“Yak Obio Ubọn̄ Fo Edi”

Jehovah ama ọn̄wọn̄ọ ete: ‘Ntuan̄a, ubiak, udọn̄ọ, m̀mê n̄kpa ididụhe aba. Ami nyọkwọhọde mme owo mmọn̄eyet ke enyịn mfep. Mmọ iditịghi aba afanikọn̄ mmọ.’

Jehovah okobot Adam ye Eve esịn ke In̄wan̄ Eden ete ẹdụn̄ ke emem ẹnyụn̄ ẹkop inemesịt. Akana mmọ ẹtuak ibuot ẹnọ Ete mmọ emi odude ke heaven, okonyụn̄ ana ubon mmọ ẹtọt ẹyọhọ isọn̄. Edi Adam ye Eve ẹma ẹsọn̄ ibuot ye Jehovah. Kpa ye oro Jehovah ikefreke enyịn iban̄a se enye akaduakde ndinam. Imokụt ke n̄wed emi ke Jehovah esinam se enye ọn̄wọn̄ọde. Ukara esie ayanam kpukpru n̄kpọ ọfọn ke isọn̄ emi nte enye ọkọn̄wọn̄ọde ọnọ Abraham.

Ekpri ini ntem osụhọ Abasi ndisobo Satan, mme demon, ye kpukpru ndiọi owo mfep. Ini oro, kpukpru owo ẹdisinam n̄kpọ Jehovah. Owo ididọn̄ọke aba, idinyụn̄ ikpaha aba. Uwem edinenem nnyịn kpukpru usen. Ofụri ererimbot edidi Paradise. Kpukpru owo ẹyenyene nti udia ye nti ufọk. Mme owo ẹyefọn ido tutu; ibak ye afai ẹyetre. Ndiọi unam idifeheke nnyịn, nnyịn idinyụn̄ ifeheke mmọ.

Eyenem tutu Jehovah ama ọtọn̄ọ ndinam mme akpan̄kpa ẹset. Iyokụt mme owo nte Abel, Noah, Abraham, Sarah, Moses, Ruth, Esther, ye David. Mmọ ẹyetiene nnyịn ẹnam isọn̄ emi edi Paradise. Utom emi edinemde mme owo ndinam idinanake.

Jehovah oyom fi etiene odu ke Paradise oro. Afo ọyọdiọn̄ọ Jehovah ini oro akan nte ọdiọn̄ọde idahaemi. Yak inam n̄kpọ emi edinamde nnyịn inen̄ede ikpere Jehovah kpukpru usen—idahaemi ye ke nsinsi nsinsi!