Obufa Adausụn̄ ye Iban Iba Emi Ẹnyenede Uko

Joshua ama ada ikọt Jehovah usụn̄ ke ediwak isua tutu enye akpa ke ini edide isua 110. Nditọ Israel ẹma ẹtuak ibuot ẹnọ Jehovah ke ini Joshua okodude ke uwem. Edi ke Joshua ama akakpa, mmọ ẹma ẹtọn̄ọ ndikpono nsunsu abasi ukem nte mbon Canaan. Ke ntak oro, Jehovah ama ayak edidem Canaan kiet emi ekekerede Jabin ofiomo mmọ. Mmọ ẹma ẹkpe Jehovah ubọk ẹte an̄wam mmimọ. Ntre Jehovah ama emek owo emi ekekerede Barak ete ada mmọ usụn̄. Enye edin̄wam mmọ ẹfiak ẹtuak ibuot ẹnọ Jehovah.

Deborah emi ekedide prọfet an̄wan ama ọdọn̄ ẹkot Barak. Enye ama ọdọhọ Barak se Jehovah eketịn̄de ete: ‘San̄a ye owo 10,000 ka bịne udịmekọn̄ Jabin ke itịghede mmọn̄ Kishon. Do ke afo edikan Sisera, etubom ekọn̄ Jabin.’ Barak ama ọdọhọ Deborah ete: ‘Nyaka edieke afo editienede mi ika.’ Deborah ama ọdọhọ enye ete: ‘Nyetiene fi n̄ka. Edi fiọk ete ke idịghe afo ediwot Sisera. Jehovah ọdọhọ ke n̄wan ediwot enye.’

Deborah ama etiene Barak ye mbonekọn̄ esie ọdọk aka Obot Tabor. Ndondo oro Sisera okopde emi, enye ama etịm chariot ekọn̄ ye udịmekọn̄ esie ọwọrọ akada ke itịghede Kishon. Deborah ama ọdọhọ Barak ete: ‘Mfịn emi Jehovah ayanam fi akan mme asua fo.’ Barak ye owo 10,000 oro ẹma ẹsụhọde ẹbịne okopodudu udịmekọn̄ Sisera.

Jehovah ama anam mmọn̄ Kishon ọtọ. Mme chariot ekọn̄ Sisera ẹma ẹbụhọ ke okpụk. Barak ye mbonekọn̄ esie ẹma ẹkan udịmekọn̄ Sisera. Edi Sisera ama efehe ọkpọn̄ chariot esie ekedịbe ke tent mma kiet emi ekekerede Jael. Jael ama ọnọ enye mmọn̄eba ọn̄wọn̄ onyụn̄ ada abran̄kịn ofụk enye. Sisera ama ede sia idem ama emem enye tutu. Jael ama ọn̄wọn ada ọkpọhọ tent aka ọkọkọn̄ esịn enye ke ibuot. Sisera ama akpa.

Barak ama asan̄a oyom Sisera. Jael ama ọwọrọ ke tent esie edidọhọ enye ete: ‘Dụk di. Mmọn̄ n̄wụt fi owo emi afo oyomde.’ Barak ama odụk okokụt Sisera akpade ana do. Barak ye Deborah ẹma ẹkwọ ikwọ ẹtoro Jehovah ke ndinam Israel ẹkan mme asua mmọ. Israel ẹma ẹbọ emem ke ofụri isua 40.