ITIE BIBLE ẸNAMDE AN̄WAN̄A
Jeremiah 29:11—“Ami mmọfiọk ekikere emi ŋkerede mbaŋa mbufo”
“ ‘Ami mmọfiọk ekikere oro ami n̄kerede mban̄a mbufo,’ uyo Jehovaha edi emi, ‘ekikere emem, idịghe eke afanikọn̄, man nnọ mbufo ini iso ye idotenyịn.’ ”—Jeremiah 29:11, Edikabade Eke Obufa Ererimbot.
Ami mmọfiọk ekikere emi ŋkerede mbaŋa mbufo, Jehovah ọdọhọ, ekikere emem, idige eke idiọk, man nnọ mbufo utit ye idori-enyin.—Jeremiah 29:11, Edisana Ŋwed Abasi Ibom.
Se Jeremiah 29:11 Ọwọrọde
Jehovah Abasi ama ọn̄wọn̄ọ ke iyanam ikọt imọ ẹnyene ata emem ke ini iso. Kpa ye oro ẹkewetde ikọ oro ẹnọ ikọt esie ke eset, enye ke aduak ukem n̄kpọ oro ọno ikọt esie mfịn. Enye edi “Abasi emi ọnọde idotenyịn.” (Rome 15:13) Enye ama anam ẹwet mme un̄wọn̄ọ esie ẹsịn ke Bible “man ikpenyene idotenyịn” ke n̄kpọ ọyọfọn ke ini iso.—Rome 15:4.
Se Iban̄ade Jeremiah 29:11
Itie Bible emi esịne ke leta oro ẹkenọde ẹsọk nditọ Israel oro ẹketan̄de ke Jerusalem ẹka Babylon.b (Jeremiah 29:1) Abasi ama ọdọhọ mmọ ke mmọ ẹyedu do ẹbịghi, ntre yak mmọ ẹbọp ufọk ẹdụn̄, ẹtọ in̄wan̄, ẹnyụn̄ ẹdọ iban ẹnyene nditọ. (Jeremiah 29:4-9) Edi Abasi ama adian ete: “Ke ini esịmde isua ata ye duop ke Babylon, ami nyọwọn̄ọde ntịn̄enyịn mi nnọ mbufo, nyonyụn̄ nnam eti ikọ mi kaban̄a mbufo osu ke ndida mbufo mfiak ndi [Jerusalem].” (Jeremiah 29:10) Emi ama anam mmọ ẹkụt ke Abasi ifreke mmimọ, ke usen kiet usen kiet mmimọ iyafiak inyọn̄ọ obio emana mmimọ.—Jeremiah 31:16, 17.
Abasi ama anam se enye ọkọn̄wọn̄ọde ọnọ nditọ Israel. Cyrus, Edidem Persia ama osobo Babylon nte Jehovah eketịn̄de. (Isaiah 45:1, 2; Jeremiah 51:30-32) Ekem, Cyrus ama ayak mme Jew ẹfiak ẹnyọn̄ọ obio emana mmọ. Ẹma ẹyak mmọ ẹfiak ẹnyọn̄ọ Jerusalem ke mmọ ẹma ẹkedu isua 70 ke Babylon.—2 Chronicle 36:20-23; Ezra 3:1.
Abasi ndikanam se enye ọkọn̄wọn̄ọde ke Jeremiah 29:11 nnọ nditọ Israel, anam inen̄ede inịm ke enye ayanam se enye ọn̄wọn̄ọde ọnọ nnyịn. Se enye ọn̄wọn̄ọde ọnọ nnyịn esịne nte enye edidade ukara esie emi Jesus edide Edidem inam emem odu ke ofụri isọn̄.—Psalm 37:10, 11, 29; Isaiah 55:11; Matthew 6:10.
Se mme owo ẹsitịn̄de ẹban̄a Jeremiah 29:11
Se mme owo ẹsitịn̄de: Abasi “aduak” nsio nsio n̄kpọ ọnọ nnyịn owo kiet kiet.
Akpanikọ: Abasi ayak owo kiet kiet emek utọ uwem emi enye edidude. Edi se Abasi eketịn̄de, emi ẹwetde ke Jeremiah 29:11, akaban̄a kpukpru nditọ Israel ke Babylon; enye akaduak ndinam kpukpru mmọ ẹnyene emem. (Jeremiah 29:4) Abasi ama ayak owo mmọ kiet kiet ebiere m̀mê imoyom nditiene ndia ufọn n̄kpọ oro imọ in̄wọn̄ọde ndinam nnọ mmọ. (Deuteronomy 30:19, 20; Jeremiah 29:32) Mbon oro ẹkeyomde Abasi ẹma ẹsibọn̄ akam ke ofụri esịt ẹnọ enye.—Jeremiah 29:12, 13.
Se mme owo ẹsitịn̄de: Abasi ayanam ikọt esie ẹkụt mfọnọn̄kpọ.
Akpanikọ: Ikọ Hebrew oro ẹkabarede nte “mfọnọn̄kpọ,” ke Jeremiah 29:11, ke ndusụk Bible, ọwọrọde “emem, nsọn̄idem, eti uwem.” Se ẹtịn̄de ẹban̄a ke mme ufanikọ eken owụt ke idịghe inyene ke Abasi ọkọn̄wọn̄ọ ndinọ nditọ Israel oro ẹketan̄de ẹnyọn̄ Babylon, edi ọkọn̄wọn̄ọ ndinam mmọ ẹnyene emem, ẹkop inem uwem. Mmọ ẹdisụk idedi idụt Israel tutu ẹyak mmọ ẹfiak ẹnyọn̄ọ Jerusalem.—Jeremiah 29:4-10.
Kot Jeremiah ibuot 29 ye ikọ idakisọn̄ ekededi emi anamde ndusụk n̄kpọ an̄wan̄a ye mme itie Bible eken emi ẹtịn̄de ukem n̄kpọ oro.
a Ata enyịn̄ Abasi edi Jehovah.—Psalm 83:18.
b N̄wed emi ekerede The Expositor’s Bible Commentary etịn̄ aban̄a Jeremiah 29:11. N̄wed oro ọdọhọ ete: “Kiet ke otu nti un̄wọn̄ọ emi odude ke Bible edi emi; enye enen̄ede owụt mbọm emi Yahweh [Jehovah] ekenyenede aban̄a nditọ Israel oro ẹketan̄de ẹka Babylon. Un̄wọn̄ọ emi ama anam mmọ ẹnen̄ede ẹdori enyịn ke ini iso ọyọfọn.”—Eboho 7, page 360.