Ẹmen Paul Ẹka Rome

Ọyọhọ isan̄ ukwọrọikọ Paul ita eketre ke Jerusalem. Ẹma ẹmụm enye do ẹkesịn ke ufọk-n̄kpọkọbi. Jesus ama ọdọhọ enye okoneyo ke n̄kukụt ete: ‘Afo ayaka Rome man ọkọkwọrọ ikọ do.’ Ekem ẹma ẹsio Paul do ẹkesịn ke ufọk-n̄kpọkọbi isua iba ke Caesarea. Ke ini ẹsụk ẹkpede ikpe esie ke iso andikara emi ekekerede Festus, enye ama ọdọhọ Festus ete: ‘Nọ ikpe mi ẹsọk Caesar ke Rome.’ Festus ama ọdọhọ ete: ‘Ayaka ebịne Caesar, sia oyomde Caesar ekpe ikpe fo.’ Ẹma ẹsịn Paul ke ubom emi akade Rome; Luke ye Aristarchus ẹma ẹtiene enye.

Nte ẹsụk ẹwatde ẹka, ọkpọsọn̄ oyobio ama ọtọn̄ọ onyụn̄ abara ke ediwak usen. Kpukpru owo ke ubom oro ẹkekere ke imọn̄ ikpa. Edi Paul ama ọdọhọ mmọ ete: ‘Mme ete, angel ama ọdọhọ mi ke ndap ete: “Paul, kûyak ndịk anam fi. Afo eyesịm Rome, n̄kpọ idinyụn̄ inamke owo ndomokiet ke ubom emi.” Ẹkûfụhọ! Nnyịn idikpaha.’

Oyobio oro ama efịme ofụri urua iba. Edi ke akpatre, mmọ ẹma ẹda ẹkụt isuo Malta. Mmọ ẹma ẹwat ubom mmọ ẹketọ utan, ubom ama owụhọ do, ndien odudu mbufụt ama owụri ubom. Edi owo 276 emi ẹkedude ke ubom oro ẹma ẹbọhọ. Ndusụk ẹkewọwọk ẹsịm esụk, edi mbon eken ẹkemụm mbai ubom ẹfiọrọ ẹkesịm esụk. Mbon Malta ẹma ẹkama mmọ etieti ẹnyụn̄ ẹbara ikan̄ ẹnọ mmọ ẹwebe.

Ke ọfiọn̄ ita ama ekebe, mbonekọn̄ ẹma ẹda Paul ẹdụk ubom en̄wen ẹdaha Rome. Nditọete ẹma ẹdikụt Paul ini enye edide edisịm Rome. Enye ama ọkọm Jehovah Abasi onyụn̄ ada oro ọdọn̄ idem esịt. Ẹma ẹyak Paul ekpe ufọk odụn̄ kpa ye oro enye ekedide owo n̄kpọkọbi. Edi owoekọn̄ ama esikpeme enye kpukpru ini. Enye okodu ke ufọk oro isua iba. Mme owo ẹma ẹsidi ẹdise enye, enye ama esinyụn̄ ọkwọrọ ikọ ọnọ mmọ aban̄a Obio Ubọn̄ Abasi onyụn̄ ekpep mmọ n̄kpọ aban̄a Jesus. Paul ama ewet nsio nsio leta ọnọ mme esop ke Asia Minor ye Judea. Kpukpru emi owụt ke Jehovah ama ada Paul anam eti mbụk esịm ediwak idụt.