Hannah Eben̄e Abasi Eyen Erenowo

Ete kiet ke Israel emi ekekerede Elkanah ọkọdọ iban iba, Hannah ye Peninnah. Enye akama Hannah akan. Peninnah ama esisak Hannah sia enye ama aman ediwak nditọ edi Hannah ikamanke ndomokiet. Kpukpru isua, Elkanah ama esimen ubon esie aka tent utuakibuot ke Shiloh man ẹketuak ibuot ẹnọ Jehovah. Isan̄ kiet emi mmọ ẹkekade do, enye ama okụt nte Hannah n̄wan ima esie ofụhọde etieti. Enye ama ọdọhọ Hannah ete: ‘Hannah mbọk kûtua. Ami do ye afo. Mmama fi tutu.’

Ekem Hannah ama adaha ọkọbọn̄ akam, atua eben̄e Jehovah ete an̄wam imọ. Enye ama ọn̄wọn̄ọ ete: ‘Jehovah, edieke afo edinamde mman eyen erenowo, nyayak enye nnọ fi man anam n̄kpọ ọnọ fi ke ofụri eyouwem esie.’

Nte Hannah osụk en̄wekde eyet, Eli emi ekedide Akwa Oku ekekere ke enye akpa mmịn. Hannah ama ọdọhọ enye ete: ‘Ihih, ọbọn̄ mi, n̄kpaha mmịn. Nnyene akamba mfịna; enye ke nsụk ntịn̄ oro nnọ Jehovah.’ Eli ama okụt ke imedue onyụn̄ ọdọhọ ete: ‘Yak Abasi ọnọ fi se eben̄ede enye.’ Hannah ama adaha ọnyọn̄, ifụhọke aba. Ekem enye ama aman eyen erenowo onyụn̄ osio enye Samuel. Ekere ke eketie Hannah didie ke idem?

Hannah ikefreke se enye ọkọn̄wọn̄ọde ọnọ Jehovah. Ndondo oro enye osiode Samuel ke eba, Hannah ama emen enye aka tent utuakibuot man Samuel okodu do anam n̄kpọ Jehovah. Enye ama ọdọhọ Eli ete: ‘Eyen oro n̄keben̄ede Jehovah do edi emi. Mmayak enye nnọ Jehovah ke ofụri eyouwem esie.’ Elkanah ye Hannah ẹma ẹsika ẹkese Samuel kpukpru isua ẹnyụn̄ ẹmen obufa anana-ubọk kod ẹsọk enye. Jehovah ama anam Hannah aman nditọ ition en̄wen—irenowo ita ye iban iba.