Ntak Emi Mme Owo Ẹsikpade?

Se Bible ọdọhọde

Idiọkke owo ndikere m̀mê nso isinam owo akpa, akpan akpan ke ini owo idem esie akpade. Bible ọdọhọ ke 1 Corinth 15:56 ete: “Ifọt n̄kpa edi idiọkn̄kpọ.”

Ntak emi kpukpru nnyịn idide mme anamidiọk? Ntak emi isikpade?

Adam ye Eve emi Abasi ekebemde iso obot ẹkekpa ke ntak emi mmọ ẹkenamde idiọkn̄kpọ. (Genesis 3:17-19) Utịp nsọn̄ibuot mmọ ye Abasi ekedi n̄kpa, koro Abasi esinọ owo “uwem.”—Psalm 36:9; Genesis 2:17.

Adam ama ayak idiọkn̄kpọ ọnọ kpukpru nditọ esie. Bible ọdọhọ ete: “Nte idiọkn̄kpọ okotode owo kiet odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) Kpukpru owo ẹkpa koro mmọ ẹdi mme anamidiọk.—Rome 3:23.

Se idinamde mme owo ẹkûkpa aba

Abasi ọdọhọ ke ini ke edi emi imọ ‘idimende n̄kpa imen ke nsinsi.’ (Isaiah 25:8) Edi ana enye emen idiọkn̄kpọ efep kan̄a, koro idiọkn̄kpọ esinam mme owo ẹkpa. Abasi edida Jesus inam emi koro Jesus Christ edi enye emi “emende idiọkn̄kpọ ererimbot efep!”—John 1:29; 1 John 1:7.