Channel Satellite Mme Ntiense Jehovah Esịm Ebiet Emi Intanet Mîdụhe

Kpukpru ọfiọn̄, isitetie ibet mme vidio ye mme n̄kpọ Ikọ Abasi eken emi ẹsidude ke Edinam TV Nnyịn. Edi ediwak nditọete nnyịn ke Africa isikemeke ndise mme n̄kpọ emi ke Intanet. Nso idi ntak?

Intanet isịmke ata ediwak itie ke Africa. Ndien mme itie emi esịmde, ọsọn̄ urua etieti, okponyụn̄ oyom ndibre n̄kpọ m̀mê ndisio n̄kpọ, Intanet ekeme nditọn̄ọ mfịn nyụt tutu esịm n̄kpọn̄. Man ọdiọn̄ọ nte ọsọn̄de urua, esenyịn circuit kiet ke Madagascar ama aka ndisio Edinam TV Nnyịn ọfiọn̄ oro ke itie kọmputa. Enye ekekpe n̄kpọ nte ₦6,500. Okụk oro akan okụk utom emi ndusụk owo ẹsibọde urua kiet!

Kpa ye emi Intanet etiede ntem, idahaemi ediwak miliọn owo ke Africa ẹkeme ndise mme Edinam TV Nnyịn edi idụkke Intanet. Ẹnam didie?

Ọtọn̄ọde ke 2017, ẹma ẹtọn̄ọ ndisisio mme Edinam TV Nnyịn ke channel kiet ke satellite nnọ ediwak idụt ke Africa. Ẹsisio edinam nnyịn ke usem 16 ke mfọn kpukpru usen, ọtọn̄ọde ke usenubọk tutu eyo ekịm afiak esiere.

Se inamde ẹkeme ndisio mme edinam oro ntre edi ke Mme Ntiense Jehovah ẹsikpe mbon TV kiet yak ẹsisio mme n̄kpọ Ikọ Abasi nnyịn ke channel kiet ke satellite. Se ẹsiode ke satellite oro esisịm n̄kpọ nte idụt 35 ke Africa. Okụk emi ẹsikpede mbon TV oro kpukpru ọfiọn̄ esikpere ndisịm ₦5,000,000. Edi ini ekededi emi inyenede mme akpan edinam emi ẹyomde nditọete nnyịn ke n̄kan̄ oro ẹtiene ẹdụk, imesikpe okụk yak ẹsio ke channel en̄wen man mmọ ẹtiene ẹdụk ini kpukpru owo ẹdụkde. Oro esin̄wam ediwak tọsịn nditọete nnyịn ẹtiene ẹdụk akamba mbono mîdịghe ẹtiene ẹkụt se ẹnamde ini ibuot itieutom ẹnọde owo ekese nditọete ke n̄kan̄ oro.

Ediwak owo, idem ye mbon emi mîdịghe Mme Ntiense Jehovah, ẹsitie ke ufọk mmọ ẹse channel satellite Mme Ntiense Jehovah emi ke TV mmọ. Edi ediwak nditọete nnyịn inyeneke TV m̀mê n̄kpọ ntre ndida nse se ẹnamde ke channel oro. Esop Abasi ẹnam n̄kpọ ẹn̄wam mmọ. Ẹdọn̄ mme n̄kpọ ke mme Ufọkmbono Obio Ubọn̄ emi ẹbede 3,670 man nditọete nnyịn ẹkeme ndisise mme Edinam TV Nnyịn ke mme Ufọkmbono Obio Ubọn̄ oro. Ufọkmbono Obio Ubọn̄ ekpenyene TV m̀mê n̄kpọ en̄wen emi ẹsikamade ẹsio vidio, okụk emi ẹdidade ẹdep n̄kpọ emi ẹdidade ẹsio Edinam TV Nnyịn ye okụk emi ẹdikpede yak ẹnọ n̄kpọ oro ẹsọk esop oro eyebe ₦28,000. Edi mme esop mînyeneke n̄kpọ emi ndomokiet, okụk emi ẹyomde ndida ndep kpukpru n̄kpọ ekeme ndibe ₦216,000.

Enen̄ede enem nditọete nnyịn nte mmọ ẹsikemede ndise se ẹsisiode ke channel oro. Ebiowo kiet ke Cameroon ọdọhọ ete: “Ubon nnyịn ẹda channel emi nte manna emi Abasi ọnọde nnyịn ke desat.” Brọda Odebode emi odude ke Nigeria ọdọhọ ete: “Ofụri ubon nnyịn ẹsitie kiet ikata ke urua ẹse channel emi. Nditọ mi ẹsitetie ẹbet mme ini oro. Ndusụk ini ikpese n̄kpọ ke TV, mmọ ẹsidọhọ yak ẹkpụhọ ẹka channel oro.” Rose emi odụn̄de n̄ko ke Nigeria ọdọhọ ete: “N̄kesise mbụk n̄kpọntịbe kpukpru ini, edi idahaemi ndise channel emi ẹsisiode Edinam TV Mme Ntiense Jehovah. Ini n̄kesisede mbụk n̄kpọntịbe, se n̄kesikụtde ama esiwak ndifịna mi onyụn̄ anam iyịp mi ọdọk. Edi se nsede ke Edinam TV Mme Ntiense Jehovah esisọn̄ọ mi idem onyụn̄ anam esịt ana mi sụn̄! Channel emi ke mma n̄kan. Enye edi ata akamba enọ emi Jehovah ọnọde mi.”

Esenyịn circuit kiet ke Mozambique ọdọhọ ke circuit imọ, ke ẹdọn̄ mme n̄kpọ ke mme Ufọkmbono Obio Ubọn̄ emi ẹdin̄wamde ẹkeme ndise channel oro. Nditọete ke mme esop oro ẹsidisịm Ufọkmbono Obio Ubọn̄ hour kiet mbemiso mbono esop ọtọn̄ọde mîdịghe ẹbak ẹkan oro, man ẹkeme ndise mme Edinam TV Nnyịn emi ẹsiode ke channel oro.

Ke akamba mbono ofụri ererimbot emi ẹkenịmde ke 2019, ke Johannesburg, ke South Africa, channel oro ke ẹkeda ẹsio utịn̄ikọ owo Otu Emi Ẹsede Ẹban̄a Utom Nnyịn ye mme akpan utịn̄ikọ eken ẹnọ nditọete ke nsio nsio itie usụkkiet en̄wen ẹtiene ẹse. Brọda Sphumelele emi odude ke Itieutom Emi Ẹsede Ẹban̄a Edinam TV Nnyịn ke n̄kọk itieutom nnyịn ke South Africa ọdọhọ ete: “Mbemiso ikenyenede channel emi, ikesida Intanet ibre mme utịn̄ikọ ntre inọ nditọete. Edi akana nte Intanet enen̄ede ọfọn man mmọ ẹkop mme utịn̄ikọ oro, ima isinyụn̄ idep ediwak data. Channel emi ẹsisiode Edinam TV Mme Ntiense Jehovah enen̄ede emem urua, Intanet inyụn̄ ibiatke n̄kpọ inọ nnyịn.”

Nte mbufo ẹtatde ubọk ẹtịp okụk yak ẹda ẹnam n̄kpọ Abasi ke ofụri ererimbot anam ediwak nditọete nnyịn ke Africa ẹkeme ndise mme Edinam TV Nnyịn ke channel satellite emi. Imenen̄ede ikọm mbufo nte ẹsikade donate.jw.org ẹkenọ okụk ẹda ẹnam n̄kpọ Abasi.