Jehovah Ikefreke Joseph

Ini Joseph ekesịnede ke ufọk-n̄kpọkọbi, Pharaoh, andikara Egypt, ama adaba ndap emi owo ndomokiet mîkekemeke nditịn̄ se ọwọrọde. Asan̄autom esie kiet ama ọdọhọ enye ke Joseph ekeme nditịn̄. Pharaoh ama ọdọhọ ẹsọsọp ẹmen Joseph ẹdi.

Pharaoh ama obụp Joseph m̀mê enye ekeme nditịn̄ se ndap imọ ọwọrọde. Joseph ama ọdọhọ ete: ‘Udia oyodu barasuene ke Egypt ke isua itiaba, ekem akan̄ oyodu ke isua itiaba. Mek owo emi enyenede ọniọn̄ yak atan̄ udia obon mbak biọn̄ idiwot mme owo.’ Pharaoh ama ọdọhọ enye ete: ‘Afo ke mmek. Idụhe eke edikponde itie ikan fi ke Egypt emi, ibọhọke ami!’ Jehovah akanam Joseph ọdiọn̄ọ se ndap oro ọwọrọde.

Isua itiaba emi udia okodude, Joseph ama atan̄ udia obon. Ekem akan̄ ama odu ke ofụri ererimbot nte Joseph eketịn̄de. Mme owo ẹma ẹto kpukpru ebiet ẹdibọ Joseph udia ẹdep. Jacob ete esie ama okop ke udia odu ke Egypt, onyụn̄ ọdọn̄ nditọ esie irenowo duop ete ẹka do ẹkedep udia.

Joseph ama ọsọsọp ọdiọn̄ọ nditọete esie ini mmọ ẹdide Egypt ndidep udia, edi mmọ ikọdiọn̄ọke enye. Mmọ ẹma ẹtuak ibuot ẹnọ enye, kpa nte enye okokụtde ke ndap ke ini ekpri. Enye ama oyom ndidiọn̄ọ m̀mê mmọ ẹsụk ẹdọdiọk uwem. Ntre enye ama ọdọhọ mmọ ẹte: ‘Mbufo ẹdi mbon uyep. Ẹdi ndise nte ẹdisan̄ade ida mfịna idi idụt nnyịn.’ Mmọ ẹma ẹdọhọ ete: ‘Ihih-o! Nnyịn ito Canaan idi; ete nnyịn enyene nnyịn irenowo 12. Kiet ama akpa, edi ekperedem odu ye ete nnyịn ke ufọk.’ Joseph ama ọdọhọ mmọ ete: ‘Ẹkeda enye ẹdi man nnịm se ẹtịn̄de.’ Ntre mmọ ẹma ẹfiak ẹnyọn̄ọ ẹbịne ete mmọ.

Ke udia emi mmọ ẹkedepde ama okokụre, Jacob ama ọdọhọ mmọ ẹfiak ẹkedep udia. Isan̄ emi, mmọ ẹma ẹmen Benjamin ekperedem eyenete mmọ ẹka. Joseph ama odomo nditọete esie ese. Enye ama anam ẹmen cup silver esie ẹdịp ke ekpatudia Benjamin onyụn̄ ọdọhọ ke mmọ ẹyịp cup imọ. Ke ini mme asan̄autom Joseph ẹkekụtde cup oro ke ekpat Benjamin, idem ama akpa nditọete esie. Mmọ ẹma ẹkpe Joseph ubọk ẹte ọnọ mmimọ ufen, ọkpọn̄ Benjamin.

Joseph ama ada oro ọdiọn̄ọ ke mmọ ẹkpụhọde. Joseph ikekemeke ndime aba. Enye ama obom eyet onyụn̄ ọdọhọ mmọ ete: ‘Ami ndi Joseph eyenete mbufo. Ndi ete mi do ke uwem?’ Idem ama akpa mmọ etieti. Enye ama ọdọhọ mmọ ete: ‘Ẹkûfịna idem ẹban̄a se mbufo ẹkenamde mi. Abasi akanam ndi mi man enye enịm mbufo uwem. Ẹsọsọp ẹkemen ete mi ẹdi.’

Mmọ ẹma ẹmen n̄kpọ emi ẹketịn̄ ẹnọ ete mmọ ẹnyụn̄ ẹmen enye ẹdi Egypt. Joseph ama afiak okụt ete esie ke ata ediwak isua ama ekebe.