Se Jephthah Ọkọn̄wọn̄ọde Ọnọ Jehovah

Nditọ Israel ẹma ẹfiak ẹkpọn̄ Jehovah ẹkekpono nsunsu abasi. Edi mme abasi oro ikesinyan̄ake mmọ ke ini nditọ Ammon ẹkesifiomode ẹnyụn̄ ẹn̄wanade ye mmọ. Mmọ ẹma ẹbọ ufen ke ediwak isua. Ke akpatre mmọ ẹma ẹdọhọ Jehovah ẹte: ‘Imanam idiọkn̄kpọ. Mbọk nyan̄a nnyịn sio mme asua nnyịn ke ubọk.’ Nditọ Israel ẹma ẹbiat nsunsu abasi mmọ ẹnyụn̄ ẹfiak ẹtọn̄ọ ndituak ibuot nnọ Jehovah. Jehovah ikoyomke mmọ ẹka iso ẹbọ ufen.

Ntre Jehovah ama emek okopodudu owoekọn̄ kiet emi ekekerede Jephthah ete ada nditọ Israel usụn̄ ẹken̄wana ye nditọ Ammon. Jephthah ama ọdọhọ Jehovah ete: ‘Edieke afo edin̄wamde nnyịn ikan, nyọnọ fi akpa owo emi ediwọrọde ke ufọk mi idikọm mi ke ini nnyọn̄de ndi.’ Jehovah ama okop akam Jephthah onyụn̄ anam enye akan ke ekọn̄ oro.

Ke ini Jephthah ọkọnyọn̄de edi, akpa owo emi ọkọwọrọde edikọm enye ekedi adiaha esie, emi ekedide n̄kukụre eyen esie. Adiaha esie ke ekebre ekọmọ, ke enek. Nso ke Jephthah edinam idahaoro? Enye ama eti se enye ọkọn̄wọn̄ọde ọnọ Jehovah onyụn̄ ọdọhọ ete: ‘Oh adiaha mi! Amanam mi mfụhọ. Enyene se n̄kọn̄wọn̄ọde nnọ Jehovah. Ana nsio fi nnọ akanam utom ke tent utuakibuot ke Shiloh ke ntak un̄wọn̄ọ oro.’ Edi adiaha esie ama ọdọhọ enye ete: ‘Ete mi, edieke edide enyene se ọkọn̄wọn̄ọde ọnọ Jehovah, nam se ọkọn̄wọn̄ọde. N̄kukụre se mben̄ede fi edi yak ọnọ mi ọfiọn̄ iba, yak n̄kasan̄a ke mme obot, ami ye mme ufan mi iban. Mma nnyọn̄ ndi, nyaka Shiloh.’ Adiaha Jephthah ama aka okodu ke tent utuakibuot anam n̄kpọ Jehovah ke ofụri eyouwem esie. Mme ufan esie ẹma ẹsika ẹkese enye ke Shiloh kpukpru isua.