Ndi Nta Mme Ekpep N̄kpọ Ẹnịm ke Jesus Ama Odu?

Enyene se inamde nta mme ekpep n̄kpọ mban̄a Bible ẹnịm ke Jesus ama odu. The Encyclopædia Britannica eke 2002 etịn̄ aban̄a se mme ewetmbụk emi ẹkedude uwem ke n̄kpọ nte tọsịn isua iba emi ẹkebede ẹkewetde ẹban̄a Jesus ye akpa mme Christian, ete: “N̄kpọ emi nsio nsio owo ẹkewetde mi ẹwụt nte ke eset, idem mme andibiọn̄ọ Ido Ukpono Christ ikeyịkke m̀mê Jesus ama odu; ẹketọn̄ọ ndiyịk n̄kpọ emi ke ata unana ntak ke n̄kpọ nte isua ikie iba emi ẹkebede.”

Ke 2006, n̄wed oro Jesus and Archaeology ọkọdọhọ ete: “Idụhe ata ekpep n̄kpọ mban̄a Bible emi afan̄ade ke eyen Jew emi ekerede Jesus onyụn̄ edide eyen Joseph ama odu; ata ediwak mmọ ẹsikam ẹsọsọp ẹnyịme ke imọfiọk ekese n̄kpọ emi enye akanamde onyụn̄ ekpepde.”

Bible owụt ke Jesus ama odu ke isọn̄ emi. Enye asiak enyịn̄ mme ete ete ye ete ye eka ye nditọeka esie. (Matthew 1:1; 13:55) Enye asiak n̄ko enyịn̄ ikpọ mme andikara emi ẹkedude ke ini Jesus okodude ke isọn̄. (Luke 3:1, 2) Ndisiak kpukpru emi ẹsin̄wam mme anam-ndụn̄ọde nditịm mfiọk ke mbụk Bible ẹnen.