Ntak Emi Ẹkesobode Mme Jew ye Mbon Eken Ntre ke Udiana Ekọn̄ Ererimbot? Ntak Emi Abasi Mîkakpanke Utọ N̄kpọ Oro?
Ediwak mbon oro ẹsibụpde mme mbụme emi ẹsidi mbon emi n̄kpọ enen̄erede atak mmọ. Idịghe ibọrọ mbụme emi kpọt ke mmọ ẹsiyom; mmọ ẹsiyom ndọn̄esịt n̄ko. Mbon en̄wen ẹdọhọ ke ndikowot mme Jew ye mbon eken ntre ekedi ata idiọk ibak, ndien ke emi anam ọsọn̄ mmọ ndinịm ke Abasi odu.
Se mme owo ẹtịn̄de ẹban̄a Abasi ndikayak ẹwot mme Jew ye mbon eken ntre
Nsu: Ifọnke ndibụp ntak emi Abasi akayakde ẹwot mme Jew ye mbon eken ntre.
Akpanikọ: Mbon emi ẹkenen̄erede ẹnyene mbuọtidem ẹma ẹbụp ntak emi Abasi ayakde idiọkido odu. Ke uwụtn̄kpọ, prọfet Habakkuk ama obụp Abasi ete: “Ntak emi afo anamde mi n̄kụt se idiọkde, onyụn̄ osụk esede idiọkido? Ntak emi nsobo ye afai ẹdude mi ke iso, ntak emi utọk onyụn̄ odude, ntak emi en̄wan onyụn̄ odude?” (Habakkuk 1:3) Utu ke Abasi ndikasua nnọ Habakkuk ke mbụme emi enye okobụpde mi, enye akakam ọdọhọ enye ewet mmọ esịn ke Bible man kpukpru owo ẹkpekot.
Nsu: Ufen emi mme owo ẹbọde ibeheke Abasi.
Akpanikọ: Abasi asasua idiọkidọ ye ufen emi mme owo ẹsibọde ke ntak idiọkido. (Mme N̄ke 6:16-19) Ke eyo Noah, ‘esịt ama ayat’ Abasi ke ntak afai emi ọkọyọhọde isọn̄. (Genesis 6:5, 6) Emi owụt ke ama enen̄ede abiak Abasi ndikụt nte ẹwotde mme Jew ye mbon eken ntre ke udiana ekọn̄ ererimbot.—Malachi 3:6.
Nsu: Abasi akada oro amia mme Jew ufen.
Akpanikọ: Edi akpanikọ ke Abasi ama ayak mbon Rome ẹsobo Jerusalem ke eyo mme apostle. (Matthew 23:37–24:2) Nte ededi, ọtọn̄ọde ke ini oro, Abasi isioho orụk kiet ima m̀mê ndisio orụk kiet nnọ ufen. Ke enyịn Abasi, “ubahade idụhe ke ufọt Jew ye Greek.”—Rome 10:12.
Nsu: Edieke Ata Ọkpọsọn̄ Abasi emi amade owo odude, idụhe nte enye akpakayakde ẹwọt mme Jew ye mbon eken ntre.
Akpanikọ: Okposụkedi emi Abasi mîsimiaha owo ufen, ndusụk ini enye esiyak mme owo ẹbọ ufen ke esisịt ini.—James 1:13; 5:11.
Ntak emi Abasi akayakde ẹwot mme Jew ye mbon eken ntre ke udiana ekọn̄ ererimbot?
Ntak emi Abasi akayakde ẹwot mme Jew ye mbon eken edi ukem ye ntak emi enye ayakde mme owo ẹbo ufen mfịn: man ẹbiere eneni emi ẹkedemerede ko ke ata eset. Bible owụt ke Devil akara ererimbot emi, idịghe Abasi. (Luke 4:1, 2, 6; John 12:31) Ibuotikọ oro ẹwetde ke idak ibuotikọ emi enen̄ede eneme ntak emi Abasi ayakde mme owo ẹbọ ufen. Edi yak ise n̄kpọ iba ke Bible emi ẹkemede ndin̄wam nnyịn ifiọk ntak emi Abasi akayakde ẹwot mme Jew ye mbon eken ntre.
Anie akanam ẹwot mme Jew ye mbon eken ke ini udiana ekọn̄ ererimbot? Abasi ama asian Adam ye Eve se enye oyomde mmọ ẹnam, edi enye ikenyịkke-nyịk mmọ ite ẹnam se imọ idọhọde. Mmọ ẹma ẹmek ndibiere nnọ idemmọ se idide eti ye idiọk, ndien idiọk ubiere oro mmọ ẹkenamde—ye idiọk ubiere oro mme owo ẹnamde ke ofụri emana—ẹsịn kpukpru owo ke afanikọn̄ oro isobode mfịn. (Genesis 2:17; 3:6; Rome 5:12) Onyụn̄ edi nte n̄wed kiet ọdọhọde ete: “Ediwak mfịna oro isobode mfịn, edi ke ntak emi ediwak nnyịn mîdaha ifụre oro inyenede ndibiere se imade nnam n̄kpọ ke eti usụn̄.” Utu ke Abasi ndibọ nnyịn ifụre emi, enye enyịme mme owo ẹka iso ẹdomo ndikara idemmọ.
Abasi ekeme ndinam mme Jew ye mbon eken oro ẹkewotde do ẹset. Abasi ọn̄wọn̄ọ ndinam ediwak miliọn owo ẹset, esịnede mme Jew oro ẹkewotde ke udiana ekọn̄ ererimbot. Enye n̄ko ayanam mbon oro ẹkebọhọde n̄kpa oro ẹkûti aba ufen emi mmọ ẹkebọde. (Isaiah 65:17; Utom 24:15) Abasi oyosu mme un̄wọn̄ọ emi sia enye enen̄ede ama ubonowo.—John 3:16.
Ediwak mbon emi ekọn̄ oro ọkọnọde ye mbon oro ẹkebọhọde unọmọ oro ẹma ẹka iso ẹnyene mbuọtidem ke Abasi enyụn̄ ẹkop inem uwem sia mmọ ẹma ẹfiọk ntak emi Abasi ayakde idiọkido odu ye nte enye aduakde ndisio enye mfep.