Jehovah Etịn̄ Ikọ ye Samuel

Eli emi ekedide Akwa Oku ama enyene nditọiren iba emi ẹkedide oku ke tent utuakibuot. Mmọ ẹkekere Hophni ye Phinehas. Mmọ ikenịmke ibet Jehovah, ẹma ẹsinyụn̄ ẹdiọk uwem etieti ye mme owo. Ke ini nditọ Israel ẹmende unam ẹdi ndiwa nnọ Jehovah, mmọ ẹma ẹsimen mfọnn̄kan itie ke unam oro. Eli ama esikop se nditọ esie ẹnamde, edi enye ikanamke n̄kpọ ndomokiet. Ndi Jehovah oyosụk ayak utọ n̄kpọ oro aka iso?

Samuel iketieneke inam se Hophni ye Phinehas ẹkenamde kpa ye oro mmọ ẹkenen̄erede ẹsọn̄ọ enye. Jehovah ama ama Samuel etieti. Ke ini Samuel ekedede idap okoneyo usen kiet, enye ama okop nte ẹkotde enye. Ntre enye ama edemede efehe ọkọdọhọ Eli ete: ‘Se mi mi!’ Edi Eli ama ọdọhọ enye ete: ‘N̄kotke fi. Fiak kanana de.’ Samuel ama afiak akanana. Edi enye ama afiak okop ẹkotde enye. Ke ini Samuel akafiakde ọkọdọhọ Eli ọyọhọ utịm ikata m̀mê enye okot imọ, Eli ama ọdiọn̄ọ ndien ke Jehovah okot Samuel. Ntre enye ama ọdọhọ Samuel ete edieke ẹfiakde ẹkot enye yak enye ọdọhọ ete: ‘Tịn̄, O Jehovah. Asan̄autom fo ke akpan̄ utọn̄.’

Samuel ama afiak akanana. Ekem enye okop ẹkotde enye: ‘Samuel! Samuel!’ Enye ama ọbọrọ ete: ‘Mbọk, tịn̄, koro asan̄autom fo ke akpan̄ utọn̄.’ Jehovah ama ọdọhọ enye ete: ‘Dọhọ Eli ete ke mmọn̄ mmia enye ye ubon esie ufen. Koro enye ọdiọn̄ọ ke nditọ esie ke ẹnam ndiọi n̄kpọ ke tent utuakibuot, edi enye inamke n̄kpọ ndomokiet.’ Ke ini eyo esierede, Samuel ama ekeberede usụn̄ tent utuakibuot nte enye esisụk anamde. Ndịk ikayakke enye ọdọhọ Eli se Jehovah eketịn̄de. Edi Eli ama okot enye obụp ete: ‘Eyen mi, nso ke Jehovah eketịn̄ ọnọ fi? Kûdịp mi n̄kpọ ndomokiet.’ Samuel ama etịn̄ kpukpru n̄kpọ ọnọ Eli.

Jehovah ama aka iso an̄wam Samuel nte Samuel osụk ọkọride. Ofụri Israel ẹma ẹkụt ke Jehovah emek enye prọfet ye ebiereikpe.