N̄KPARAWA OWO ẸBỤP
Didie ke Bible Ekeme Ndin̄wam Mi?—Ikpehe 1: Diọn̄ọ Nte Okpokotde Bible
“Mmesidomo ndikot Bible, edi ifu esinam mi sia esitie mi nte Bible okpon akaha!”—Briana, edi isua 15.
Ndi esitie fi ntre n̄ko? Ibuotikọ emi ekeme ndin̄wam fi!
Ntak emi okpokotde Bible?
Ndi ifu esinam fi ndikot Bible? Ekpedi ntre, kûfịna; an̄wan̄a se isinamde etie owo ntre. Ekeme ndidi sia Bible enyene ata ediwak page emi ikọ awakde, ndise ndomokiet mînyụn̄ idụhe—enye inyụn̄ itiehe nte fim m̀mê edinam TV!
Edi fiak kere ise: Edieke okụtde akamba ọsọn̄urua ekebe eset, ndi ikpọdọn̄ke fi ndifiọk se isịnede ke esịt?
Bible etie nte ọsọn̄urua ekebe oro. Enye ọdọn̄ọ ediwak nti n̄kpọ, m̀mê nti item, oro ekemede ndin̄wam fi
Ebiere n̄kpọ ọfọn
Ọdiọn̄ọ nte akpanamde n̄kpọ ye ete ye eka fo
Emek nti ufan
Ọyọ se iwọrọde fi
Nso inam utọ akani n̄wed ntre ekeme ndin̄wam nnyịn mfịn? Ti ke “Abasi ọkọnọ odudu spirit ẹda ẹwet ofụri N̄wed Abasi.” (2 Timothy 3:16) Ọwọrọ item emi ọdọnọde ke Bible oto Abasi—enye ọdiọn̄ọ n̄kpọ akan kpukpru owo.
Bible etie nte ọsọn̄urua ekebe oro ọdọn̄ọde ediwak nti n̄kpọ
Didie ke n̄kpokot Bible?
Usụn̄ kiet edi ndikot tọn̄ọ ke ntọn̄ọ nsịm utịt. Oro ayanam fi ọfiọk se isịnede ke Bible. Edi awak usụn̄ ikemede ndikot Bible. Se usụn̄ iba en̄wen mi:
Emekeme ndikot ofụri n̄wed 66 emi odude ke Bible ke adiana ke adiana, tọn̄ọ ke Genesis tutu esịm Ediyarade.
Emekeme n̄ko ndisat mbụk Bible n̄kot ke adiana ke adiana nte okonyụn̄ etịbede.
Uwụtn̄kpọ: N̄wed emi Kpep N̄kpọ to Mbụk Bible ekeme ndin̄wam fi okot mbụk Bible ke adiana ke adiana
Ọyọhọ usụn̄ iba edi ndikot mbụk Bible emi ebietde se iwọrọde fi. Ke uwụtn̄kpọ:
Ndi akpama ndinyene ata nti ufan? Kot mbụk Jonathan ye David. (1 Samuel, ibuot 18-20) Ekem da se idude ke n̄wed emi “Nte Ekemede Ndinyene Ata Ufan” yom nti n̄kpọ emi ekemede ndikpep nto mbụk oro.
Ndi akpama ndidiọn̄ọ se idin̄wamde fi esibe idomo? Kot mbụk Joseph emi ekebede idomo. (Genesis, ibuot 39) Ekem da se idude ke n̄wed emi “Nte Ekpebede Idomo—. . . Joseph—Akpa Ikpehe” ye “Edori Enye Ikọ! Joseph—Ọyọhọ Ikpehe 2” yom nti n̄kpọ emi ekemede ndikpep nto mbụk oro.
Ndi akpama ndidiọn̄ọ nte akam ekemede ndin̄wam fi? Kot mbụk Nehemiah. (Nehemiah, ibuot 2) Ekem da se idude ke n̄wed emi “Abasi Ama Ọbọrọ Akam Esie” yom nti n̄kpọ emi ekemede ndikpep nto mbụk oro.
Se Akpanamde: Ama oyom ndikot Bible, kûkot ke ebiet emi etiede uyom uyom man n̄kpọ ndomokiet iditịmede fi.
Ọyọhọ usụn̄ ita edi ndiyom mbụk ke Bible m̀mê psalm n̄kot, ekem ese nte ekemede ndinam se okotde oro. Ama okot ama, bụp idemfo utọ mbụme nte:
Nso ikanam Jehovah esịn itie emi ke Bible?
Nso ke emi ekpep mi aban̄a mme edu Jehovah m̀mê nte enye esinamde n̄kpọ?
Didie ke n̄keme ndinam se n̄kpepde ke itie Bible emi?
Se Akpanamde: Biere nte edisikotde Bible fo. Mek usen oro editọn̄ọde ndisikot mme itie N̄wed Abasi oro ẹwetde ke Ndutịm Ukot Bible.