Nso ke N̄kpanam Man Ndot Ndidi Ntiense Jehovah?

Se Jesus eketịn̄de ke Matthew 28:19, 20 owụt se owo akpanamde man edi Ntiense Jehovah. Itie oro abat se akpanamde man edi mbet Christ, ndien emi esịne nditịn̄ mban̄a Jehovah nnọ mme owo.

Akpa: Nyịme ndikpep Bible. Jesus ama ọdọhọ mbet esie ẹkenam mme owo ẹdi mbet ẹnyụn̄ ẹkpep mmọ se imọ ikekpepde mmọ. (Matthew 28:19, 20) Ikọ emi ẹkabarede nte “mbet” ọwọrọ “owo emi owo ekpepde n̄kpọ.” Se idọn̄ọde ke Bible, akpan akpan se Jesus Christ ekekpepde, ekeme ndin̄wam fi okop inemesịt onyụn̄ anam uwem fo ọwọrọ usụn̄. (2 Timothy 3:16, 17) Edinenem nnyịn ndin̄wam fi ekpep Bible ke mfọn.—Matthew 10:7, 8; 1 Thessalonica 2:13.

Ọyọhọ Iba: Nam se ekpepde. Jesus ọkọdọhọ yak mbon oro ẹkpepde Ikọ Abasi man ẹdi mbet imọ ‘ẹnam kpukpru n̄kpọ eke imọ iketemede.’ (Matthew 28:20) Ọwọrọ ke udûkpepke Bible kpọt, ke oyoyom okpụhọde ndusụk edu uwem fo ye nte esikerede n̄kpọ. (Utom 10:42; Ephesus 4:22-29; Mme Hebrew 10:24, 25) Mbon oro ẹnamde se Jesus ọdọhọde ẹsibiere ke idemmọ nditiene Jesus. Owo esitọn̄ọ nditiene Jesus ini enye ayakde idemesie ọnọ Jehovah Abasi.—Matthew 16:24.

Ọyọhọ Ita: Na baptism. (Matthew 28:19) Bible emen baptism odomo ye n̄kpa. (Se Rome 6:2-4.) Baptism esiwụt ke owo akpa okpọn̄ akani uwem esie onyụn̄ ọtọn̄ọ ndidu obufa uwem. Ama ana baptism, oro ayanam ata ediwak owo ẹkụt ke afo ama ekpep Bible onyụn̄ ọtọn̄ọ ndinam se Bible ọdọhọde, ke omonyụn̄ oyom Abasi an̄wam fi odu uwem emi esịt mîdifịnake fi.—Mme Hebrew 9:14; 1 Peter 3:21.

Ndinam didie ndiọn̄ọ m̀mê mmodot ndina baptism nte Ntiense Jehovah?

Dọhọ mbiowo esop Mme Ntiense Jehovah. Mmọ ẹyeneme n̄kpọ ifan̄ ye afo man ẹse m̀mê ọmọdiọn̄ọ se Bible ekpepde, m̀mê emesinam mmọ, m̀mê ama onyụn̄ ayak idemfo ọnọ Jehovah.—Utom 20:28; 1 Peter 5:1-3.

Ndi nditọ Mme Ntiense Jehovah ẹsitiene ẹnam ofụri se ẹbatde emi?

Ih. Imesida ‘ntụnọ ye item Jehovah’ in̄wam nditọ nnyịn nte Bible ọdọhọde. (Ephesus 6:4) Edi nte mmọ ẹkponde owo, ana mmọ ẹbiere ke idemmọ ndikpep Bible, ẹnịm se mmọ ẹkpepde, ẹnyụn̄ ẹnam se mmọ ẹkpepde man mmọ ẹdot ndina baptism. (Rome 12:2) Se idude edi ke owo kiet kiet edibiere m̀mê iyokpono Jehovah m̀mê idikponoke.—Rome 14:12; Galatia 6:5.