Sarah Aman Eyen Ndien!

Ebịghi Abraham ye Sarah ẹkedọ ndọ. Mmọ ẹma ẹkpọn̄ ediye ufọk mmọ ke Ur ẹkedụn̄ ke tent. Sarah ikayatke esịt; enye ama enịm ke se Jehovah ọdọhọde mmimọ inam edi ke ufọn mmimọ.

Ama ọdọn̄ Sarah ndinyene eyen tutu enye ọdọhọ Abraham ete: ‘Hagar eyenufọk mi akpaman eyen ọnọ fi, editie nte ami mman.’ Ekem Hagar ama aman eyen erenowo. Ẹkesio enye Ishmael.

Ke ediwak isua ama ekebe, Abraham ye Sarah ẹma ẹnyene isenowo ita. Ini oro Abraham ekedi isua 99, Sarah edi isua 89. Abraham ama ọdọhọ isenowo oro ẹtetie ẹduọk odudu ke idak eto kiet onyụn̄ ọnọ mmọ n̄kpọ ẹdia. Mmọ ẹkedi mme angel! Mmọ ẹma ẹdọhọ Abraham ẹte: ‘Ini ntem isua efen, afo ye n̄wan fo ẹyenyene eyen erenowo.’ Sarah ama esịne ke esịt tent okop. Enye ama asak, onyụn̄ ọdọhọ ke esịt esie ete: ‘Ndi akanian̄wan nte ami ekeme ndiman eyen?’

Ke isua oro etienede, Sarah ama aman eyen erenowo kpa nte angel Jehovah eketịn̄de. Abraham okosio eyen oro Isaac, emi ọwọrọde “Imam.”

Ini Isaac edide n̄kpọ nte isua ition, Sarah ama esikụt Ishmael adade Isaac ọdọn̄ ndọk. Sarah ikoyomke n̄kpọ anam eyen esie, ntre enye ama ọdọhọ Abraham ebịn Hagar ye Ishmael. Abraham ikoyomke ndibịn mmọ, edi Jehovah ama ọdọhọ enye ete: ‘Nam se Sarah etịn̄de. Ndiyakke n̄kpọ anam Ishmael. Isaac ke ndida nnam se n̄kọn̄wọn̄ọde nnọ fi.’