Ndi Abasi Ayan̄wam Mi Edieke Mbọn̄de Akam?

Se Bible ọdọhọde

Ih, Abasi esin̄wam mbon oro ẹbọn̄de akam ẹnọ enye ke ofụri esịt ama akam edi se mmọ ẹben̄ede ekekem ye uduak esie. Idem ekpededi ubọn̄ke akam akanam, esịt eyenem fi ndifiọk ke mme owo ke Bible ẹma ẹbọn̄ akam ete Abasi an̄wam mmimọ. Se iba ke otu utọ akam oro mi:

• “N̄wam mi, O Jehovah Abasi mi; Nyan̄a mi nte ima-mfọnido fo edide.”—Psalm 109:26.

• “O Jehovah wara din̄wam mi.”—Psalm 40:13.

Imọfiọk ke andiwet psalm emi ama enen̄ede ọbuọt idem ke Abasi. Edi Abasi esinyụn̄ okop akam owo ekededi emi ọbọn̄de akam ọnọ enye ke ofụri esịt, utọ nte “mmọ eke esịt obụn̄ọde,” m̀mê “mmọ eke spirit mmọ anuahade.”—Psalm 34:18.

Kûkere ke Abasi oyom usụn̄ akaha, ke enye idọn̄ke enyịn ke mfịna fo. Bible ọdọhọ ete: “Okposụkedi Jehovah okon̄de, enye okụt mbon nsụhọdeidem; Edi enye enịm mbon n̄kohodeidem nsannsan.” (Psalm 138:6) Jesus ọkọdọhọ mbet esie ke Abasi akam ‘ọdiọn̄ọ ibat kpukpru idet ibuot mmọ.’ (Matthew 10:30) Omokụt do ke Abasi akam ọdiọn̄ọ fi akan nte ọdiọn̄ọde idemfo. Emi owụt ke enye iditreke-tre ndikop eseme fo edieke ọbọn̄de akam ọdọhọ enye an̄wam fi!—1 Peter 5:7.