‘oyosio emem efep ke isọn̄.’—Ediyarade 6:4.
N̄wed Daniel ama etịn̄ “ke utịt ini” emi, ke mme ukara ererimbot “ẹyenụk” idemmọ m̀mê ẹyom ndibọ kiet eken itie. Mmọ ẹyewụt odudu oro mmọ ẹnyenede ke ekọn̄ ẹnyụn̄ ẹbiat ediwak “n̄kpọuto” m̀mê okụk.—Daniel 11:40, 42, 43.
Ekọn̄ emi edide ke iso
Bible ama etịn̄ ke n̄kpọ eyenen̄ede ọdiọk ke ererimbot mbemiso afiakde ọfọn. Jesus ama etịn ke “akwa ukụt oyodu, orụk eke akanam mîdụhe toto ke editọn̄ọ ererimbot.” (Matthew 24:21) “Akwa ukụt” oro edida ikesịm ekọn̄ Armageddon, emi ẹkotde “ekọn̄ akwa usen Abasi Ata Ọkpọsọn̄.”—Ediyarade 16:14, 16.
Edi, Armageddon edinyanyan̄a mme owo, idisoboke-sobo. Abasi edida ekọn̄ emi isobo ukara owo emi ẹdide ntak ekọn̄ oro ẹkade iso ndin̄wana mfịn. Edieke oyomde ndidion̄ọ nte Armageddon edinamde emem odu ke nsinsi, kot mme ibuotikọ emi: