Jonathan Enyene Uko—Ada ye David

Jonathan ekedi akpan Edidem Saul. Enye ekedi owoekọn̄, onyụn̄ enyene uko etieti. David ọkọdọhọ ke Jonathan ama ọsọp usọp akan ntrukpom onyụn̄ okop odudu akan ekpe. Usen kiet Jonathan ama okụt mbonekọn̄ Philistia ke enyọn̄ obot kiet. Enye ama ọdọhọ akama-n̄kpọekọn̄ esie ete: ‘Jehovah ọkpọnọ nnyịn idiọn̄ọ, iyaka ikan̄wana ye mbon Philistia. Edieke mmọ ẹdọhọde nnyịn idọk idi en̄wan, iyada oro idiọn̄ọ ke edi se ikan̄wana ye mmọ.’ Mbon Philistia ẹma ẹfiori ẹte: ‘Ẹdọk ẹdi yak in̄wana!’ Ntre mmọ ẹma ẹdọk ẹka ẹken̄wana ẹkan mbonekọn̄ Philistia 20.

Sia Jonathan ekedide akpan, enye ke ẹkpekemek edidem ete esie ama akpa. Kpa ye oro Jonathan ọkọdiọn̄ọde ke David ke Jehovah emek ete edi edidem ete imọ ama akpa, enye ikefịbeke David. Enye ye David ẹma ẹkabade itai ye aban̄. Mmọ ẹma ẹn̄wọn̄ọ ke iyekpeme inyụn̄ ida ye kiet eken. Jonathan ama ọkpọn̄ ọfọn̄ esie, akan̄kan̄ esie, utịgha esie, ye ubọpisịn esie ọnọ David man owụt ke imọ ye David idi ata ufan.

Ini David ekefehede mbak Saul idiwot enye, Jonathan ama aka ọkọdọhọ enye ete: ‘Sọn̄ idem, nyụn̄ nyene uko. Jehovah emek fi edidem. Ete mi ọdiọn̄ọ oro.’ Ndi akpama ndinyene ufan emi etiede nte Jonathan?

Jonathan ama esinam n̄kpọ emi ekemede ndida enye ibuot man an̄wam David ufan esie. Enye ama ọdiọn̄ọ ke Edidem Saul ete esie oyom ndiwowot David, ntre enye ama ọdọhọ ete esie ete: ‘Eyedue Abasi edieke owotde David; inyeneke se David eduede.’ Saul ama ayat esịt etieti ye Jonathan. Ke isua ifan̄ ama ekebe, Saul ye Jonathan ẹma ẹkpan̄a ke ekọn̄.

Ke Jonathan ama akakpa, David ama ọdọn̄ ẹkeyom Mephibosheth eyen Jonathan. Ke ini ẹkemende enye edi, David ama ọdọhọ enye ete: ‘Nyese mban̄a fi ke ofụri eyouwem fo, sia ete fo ekedi ata ufan mi. Afo edidụn̄ ke ufọk ubọn̄ mi, edinyụn̄ adia udia ke okpokoro mi.’ David ikefreke Jonathan ufan esie.