Ẹda Ẹkabade Akamba Mbono 2020 Emi Ibuotikọ Edide ‘Ẹdat Esịt Kpukpru Ini’!

Se itịbede ke July ye August 2020 itịbeke akanam. Ata akpa ini edi emi Mme Ntiense Jehovah ke ofụri ererimbot ẹdụkde akamba mbono mmọ ke ukem ini. Ẹkesan̄a didie ẹnam emi? Mme akabade n̄wed nnyịn ẹkenyene ndikabade ofụri edinam mbono emi mbe usem 500. Utọ akwa utom oro edi n̄kpọ emi akpadade isua kiet m̀mê akande oro ndinam mma. Edi sia idiọk udọn̄ọ coronavirus emi mîyakke inam utom nnyịn nte ikesinamde, akana mme akabade n̄wed ẹsịn ibuot ẹsịn itọn̄ ẹkabade ofụri edinam akamba mbono 2020 emi ẹma ke ufan̄ ọfiọn̄ ita ye n̄kpọ.

Itieutom emi ẹsede ẹban̄a ukabade n̄wed nnyịn ke ofụri ererimbot ẹma ẹnam itieutom emi ẹsidepde n̄kpọ ẹnọ nnyịn ke ofụri ererimbot ẹdiọn̄ọ ke mme akabade n̄wed nnyịn ẹyom nti microphone ndikama n-rekọd edinam mbono emi. Ntre, itieutom emi ẹsidepde n̄kpọ ẹnọ nnyịn ke ofụri ererimbot ẹma ẹsọsọp ẹdep microphone 1,000 ẹnọ ẹsọk mme akabade n̄wed nnyịn ke n̄kpọ nte ebiet 200. Emi ama enen̄ede an̄wam mme akabade n̄wed nnyịn ẹkeme ndinam utom emi.

Itieutom emi ẹsidepde n̄kpọ ẹnọ nnyịn ke ofụri ererimbot ẹkedep microphone emi ke eboho, utu ke ndidep udep-udep. Emi ama anam ẹsio urua ẹnyam ẹnọ mmọ. Ekem, mmọ ẹma ẹdọhọ ẹnọ kpukpru microphone oro ẹka ebiet kiet. Do, ke ẹketie ẹnọ microphone emi ẹka nsio nsio ebiet 200. Ndinam enye ntre ikayakke ẹbiat okụk nte ẹkpebiatde. N̄ko ndidep microphone emi ke eboho ye okụk ukpeusụn̄ akakpa n̄kpọ nte tọsịn naira 66 ye udori (₦66,130.00) ke idem kiet. Ekpedi ikedep udep-udep, ikpekedep microphone kiet n̄kpọ nte tọsịn naira 79 ye udori. (₦79,356.00) Edi ndikedep enye ke eboho anam n̄kpọ nte miliọn naira 13 ye udori (₦13,226,000.00) odụk nnyịn ekpat.

Itieutom emi ẹsidepde n̄kpọ ẹnọ nnyịn ke ofụri ererimbot ẹkenam ofụri emi ke ufan̄ ọfiọn̄ April ye May 2020​—kpa ini emi idiọk udọn̄ọ coronavirus mîkayakke ediwak mbubehe asan̄a nte akpasan̄ade. Kpa ye oro, etisịm utịt ọfiọn̄ May, ata ediwak itie ukabade n̄wed nnyịn, ke mme ọfis nnyịn ye ke mme ebiet en̄wen emi ẹsitiede ẹkabade n̄wed nnyịn, ẹma ẹbọ microphone emi ẹda ẹtọn̄ọ utom.

Jay Swinney emi edide esenyịn itieutom emi ẹsidepde n̄kpọ ẹnọ nnyịn ke ofụri ererimbot ọdọhọ ete: “Nsio nsio itieutom ke Bethel ẹma ẹdiana ye nsio nsio mme anam-mbubehe emi ẹkenyenede ubọk ke n̄kpọ emi ẹkụt ẹte ke microphone emi ẹsịm mme akabade n̄wed ubọk. Mîkpedịghe spirit Jehovah, nnyịn ikpekekemeke-keme ndinam kpukpru oro, ndidep microphone 1,000 ke idaha okụk oro nnyụn̄ nnọ mmọ ẹsọk mme akabade n̄wed nnyịn ke nsio nsio ebiet 200 ke utọ ekpri ini oro.”

Nicholas Ahladis emi edide esenyịn itieutom emi ẹsede ẹban̄a ukabade n̄wed nnyịn ke ofụri ererimbot ọdọhọ esie ete: “Esịt ama enen̄ede enem mme akabade n̄wed nnyịn emi mîkekemeke ndiwọrọ an̄wa ke ntak idiọk udọn̄ọ emi ndibọ microphone emi. Kpa ye oro ndusụk mmọ mîkekemeke aba ndidu ọtọkiet nnam utom nte ẹkesinamde, mmọ ẹma ẹnyene se ikan̄wamde mmọ ẹka iso ẹtie ke ebiet oro mmọ ẹketiede ẹkabade ẹnyụn̄ ẹrekọd kpukpru ikọ Abasi emi ẹkwọrọde ke akamba mbono oro, ẹrekọd mme drama, ye ikwọ ebe usem 500.”

Ndidep microphone emi nnọ ẹsọk mme akabade n̄wed nnyịn edi kiet ke otu n̄kpọ emi ẹkenamde man nditọete nnyịn ke ofụri ererimbot ẹdụk akamba mbono 2020 emi ke ukem ini. Ikada enọ imaesịt fo inam emi. Emekeme nditiene nnọ enọ imaesịt fo ke donate.jw.org m̀mê ke mme usụn̄ en̄wen emi afo amade.