Yan Zabolotnyi/stock.adobe.com
ẸKÛTIE KE NDUE-IDEM!
Ubiatibet Okpon Etieti ke Ofụri Ererimbot—Se Bible Etịn̄de
N̄ka mbon ntịme ẹsịn ntịme etieti tutu enyịn anan mme owo ke Haiti. Mbon South Africa ye Mexico ko ibọhọ emem ke ntak ọkpọsọn̄ afai ye ntịme oro akade iso do. Kpa ukem nnanenyịn emi ọwọrọ mme idụt eken ke Latin America. Idem ke mme idụt oro ntịme ye afai mîsọn̄ke ubọk aba, nsia esisụk eyeyemede mme owo ke ntak se mmọ ẹkopde nte etịbede ke mme idụt en̄wen. Mmọ ẹsikop nte mme inọ ẹdụkde ufọk owo ẹyịp n̄kpọ ye nte mbon ntịme ẹsibiatde ẹnyụn̄ ẹsịnde ikan̄ ẹfọp mme n̄kpọ owo ntịme ntịme.
Nso ke Bible etịn̄ aban̄a ubiatibet oro akade iso ke ofụri ererimbot mfịn?
Se Bible eketịn̄de aban̄a ubiatibet
Bible ama etetịn̄ ke ubiatibet esịne ke otu mme n̄kpọ oro ẹdidade idiọn̄ọ ke idu ke “akpatre ini editịm n̄kpọ emi.” (Matthew 24:3) Ini Jesus okosụk abatde mme n̄kpọ mme n̄kpọ emi ẹdidade idiọn̄ọ ke ererimbot emi ekpere utịt, enye ọkọdọhọ ete:
“Ke ntak emi ubiatibet editọtde ima ediwak owo eyebịt.”—Matthew 24:12.
Bible ama etịn̄ n̄ko “ke mme akpatre usen” ke mme owo ‘ẹyenana mfara ke idem, ẹtie obom obom, inyụn̄ imaha eti ido.’ (2 Timothy 3:1-5) Utọ ndiọi edu emi ẹtiene edi ntak oro ubiatibet okponde ntem mfịn.
Edi idotenyịn do. Bible ọdọhọ ke Abasi ọn̄wọn̄ọ ke ibịghike ofụri ubiatibet oro ikụtde mfịn ẹyetre.
“Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene,ediwak emem oyonyụn̄ adat mmọ esịt.”—Psalm 37:10, 11.
Edieke oyomde ndidiọn̄ọ n̄kpọ en̄wen mban̄a etop idotenyịn oro Abasi ọnọde nnyịn ke Bible ye ntak emi ikpenịmde ke mme n̄kpọ oro ẹtịbede mfịn ẹsu prọfesi Bible, kot mme ibuotikọ emi.
“A Real Hope for a Better Tomorrow”