Ẹdinam Didie Ẹnyene Emem ke Isọn̄?

Se Bible ọdọhọde

Obio Ubọn̄ Abasi emi edide ukara emi Christ Jesus akarade ke heaven, edida emem edi isọn̄, idịghe owo. Se nte Bible ekpepde nnyịn n̄kpọ emi.

1. Abasi ayanam “ekọn̄ etre tutu esịm utịt isọn̄,” man osu un̄wọn̄ọ esie ndinam “emem onyụn̄ odu ke isọn̄ ke otu mbon oro enye enyịmede.”—Psalm 46:9; Luke 2:14.

2. Obio Ubọn̄ Abasi edidu ke heaven akara ofụri isọn̄. (Daniel 7:14) Sia akarade ofụri ererimbot, enye eyetre ufreidụt emi esidade ediwak mfịna edi.

3. Ẹkot Jesus emi edide Andikara ke Obio Ubọn̄ Abasi “Ọbọn̄ Emem,” ndien enye ayanam ‘emem inyeneke utịt.’—Isaiah 9:6, 7.

4. Owo idiyakke mbon emi ẹkade iso ẹn̄wana en̄wan ẹdu ke Obio Ubọn̄, koro “[Abasi] asasua owo ekededi eke amade afai.”—Psalm 11:5; Mme N̄ke 2:22.

5. Abasi ekpep ikọt esie nte ẹkpedide mbon emem. Bible etịn̄ ufọn ukpep emi ete: “Mmọ ẹyeda akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto. Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.”—Isaiah 2:3, 4.

Ediwak miliọn Mme Ntiense Jehovah ke ofuri ererimbot ke ẹyak Abasi ẹkpep mmọ nte ẹkpedide mbon emem idahaemi. (Matthew 5:9) Okposụkedi emi nnyịn itode nsio nsio ebiet inyụn̄ idude ke nsio nsio idụt 230, nnyịn isinyịmeke ndin̄wana ekọn̄.