Nte Okpodude ke Emem ye Ete ye Eka Fo

Owo ama ọdọ ndọ, ọtọn̄ọ obufa ubon. Okposụkedi emi afo enyenede ndika iso n̄kpono nnyụn̄ mma ete ye eka fo, ti ete ke n̄wan m̀mê ebe fo ke akpama akan. Emi ekeme ndisọn̄ ndusụk ete ye eka ndinyịme. Edi Bible ekeme ndin̄wam fi ọdiọn̄ọ nte akpanamde n̄kpọ man odu ke emem ye ete ye eka fo edi ufreke ke emenyene ubon n̄ko.

1 KPONO ETE YE EKA FO

BIBLE ỌDỌHỌ ETE: “Kpono usọ ye uka.” (Ephesus 6:2) Inamke n̄kpọ m̀mê afo okpon owo adan̄a didie, afo enyene ndika iso n̄kpono ete ye eka fo. Ti ke ana n̄wan fo n̄ko okpono ete ye eka esie. “Ima ifịbeke ufụp,” ntre kûdedei ukere ke edieke n̄wan fo enen̄erede ẹkpere mmọ, ke mmọ ẹyemen itie fo.—1 Corinth 13:4; Galatia 5:26.

SE AKPANAMDE:

• Kûdọhọ n̄wan fo ute, “Mbon mbufo isidaha mi ke n̄kpọ” m̀mê “Akananam eka fo imaha se nnamde”

• Domo ndise n̄kpọ nte n̄wan fo esede

2 KÛYAK OWO EN̄WEN AKARA UFỌK FO

BIBLE ỌDỌHỌ ETE: “Erenowo [ọyọkpọn̄] ete ye eka esie onyụn̄ akadiana ye n̄wan esie ndien mmọ ẹyekabade ẹdi obụk kiet.” (Genesis 2:24) Ke ẹma ẹkedọ ndọ, ete ye eka mbufo ẹkeme ndikere ke osụk edi utom mmimọ ndise mbufo enyịn, ndien emi ekeme ndinam mmọ ẹnen̄ede ẹsịn idem ke ndọ mbufo ẹkan nte ẹkpesịnde.

Afo ye n̄wan fo ẹnyene ndibiere adan̄a nte mmọ ẹkpesịnde uyo ke mbubehe mbufo, ẹnyụn̄ ẹneme emi ye mmọ ukpono ukpono. Ẹtịn̄ nte ẹyomde mmọ ẹnam n̄kpọ ye mbufo, edi ẹkûsọn̄ọ mmọ enyịn. (Mme N̄ke 15:1) Nsụhọdeidem, ifụre ifụre ido, ye ime ayan̄wam mbufo ẹdu ke emem ẹnyụn̄ ẹka iso “ẹyọ kiet eken ke ima.”—Ephesus 4:2.

SE AKPANAMDE:

• Edieke mûmaha nte mme ete ye eka mbufo ẹsịnde idem ke ndọ mbufo, neme n̄kpọ emi ye n̄wan fo ke ini mfịna mîdụhe

• Ẹtie mbufo mbiba ẹbiere nte ẹdisede iban̄a n̄kpọ emi