Devil Odomo Jesus Idomo

Ke Jesus ama akana baptism ama, edisana spirit ama ada enye aka wilderness. Enye ikadiaha n̄kpọ ke ofụri usen 40, ntre biọn̄ ama ọdọn̄ enye etieti. Devil ama edi edidomo enye ete: ‘Edieke afo edide Eyen Abasi, dọhọ mme itiat emi ẹkabade ẹdi ebok uyo.’ Jesus ama ada se N̄wed Abasi etịn̄de ọbọrọ enye ete: ‘Ẹwet ẹte ke idịghe udia ikpọn̄ ke owo edida odu uwem. Ana owo akpan̄ utọn̄ ọnọ kpukpru ikọ Jehovah.’

Ekem Devil ama amia Jesus ata, ete: ‘Edieke afo edide Eyen Abasi, to enyọn̄ ibibene temple emi frọ diduọ ke isọn̄. N̄kọ ẹwet ẹte ke Abasi ọyọdọn̄ mme angel esie ẹdikpobi fi.’ Edi Jesus ama afiak ada se N̄wed Abasi etịn̄de ọbọrọ enye ete: ‘Ẹwet ẹte kûdomo Jehovah idomo.’

Satan ama owụt Jesus kpukpru obio ubọn̄ ererimbot ye inyene ye ubọn̄ mmọ, onyụn̄ ọdọhọ enye ete: ‘Akpatuak ibuot inikiet kpọt ọnọ mi, nyọnọ fi kpukpru obio ubọn̄ emi ye ubọn̄ mmọ.’ Edi Jesus ama ọbọrọ enye ete: ‘Daha mi, Satan! Ẹwet ẹte Jehovah ikpọn̄ ke ana atuak ibuot ọnọ.’

Devil ama adaha ọkpọn̄ enye, mme angel ẹnyụn̄ ẹdinam n̄kpọ ẹnọ enye. Toto ke ini oro, Jesus ama ọtọn̄ọ ndikwọrọ eti mbụk Obio Ubọn̄ Abasi. Se Abasi ọkọdọn̄de enye edi isọn̄ edinam edi oro. Mme owo ẹma ẹma se Jesus ekesikpepde mmọ, ẹnyụn̄ ẹsitiene enye ẹka ebiet ekededi emi enye akade.